Timhaka ta mabhuku ma tako ka Cibhukwana ca Mutlhangano
© 2024 Watch Tower Bible and Tract Society of Pennsylvania
1-7 KA JULHO
TITSHOMBA TI NGA KA MHAKA YA NUNGUNGULU TISIMU 57-59
Jehovha wa tsandzekisa makungo ya lava va vhukelako vanhu vakwe
Dê Testemunho Cabal paj. 220-221 par. 14-15
“Kala magemeta-musi ya misava”
14 Stefani i nyikile wukustumunyu go tiya na a nga se dawa hi valala vakwe. (Miti. 6:5; 7:54-60) Ndzeni ka cikhati leci va nga “xanisiwa nguvhu”, a vapizani vontlhe, ahandle ka vapostoli, va no hangalaka tikweni gontlhe ga Judhiya ni Samariya. Kanilezvi, lezvo a zvi nyimisangi ntiro wa kuchumayela. Filipu i noya Samariya a ya “chumayela ha Kristu” niku i vile ni mabhindzu ya manene. (Miti. 8:1-8, 14, 15, 25) Ahandle ka lezvo, hi byeliwa lezvi: “Lava va nga hangalakile hi kota ya kuxaniseka ku vhukileko hi kota ya Stefani va no famba kala Fenikiya, ni Kupero, ni Antiyokiya, kanilezvi va wo kanela mhaka ka vaJudha voce. Hambulezvo, cikari kabye ku wa hi ni vavanuna va le Kupero ni Kirene. Laha va nga chikela Antiyokiya va no sangula ku wulawula ni vaGreki, va kanela a mahungu ya manene ya Hosi Jesu.” (Miti. 11:19, 20) Ka cikhati leco, a kuxanisiwa ku mahile ku a mahungu ya manene ma hangalaka.
15 Masikwini ya hina ku humelele zvo fana le kale ka União Soviética. Nguvhunguvhu hi va 1950, a Vakustumunyu vo tala va Jehovha va no khomiwa va yisiwa Sibéria va ya vekiwa ka matshamu yo hambanahambana. Hi kota ya lezvo, a mahungu ya manene ma noya ma chumayelwa nguvhu ka matshamu yo tala tikweni lego ga hombe. Na zvi nga kotekangi ku a Vakustumunyu vo tala va Jehovha va kuma mali ya ku endza a 10 000 wa tikilometro kasi vaya chumayela a mahungu ya manene. Kanilezvi a mufumo ha woce wu no maha ku va hangalaka tikweni gontlhe. A makabye wo kari i wulile lezvi: “Hi kufamba ka cikhati, a wuhosi gi no maha ku a vanhu vo tala va timbilu ti nene va gondza lisine le Sibéria.”
Titshomba ta moya
Murindzeli 07.23 paj. 18-19 par. 16-17
“Tiyani mu ku nde, mu nga tsekatseki”
Tiyisa a mbilu ya wena. Hosi Dhavhidha i wulile lezvaku i wa nga ta tshuka a tsika ku randza Jehovha, a cikhati leci a nga yimbelela, aku: “A mbilu ya mina yi tiyile, Nungungulu.” (Lis. 57:7) Hinawu hi ngava ni mbilu yi tiyileko, yi tsumbako Jehovha hi kumbhelela. (Lera Lisimu 112:7.) Wona lezvi lezvo zvi mu vhunisileko zvona Bob, loyi a kumbukilweko le hehla. A cikhati leci a nga byeliwa ku va wa ta veka nkhata laha ka kusuhani kasi loku wu tshuka wu laveka va tekela ku mu chela, i no tekela ku va hlamula aku: ‘Loku mu alakanya ku mu ta tshuka mu ndzi chela nkhata, ndzi ta huma zvezvi laha cipitali’. Hi ndzhako ka cikhati, Bob i te: “Ndzi wa nga kanakani ne kukarateka.”
Bob i tiyile a ku nde hakuva i wa sina a mahile ciboho co tiya na a nga seya cipitali. Co sangula, i wa xuva ku tsakisa Jehovha. Ca wumbiri, i gondzile khwatsi lezvi a Bhibhiliya ni mabhuku ma seketelwako ka Bhibhiliya ma wulako xungetano hi wutomi ni nkhata. Ca wunharu, i wa kholwa ku a ku ingisa a zvileletelo zva Jehovha zvi ta mu nehela a makatekwa ya pindzukelwa. Hinawu hi nga zvi kota kuva ni mbilu yi tiyileko hambu ho kumana ni ciringo co tshamisa kuyini.
8-14 KA JULHO
TITSHOMBA TI NGA KA MHAKA YA NUNGUNGULU TISIMU 60-62
Jehovha wa hi hlayisa, ni ku hi vhikela a tlhela a hi tiyisa
Perspicaz vhol. 2 paj. 1143 par. 3
Khokhola
Hi ndlela yo fananisa: Lava va nga ni kukholwa va tlhela va ingisa Jehovha va tizwa na va hlayisekile nguvhu, a ku fana na Dhavhidha, loyi a yimbeleleko, aku: ‘Hakuva [Jehovha] wuchavelo ga mina, i khokhola gi tiyileko mahlweni ka nala.’ (Lis. 61:3) Lava va zvi tivako lezvi a vito ga Jehovha gi wulako zvona, ni ku tsumba vito lego va tlhela va gi yimela hi kutsumbeka, a va chavi nchumu hakuva ‘a vito ga Jehovha i khokhola go tiya; loyi a lulamileko wa chavela ka gona a pona’. — Mav. 18:10; Fananisa na 1 Sam. 17:45-47.
Perspicaz vhol. 2 paj. 1106 par. 1
Tenda
Ka zviyimo zvo hambanahambana a “tenda” gi wa tirisiwa kambe hi ndlela yo fananisa. A tenda ga munhu ku wa hi wutshamu ga ku a humula kona a tlhela vhikeleka ka zvilo zva ntumbuluko. (Gen. 18:1) Hi kuya hi mikhuwo leyi yi nga hi kona yi nga yelana ni ku amukela vapfhumba, a vapfhumba va wa hi ni zvigelo zva ku kholwa lezvaku va wa ta hlayiseka khwatsi va tlhela va kombisiwa cichavo loku va amukelwa ka tenda go kari. Hikwalaho, loku Kuvhululelwa 7:15 a wula lezvaku Nungungulu “i ta gwimba a tenda gakwe hehla kabye” i wula lezvaku a citshungu ca hombe ci ta vhikeleka ci tlhela ci hlayiseka. (Lis. 61:3, 4) Isaya i wulawula hi malulamiselo lawa Ziyoni, a sati wa Nungungulu, a faneleko ku mahela a vana lava a to pswala. I byelilwe lezvaku a ‘anamisa a wutshamu ga tenda gakwe’. (Isa. 54:2) Hikwalaho, i anamisa a wutshamu ga kuvhikela vana vakwe.
Sentinela 15/04/02 paj. 16 par. 14
A milayo ya Nungungulu yi mahela ku vhuna hina
14 Zva tiyisa a ku tiva lezvaku a nayo wa Nungungulu a wu cici. Zvikhatini lezvi zva zvikarato hi hanyako ka zvona, Jehovha i ribye ga ku a gi cici, niku gi kona kusukela kupindzukeni kala kupindzuka. (Lis. 90:2) Jehovha i wulile lezvi xungetano hi yena wutsumbu: ‘Mina Jehovha a ndzi cici’. (Mala. 3:6) A zvileletelo zva Nungungulu zvi tsalilweko lomu ka Bhibhiliya zva tsumbeka hi kumbhelela. A zvileletelo zva Nungungulu a zvi fani ni zvileletelo zva vanhu zvi cicako hi kukhandzakanya. (Jak. 1:17) Hi cikombiso, hi malembe yo tala a titlhari ti wa wula lezvaku a vanana va wa fanele ku wundliwa hi ku heniwa, kanilezvi hi ndzhako ka cikhati a vokari vabye va no cica mawonela va wula lezvaku a wusungukati gabye mhakeni leyi gi wa nga hi ginene. A milayo ni zvileletelo zva tiko mhakeni leyi zva cica hi kukhandzakanya, a ku khwatsi hi loku zvi susumetiwa hi moya. Kanilezvi, a Mhaka ya Nungungulu a yi cici. Ku hundza malembe yo tala nguvhu a Bhibhiliya na gi nyika wusungukati ga lezvi a vapswali va nga va wundlisako zvona a vana vabye hi lirandzo. Mupostoli Pawule i wulile lezvi: “Vapapayi, mu nga zangarisi vana va n’wina, kanilezvi simamani ku va wundla ni ku va gondzisa hi milayo ya Jehovha.” (Efe. 6:4) A zvo ku tiyisa a ku tiva lezvaku a milayo ya Jehovha ya tsumbeka; a yi tshuki yi cica!
Titshomba ta moya
Sentinela 01/06/06 paj. 11 par. 7
Timhaka-tshinya ta bhuku ga wumbiri ga Tisimu
62:11. Nungungulu a nga nyikiwi ntamu hi nchumu. Hi yena cibuka ca ntamu. ‘A ntamu wa Nungungulu’.
15-21 KA JULHO
TITSHOMBA TI NGA KA MHAKA YA NUNGUNGULU TISIMU 63-65
‘A lirandzo la wena li nga mbheliko li chukwana a ku hundza wutomi’
Sentinela 15/10/01 paj. 15-16 par. 17-18
Himani a to hi hambanisa ni lirandzo la Nungungulu?
17 A lirandzo la Nungungulu li na ni lisima muni ka wena? Dhavhidha i tsalile lezvi: ‘Hakuva a kurandza ka wunene ga wena ku sasekile ku hundza wutomi; a minomu ya mina yi ta ku dhumisa. Hikwalaho, ndzi ta ku dhumisa na ndza ha hanya, ndzi ta tlakusa a mandla ya mina vitweni ga wena.’ (Lis. 63:3, 4) Xana wenawu u ti zwisa lezvo? Tikweni legi, a ku ci kona ca cinene nguvhu a ku hundza ku randziwa hi Nungungulu ni kuva ni wunghana go tsumbeka naye? Hi cikombiso, xana a ku tira hi kutikarata ntirweni wa kutihanyisa zvi chukwana a ku hundza kuva ni kurula ka maalakanyo ni litsako li vangiwako hi kuva ni wunghana ga hombe na Nungungulu? (Luka 12:15) A maKristu yo kari zvi lavile ku ma hlawula ku tsika ku kholwa ka Jehovha ni kufa. Lezvo zvi humelele a Vakustumunyu vo tala va Jehovha va nga hi tivaleni ta xanisa ta vaNazi ndzeni ka Yimpi ya Wumbiri ya Misava Yontlhe. Vatsongwani basi va nga tsika kukholwa kabye, kanilezvi a kutala ka vamakabye va hina va hlawulile ku simama lirandzweni la Nungungulu, va ti yimisela kufa loku zvi laveka. Lava va simamako va tsumbekile lirandzweni la Nungungulu va nga tsumba lezvaku Nungungulu i ta va nyika a wutomi ga pindzukelwa, a zvilo zva ku a va nge nyikiwi hi tiko legi. (Mar. 8:34-36) Kanilezvi ka ha hi ni zvin’wani a ku hundza wutomi ga pindzukelwa.
18 Hambu lezvi zvi kalako zvi nga koteki a ku hanya kala kupindzuka na hi nga vhuniwi hi Jehovha, hi nga zama ku alakanyela ku zvi wa ta kuyini loku hi wo hanya wutomi go leha nguvhu na hi nga vhuniwi hi Jehovha. Gi wa nga ta tsakisa, niku gi wa nga tava ni kungo. Jehovha i nyikile a vanhu vakwe a ntiro wo tsakisa wa ku va wu maha masikwini lawa yo gumesa. Hikwalaho, hi nga tiyiseka lezvaku a cikhati leci Jehovha, a Mutatisi wa Hombe wa Zvitsumbiso, a to hi nyika wutomi ga pindzukelwa, gi tava ni zvilo zvo tsakisa, ni zvazvinene kasi ku gondza ni ku maha. (Mutsh. 3:11) Kani hi ta gondza kala kwihi ndzeni ka malembe ya talela ga cima, a hi nga ta tshuka hi zvi kota a ku zwisisa hi kumbhelela “a kutala ka makatekwa, ni kueta ka wutlhari ni wutivi ga Nungungulu”. — Rom. 11:33.
Murindzeli 12.19 paj. 28 par. 4
“Bongani hi kota ya zvilo zvontlhe”
Loyi zvi faneleko nguvhu a ku hi mu bonga hi Nungungulu. A zvi kanakanisi ku a zvikhati zvin’wani wa ehleketa hi zvilo zvo tala lezvi Nungungulu a ku nyikileko ni lezvi a ha simamako ku hi nyika. (Deut. 8:17, 18; Miti. 14:17) Kanilezvi, wutshan’wini ga ku gi alakanyela kutsongwani a wuxinji ga Nungungulu, a hi chukwana u ti nyika cikhati u ehleketa khwatsi hi makatekwa yo tala lawa Nungungulu a nyikako wena ni maxaka ya wena? A ku ehleketa hi wuhana legi a Muvangi a nga nago, zvi ta ku vhuna ku wona ku wa ku randza ni ku wa ku nyika lisima, zvi tlhela zvi ku kuca ku u mu bonga nguvhu. — 1 Joh. 4:9.
Murindzeli 15/10/15 paj. 24 par. 7
Simama ku ehleketa hi zvilo zva moya
Hambu lezvi zvi kotekako ku lera na u nga ti karati, a kuehleketa zvi lava ku u koka kupima. Hi cigelo leco, a wongo gi nga mbhelelangiko ga munhu gi tolovela ku tsutsuma giya ka lezvi zvo kala ku karata. Hikwalaho, a cikhati ca chukwana ca ku ehleketa hi loku u nga karatekangi u tlhela u nga hi na zvilo zvo ku colopetela. A mutsali wa tisimu i lo pola lezvaku i ehleketa khwatsi loku a hi mubhedhini wakwe ni wusiku na nga se kuma wurongo. (Lis. 63:6) Jesu, loyi a nga hi ni mapimo yo mbhelela, i wa ma tiva a mabhindzu ya kuva ka matshamu yo rula kasi ku ehleketa ni kukhongela. — Luka 6:12.
Sentinela 15/07/09 paj. 16 par. 6
Pimanyisa Jesu — Gondzisa hi lirandzo
6 Zva hi tsakisa a ku wulawula hi zvilo lezvi hi zvi randzako. A cikhati leci hi wulawulako hi zvilo lezvi hi zvi nyikako lisima timbilwini ta hina, zva hi tsakisa nguvhu, a tinghohe ta hina ti kombisa kuhiseka ni lirandzo. Lezvo zvi maheka nguvhu loku hi wulawula hi munhu hi mu randzako. A kutala ka zvikhati, hi zvi dokolokela nguvhu a ku byela van’wani lezvi hi zvi tivako hi munhu loye. Ha wulawula zvazvinene hi yena, hi mu dzundza hi tlhela hi mu yimelela. Hi maha lezvo hakuva hi xuva ku a van’wani va tshinela kakwe va tlhela va kokiwa hi matshamela yakwe a ku fana ni lezvi hina hi ti zwisako zvona.
Titshomba ta moya
Sentinela 15/11/07 paj. 15 par. 6
Wa aka van’wani?
Zva olova nguvhu a ku hohlola yindlu a ku hundza ku aka ya yiswa. A mabhulo ya hina wonawu ma nga aka kutani ku hohlola van’wani. Kota vanhu vo kala kumbhelela, hontlheni ha maha zvihoxo. Hosi Solomoni i wulile lezvi: “A nga kona munhu a lulamileko misaveni, loyi a mahako kusaseka, a nga wonhi nchumu.” (Mutsh. 7:20) Zva olova a ku wona a zvihoxo zva van’wani hi tlhela hi va hohlola hi mawonela ya hina ya hava. (Lis. 64:2-4) Kanilezvi, a kuva ni mabhulo ma akako zvi lava wutlhari.
22-28 Ka JULHO
TITSHOMBA TI NGA KA MHAKA YA NUNGUNGULU TISIMU 66-68
Jehovha wa rwala mindzhwalo ya hina siku ni siku
Murindzeli 05.23 paj. 12 par. 15
Jehovha i hlamulisa kuyini a mikhongelo ya hina?
15 A mikhongelo ya hina a yi hlamuliwi hi tindlela to hlamalisa. Kanilezvi a mihlamulo hi yi kumako hi yaleyi yi lavekako kasi hi simama na hi tsumbekile ka Papayi wa hina wa le tilweni. Hikwalaho, tshama na u longile a ku wona lezvi Jehovha a hlamulisako zvona a mikhongelo ya wena. A makabye wo kari wa cisati wa ku hi Yoko i wa zvi wonisa ku khwatsi Jehovha a nga hlamuli a mikhongelo yakwe, kanilezvi i no gumesa a sangula ku tsala lezvi a nga kari a kombela ka Jehovha. Hi ndzhako ka cikhati, i no cuwuka lomu ka kadherno wakwe a guma a wona lezvaku a kutala ka mikhongelo yakwe Jehovha i hlamulile, a ku patsa ni leyi ya ku yena i wa yi rivakelwe. Hi fanele ku ta na hi ti nyika cikhati hi nyima hi ehleketa hi lezvi Jehovha a hlamulisako zvona mikhongelo ya hina. — Lis. 66:19, 20.
Sentinela 01/12/10 paj. 23 par. 6
Va nyike lisima lava va wundlako vana voce
Jehovha i pimisele lezvaku ku tsaliwa tisimu leti a vaIzrayeli va nga yimbelela a cikhati leci va nga khozela. Hi nga alakanyela lezvi a tinoni ni lava va felweko hi vapswali va nga tiyisiswa zvona a cikhati leci va nga yimbelela a tisimu ti nga pimisilwe khwatsi ti nga va alakanyisa lezvaku Jehovha i ‘Papayi’ ni “mulamuli” niku i wa ta va tlhatlhisa. (Lis. 68:5; 146:9) Hinawu hi nga tiyisa a vapswali lava va wundlako vana voce. Va nga alakanya magezu ya hina hi cikhati co leha. Hambu andzhako ka 20 wa malembe, Ruth, a mamani wo kari a wundlileko vana yece, i wa ha ci alakanya khwatsi a cikhati leci a papayi wo kari wa wutlhari a nga mu byela lezvi: “Wa va wundla khwatsi a vana va wena va vambiri. Simama ku maha lezvo.” Ruth i wula lezvi: “A magezu lawo ma ndzi tiyisile nguvhu.” Kunene, “a magezu ya manene cihlowo ca wutomi” niku ma nga tiyisa munhu a ku hundza lezvi hi zvi alakanyako. (Mav. 15:4, Sociedade Bíblica Portuguesa) Xana wa alakanya a zvilo zvo kari zva lisine ni zvo kongoma u nga dzundzako hi zvona wokari a wundlako vana yece?
Sentinela 01/04/09 paj. 31 par. 1
I Papayi wa lava va felweko hi papayi
‘A PAPAYI wa zvisiwana . . . i Nungungulu a nga lomu wuakelweni gakwe go basa’. (Lis. 68:5) A magezu lawa ma pimiselweko ma hi gondzisa zvilo zvo khumba mbilu hi Jehovha Nungungulu — wa khatala nguvhu hi zvilaveko zva zvisiwana. Lezvi a karatekisako zvona hi vanana lava va felweko hi papayi kutani mamani zva woneka khwatsi ka Nayo lowu Jehovha a nga nyika va Izrayeli. Wona khati go sangula laha a Bhibhiliya gi kumbukako a magezu ‘n’wanana wa cisiwana’ kutani n’wanana a felweko hi papayi. — Ekso. 22:22-24,
Murindzeli 01.23 paj. 19 par. 17
Jehovha wa ku vhuna ku zvi ku fambela khwatsi
17 Lera Lisimu 40:5. A kungo ga loyi a kandzihako citsunga ku chikela le mandembeleni ya cona. Hambulezvo, laha a kandzihako i kuma matshamu yo tala ya ku a nga nyima a ti buza hi ku wona zvilo zvo saseka. Hi ndlela yo fana, ti nyike cikhati ca ku nyima u ehleketa xungetano hi lezvi Jehovha a ku vhunisako zvona a ku u humelela hambu loku u kari u timisela cikarato. Kugumeseni ka siku gin’we ni gin’wani, ti wutise lezvi: ‘Ndzi wonile a makatekwa ya Jehovha nyamutlha hi ndlela muni? Hambu lezvi a cikarato leci ca ha simamako, Jehovha i ndzi vhunisa kuyini a ku ci timisela?’ Zama ku wona ndlela yin’we, hi wutsongwani ga kona, leyi Jehovha a ku vhunako hi yona lezvaku zvi ku fambela khwatsi.
Titshomba ta moya
Sentinela 01/06/06 paj. 10 par. 4
Timhaka-tshinya ta bhuku ga wumbiri ga Tisimu
68:18 — Ku wa hi vamani ‘a zvinyikiwo hi ka vanhu’? Ku wa hi vavanuna vo kari lava va nga mahiwa tikhumbi a cikhati leci a vaIzrayeli va nga teka a Tiko gi Tsumbisilweko, lava hi ndzhako ka cikhati va nga gumesa va yimisiwa kasi ku vhuna vaLevhi ka mitiro yabye. — Ezra 8:20.
29 KA JULHO–4 KA AGOSTO
TITSHOMBA TI NGA KA MHAKA YA NUNGUNGULU LISIMU 69
Zvilo muni zvi mahekileko wutomini ga Jesu zvi nga phrofetilwe ka Lisimu 69?
Murindzeli 01/08/11 paj. 13 par. 17
Va Wa Rindzela Messia
17 Messia i wa ta vengiwa handle ka nandzu. (Lis. 69:4) Mupostoli Johani i tshaha magezu ya Jesu yaku: “Loku ndzi wa nga tirangi cikari ka vona a mitiro leyi yi nga tiriwangiko hi mun’wani, ngha va nga hi na nandzu; makunu va yi wonile, va venga mina ni Dhadhani. Kanilezvi yi fela ku tatisekisa lezvo a mhaka leyi yi tsalilweko nayweni wabye, yaku: Va ndzi vengile mahala.” (Joh. 15:24, 25) A kutala ka zvikhati, a gezu ‘Nayo’ gi wula a Mitsalo yontlhe. (Joh. 10:34; 12:34) A tiIvhangeli ti komba lezvaku Jesu i wa vengiwa, nguvhunguvhu hi varangeli va wukhongeli ga ciJudha. Tlhatakumbiri, Kristu i te ngalo: “A tiko a gi zvi koti ku mu venga; kanilezvi mina ga ndzi venga, hakuva ndza kustumunya ha gona, lezvaku a mitiro ya gona yi bihile.” — Joh. 7:7
Sentinela 15/12/10 paj. 8 par. 7-8
Hisekela wukhozeli ga lisine
7 Kuve ni cimaho co kari ci kombisileko a kuhiseka ka hombe loku Jesu a nga hi nako. A cimaho leco ci mahekile kusanguleni ka ntiro wakwe wa laha misaveni, ka nguva ya Phasika ya 30 Nguveni ya Hina. Jesu ni vapizani vakwe va noya Jerusalema va ya wona lezvaku lomu tempeleni ku wa hi ni vanhu va nga “xavisa tihomu ni tiyivhu ni matuva . . . , ni vacicisi va mali na va hi matshan’wini yabye”. Zvini lezvi Jesu a nga maha niku lezvo zvi va khumbisile kuyini a vapizani vakwe? — Lera Johani 2:13-17.
8 Lezvi Jesu a zvi wulileko ni ku zvi maha ka ciyimo leco zvi mahile vapizani vakwe va alakanya magezu ma phrofetilweko ya lin’we la tisimu ta Dhavhidha, yaku: ‘A ku pangamela [ku ti tsitsiritela] a yindlu ya wena ku ndzi mitile’. (Lis. 69:9) Hikuyini? Hakuva lezvi Jesu a zvi mahileko zvi wa hi ni mhango nguvhu. A wuhosi ga lomu tempeleni — ku nga vapristi, ni vatsali ni van’wani — hi vona va nga maha ku ku mahiwa mabhindzu lomu tempeleni. Kasi ku polekisa ni ku tsemarisa lezvi va nga zvi maha, zvi wa lava ku Jesu a ti maha nala wa wukhongeli masikwini lawo. Kota lezvi a vapizani va zvi wonileko, a ku ti tsitsiritela a yindlu ya Nungungulu kutani ku hisekela a wukhozeli ga lisine, zvi wa woneka khwatsi. Kanilezvi, zvi wula yini a ku hiseka? Xana ku hambene ni cihatla?
Despertai! 95 10/22 paj. 31 par. 4
Xana a kukarateka mbilwini zva daya?
A vokari va wula lezvaku a kukarateka ka hombe loku Jesu Kristu a ku zwileko ku mahile ku afa. Ku wa phrofetilwe lezvi xungetano hi yena: ‘A kurukiwa ku pandzile mbilu ya mina, ya ndzi tikela’. (Lis. 69:20) A ku a magezu lawa ma fanele ku zwisisiwa hi ndlela yo kongoma? Kuzvilava ina, hakuva lezvi zvi mahekileko mahlweni ka ku afa zvi bayisile nguvhu — na ku nga hi hi tlhelo ga miri basi, kanilezvi ni ga kutizwa. (Mat. 27:46; Luka 22:44; Mah. 5:7) Ahandle ka lezvo, a kuva ku humele a “nkhata ni mati” a cikhati leci va nga mu tlhava andzhakunyana ka loku a file, zvi ngava zvi mahilwe hi kota ya lezvi a mbilu yakwe yi nga pandzekile. A kupandzeka ka mbilu kutani kuphewuka ka siha wa lisima wa mbilu zvi maha ku kuchululeka nkhata laha cifuveni kutani lahandle ka mbilu. Niku a ku tlhaviwa ka cin’we ca zvipandze lezvo ku nga maha ku ku huma “nkhata ni mati”. — Joh. 19:34.
Perspicaz vhol. 2 paj. 660
Sinya ya vhenene
Xungetano hi Mesiya, ku wa phrofetilwe lezvaku i wa ta nyikiwa a vhenene a ku zviva ‘zvakuga zvakwe’. (Lis. 69:21) Lezvo zvi mahekile a cikhati leci Jesu Kristu a nga nyikiwa a vhinyo yi nga patsilwe ni vhenene na a nga se belelwa laha mhandzeni ya hlomulo, kanilezvi a cikhati leci a nga yi ringa, Jesu i no ala kunwa a zvilo lezvo kuzvilava zvi nga mahelwa ku zvi hungula a kubayisa loku a nga kuzwa. A cikhati leci ku nga tsaliwa a kutatiseka ka ciphrofeto leco, Matewu (27:34) i tirisile a gezu ga ciGreki ga ku kho·lé (fel), a gezu galegi ga gin’we gi kumekako ka Septuaginta ga ciGreki ka Lisimu 69:21. Hambulezvo, a matimu ya Ivhangeli ya Marku ma wula ku i mira (Mar. 15:23), lezvo zvi vhuxa a maalakanyo ya ku a sinya leyo ya vhenene kutani “fel” ku wuliwa a “mira”. A cin’wani kambe, ku alakanyelwa lezvaku lomu ka vhinyo leyo ku wa hi ni mira ni fel.
Titshomba ta moya
Sentinela 15/01/99 paj. 18 par. 11
Tlakusa mandla yo tsumbeka hi mukhongelo
A vanhu vo tala va khongela kasi ku kombela basi, kanilezvi a lirandzo la hina hi Nungungulu li fanele ku hi kuca ku mu bonga ni ku mu dhumisa ka mikhongelo leyi hi yi mahako hoce kutani laha ko tala vanhu. Pawule i tsalile lezvi: “Mu nga karateki hi nchumu, kanilezvi timhakeni tontlhe tivisani Nungungulu zvontlhe lezvi zvi mu karatako hi ku kombela ni ku khongotela, na mu kari mu bonga; a kurula ka Nungungulu loku ku hundzako a kupima kontlhe, ku ta hlayisa a timbilu ta n’wina ni maalakanyo ya n’wina ha Kristu Jesu.” (Filp. 4:6, 7) Kunene, ahandle ka ku khongotela ni ku kombela, hi fanele ku tlhela hi bonga hi makatekwa ya moya ni ya nyama lawa a hi nyikako. (Mav. 10:22) A muyimbeleli wa Tisimu i yimbelele, aku: ‘Nyikela ka Nungungulu a miphahlo ya kubonga; u rihela zvifungo zva wena ka Loyi a Hundzeleleko Kutlakuka.’ (Lis. 50:14) Niku ka lisimu lo kari la mukhongelo, Dhavhidha i patsile magezu lawa yo khumba mbilu, yaku: ‘Ndzi ta dhumisa a vito ga Nungungulu hi lisimu, ndzi mu kulisa hi kukhesa.’ (Lis. 69:30) Xana hinawu a hi faneli ku maha zvo fana ka mikhongelo ya hina laha ko tala vanhu kutani loku hi hi hoce?
5-11 KA AGOSTO
TITSHOMBA TI NGA KA MHAKA YA NUNGUNGULU TISIMU 70-72
‘Leletela cizukulwana ci tako’ a ntamu wa Nungungulu
Sentinela 01/09/99 paj. 18 par. 17
Vaswa, tolovetani ku tirisa kupima ka n’wina!
17 Kasi ku pona a mitlhamu ya Sathani zvi ta lava ku mu tshama hi ku ti wonela — ka zvikhati zvin’wani zvi ta lava ni kutiya-hlanha ka hombe. Ka zvikhati zvo kari kuzvilava u ta tizwa na u kucetelwa ku maha zvo biha hi tiko gontlhe na ku nga hi vanhu va tanga ya wena basi. Dhavhidha, a muyimbeleli wa Tisimu, i khongele, aku: ‘U kutsumba ka mina, o Hosi Jehovha; ndzi ku tsumbile kusukela wusweni ga mina. Nungungulu, u ndzi gondzisile kusukela wusweni ga mina, kala lezvi ndza tlhatlhambutela a mitiro ya wena yi hlamalisako.’ (Lis. 71:5, 17) Dhavhidha i tiviwa hi kutiya-hlanha kakwe. Kanilezvi, i ku hlakulele rini? A cikhati leci a nga hi muswa! Hambu mahlweni ka ku alwa na Goliyate, Dhavhidha i wa sina a kombisile a kutiya-hlanha ka hombe kasi ku vhikela a mitlhambi ya papayi wakwe — a daya a nghala ni urso. (1 Sam. 17:34-37) Hambulezvo, Dhavhidha i yisile a wudzundzo gontlhe ka Jehovha hi kota ya kutiya-hlanha loku a vileko nako, a wula lezvaku Jehovha ‘kutsumba kakwe kusukela wusweni gakwe’. Lezvi Dhavhidha a nga tsumba Jehovha, Jehovha i mahile ku zvi mu fambela khwatsi loku a kumana ni zvikarato. Wenawu loku u tsumba Jehovha, i ta ku nyika kutiya-hlanha ni ntamu kasi ku ‘hlula tiko’. — 1 Joh. 5:4.
Despertai! 04 10/08 paj. 23 par. 3
Hi fanele ku va khomisa kuyini lava va khosaheleko?
A mutsali wa Tisimu i khongele, aku: ‘U nga ndzi hoxi cikhatini ca wukhosana, u nga ndzi tsiki laha wu mbhelileko a ntamu wa mina.’ (Lis. 71:9) Nungungulu a nga hoxi malandza yakwe yo tsumbeka hambu a cikhati leci wona wutsumbu ma alakanyako lezvaku a ma ha hi ya lisima niku a ma ha vhuni nchumu. A mutsali wa Tisimu i wa nga tizwi na a tsikilwe hi Jehovha, kanilezvi i wa zvi tiva lezvaku i wa fanele ku simama a tsumba nguvhu a Muvangi wakwe laha a ngaya a khosahala. Jehovha wa ku nyika lisima a kutsumbeka loko hi ku ma nyika ntamu a malandza yakwe wutomini gabye gontlhe. (Lis. 18:25) A kutala ka zvikhati a ntamu lowo hi wu kuma ka vamakabye.
Murindzeli 15/01/14 paj. 23 par. 4-5
Tirela Jehovha na ma nga se chikela a masiku ya zvikarato
4 Loku u hi ni makume ya malembe kota munhu wo buvha a kulileko, u fanele ku ti maha ciwutiso leci ca lisima: ‘Ndzi ta maha yini hi wutomi ga mina ka cikhati leci, na ndza ha hi ni ntan’wanyana mirini wa mina ke?’ Kota muKristu a buvhileko, u na ni malungelo yaku a van’wani a va nawo. U nga gondzisa lava va ha hiko vaswa lezvi u nga zvi gondza ka Jehovha. U nga tiyisa van’wani hi ku va hlawutela matshango lawa u vileko nawo a cikhati leci u nga tirela Nungungulu. Hosi Dhavhidha i wa khongelela ku maha lezvo. I lo tsala aku: “Nungungulu, u ndzi gondzisile kusukela wusweni ga mina . . . Nungungulu, u nga ndzi tsiki laha na ndzi khosahele, ndziva ni wuvhu; kala ndzi leletela hi woko ga wena a ka cizukulwana ci tako, ni ntamu wa wena ka vontlhe lava va ha tako.” — Lis. 71:17, 18.
5 U nga gi tivekisisa kuyini a wutlhari legi u gi hlengeletileko ka malembe yo tala? Xana a wu nge rambi a malandza ya Nungungulu ma ha hiko vaswa mutini wa wena lezvaku mu ta bhula hi zvilo zvi akako? A wu nge va rambi lezvaku mu famba zvin’we ntirweni wa simu u tlhela u va komba litsako u li kumako hi ku tirela Jehovha ke? Elihu wa cikhatini leco i te ngalo: “A masiku ma ta wulawula, ni wunyingi ga malembe gi wa ta hi gondzisa wutlhari.” (Joba 32:7) Mupostoli Pawule i lo khongotela a vavasati va maKristu va buvhileko lezvaku va kuca van’wani hi magezu ni mitiro. I lo tsala lezvi: ‘A vavasati va kale a vave vagondzisi va lezvi zva zvi nene.’ — Tit. 2:3.
Titshomba ta moya
Perspicaz vhol. 1 paj. 892
Ewufrate
Mbhingano wa cipandze leci ci nga nyikilwe a vaIzrayeli. Ka magezu lawa Nungungulu a byelileko Abrahama, i no hlambanya a ku nyika a pswalo wa Abrahama a tiko ‘kusukela congweni wa le Gibhite kala gi chikela a congweni wa hombe, wona congo wa Ewufrate’. (Gen. 15:18) A citsumbiso leci ci no tlhela ci phindiwa ka tiko ga Izrayeli. (Ekso. 23:31; Deut. 1:7, 8; 11:24; Jox. 1:4) Kronekele wo sangula 5:9 i wula lezvaku a vanhu vo kari va pswalo wa Rubheni, mahlweni ka kufuma ka Dhavhidha, va no engetela a wutshamu gabye kusukela ‘le ciwuleni ku ya chikela le congweni wa Ewufrate’. Hambulezvo, kota lezvi a congo wa Ewufrate wu kumekako ka pfhuka wa 800 wa tikilometro loku u cuwuka ‘Mutsuwuka-gambo wa tiko ga Gileyadhe’ (1 Kro. 5:10), lezvo kuzvilava zvi wula basi ku a va ka Rubheni va no engetela a wutshamu gabye hi tlhelo ga mutsuwuka-gambo kusuhani ni ciwula ca Siriya, ci fambako kala Ewufrate. (A CBC gi wula lezvi: “Kala laha nyangweni ya ciwula, ci fambako kala Ewufrate”; A BJ gi wula lezvi: “Gi wa sukela ciwuleni kala congweni wa Ewufrate”.) Lezvo zvi komba ku a citsumbiso ca Jehovha ci tatisekile hi kumbhelela hi khati go sangula mufun’weni wa Dhavhidha ni wa Solomoni, a cikhati leci a mimbhingano ya tiko ga Izrayeli yi nga engetelwa kasi yi patsa ni tiko ga hosi ya le Zobha, a muAramu, hi ndlela leyo yi kala yi chikela timbhirini ta Ewufrate, kuzvilava hi cipandze leci ci tsemakanyako n’walungu wa Siriya. (2 Sam. 8:3; 1 Tih. 4:21; 1 Kro. 18:3-8; 2 Kro. 9:26) Hi kota ya lezvi a Congo wa Ewufrate wu nga tiveka nguvhu, a kutala ka zvikhati wu wa vitaniwa basi ku i “Congo”. — Jox. 24:2, 15; Lis. 72:8.
12-18 KA AGOSTO
TITSHOMBA TI NGA KA MHAKA YA NUNGUNGULU TISIMU 73-74
Xana hi na ni ciluse hi lava va nga tireliko Jehovha?
Murindzeli 12.20 paj. 19 par. 14
Jehovha wa tiyisa lava va mbhelileko ntamu
14 A Lisimu 73 li tsalilwe hi muLevhi wo kari. Kota muLevhi, i wa hi ni thomo ga ku tira lomu Jehovha a nga khozelwa kona. Hambulezvo, kuve ni cikhati wutomini gakwe a nga mbhelile ntamu! Cini ci nga mu mbheta ntamu? I no sangula ku navela wutomi ga vakubiha. I wa nga naveli wubihi legi va nga kari va gi maha. Kanilezvi, hi ku va wa wonekisa ku khwatsi va hanya khwatsi. (Lis. 73:2-9, 11-14) I wa va wonisa ku khwatsi va le paradhiseni — va ganyile, va hanya wutomi ga gi nene, ne a va karateki hi nchumu. Laha a muLevhi loye a nga wona lezvo, i no karateka nguvhu laha ka kuza aku: ‘Hakunene, ndzi basisile a mbilu ya mina mahala, ndzi hlamba mandla ya mina na ndzi nga hi na nandzu.’ Zva dlunyateka a ku i wa hi mhangweni ya ku tsika ku tirela Jehovha.
Murindzeli 12.20 paj. 19-20 par. 15-16
Jehovha wa tiyisa lava va mbhelileko ntamu
15 Lera Lisimu 73:16-19, 22-25. A muLevhi loyi i noya ‘wutshan’wini ga kubasa ga Nungungulu’. Laha a nga hi lomu ndlwini ya Nungungulu, cikari ka vakhozeli-kuloni, zvi wa koteka ku ava ni kurula, a nyima a ku tse, a pimisa khwatsi a tlhela a khongela hi ciyimo cakwe. Lezvo zvi mu vhunile ku wona ku a maalakanyo yakwe ma wa mu kokela ka zva hava. A wona ku i wa sangulile ku famba hi ndlela yi nga mu yisa mhangweni ya ku a hambana na Jehovha. I tlhelile a pola lezvaku a vakubiha va le ‘matshan’wini ya ku retemuka’, niku va ta lovisiwa va ku bhi. Kasi a muLevhi loyi a nga naveli wutomi ga vakubiha a tlhela a nga mbheli ntamu, zvi lavile ku a wona zvilo hi mawonela ya Jehovha. Lezvo zvi mu vhunile ku a kuma kurula kambe a tlhela a tsaka. I wulile lezvi: ‘Loku ndzi hi na [Jehovha] a ndzi naveli nchumu misaveni.’
16 Lezvi hi gondzako: Hi nga tshuki hi navela wutomi ga vakubiha va wonekisako ku khwatsi va hanya khwatsi. A litsako labye a hi la lisine, li nga ta tshanelwa hi gambo, niku va nga ta hanya kala kupindzuka. (Mutsh. 8:12, 13) A ku navela wutomi gabye, ku ti nehela kukarateka ni ku ti kokela livhundzi hi tlhelo ga moya. Hikwalaho, loku u tshuka u navela wutomi ga vakubiha va wonekisako ku khwatsi zvi va fambela khwatsi, maha lezvi a nga maha a muLevhi loyi. Ingisa wusungukati ga Nungungulu ga lirandzo u tlhela u ti patsa ni van’wani va mahako kurandza ka Jehovha. Loku u randza Jehovha a ku hundza zvontlhe, u tava ni litsako la lisine u tlhela uva ndleleni ya ku kuma “wutomi legi hakunene gi nga wutomi.” — 1 Tim. 6:19.
Murindzeli 15/04/14 paj. 4 par. 5
Pimanyisa a kukholwa ka Mosi
5 U nga alisa kuyini a “litsako la kuwonha ka cikhatanyana”? U nga rivali lezvaku a litsako la kuwonha nja cikhatanyana. Hi mahlo ya kukholwa, wona lezvaku “a tiko ga hundza, ni kunavela ka gona.” (1 Joh. 2:15-17) Ehleketa hi wumandziko ga vawonhi va nga ti soliko. Va ‘matshan’wini ya kuretemuka; va ta lobyiswa hi citshuketi!’ (Lis. 73:18, 19) A cikhati leci u ringwako ku maha zva kubiha, ti wutisi lezvi: ‘Xana ndzi lava ku va munhu wa kuyini cikhatini ci tako ke?’
Murindzeli 15/02/13 paj. 25-26 par. 3-5
U nga tsiki nchumu wu ku tsandzekisa ku kuma wudzundzo
3 A mutsali wa tisimu i kombile lezvaku i wa tsumba lezvaku Jehovha i wa ta mu khoma hi canja gakwe ga cinene a tlhela a mu yisa kungangameleni ka lisine. (Gondza Lisimu 73:23, 24.) Xana Jehovha i zvi mahisa kuyini lezvo? Jehovha i yisa kungangameleni a malandza yakwe ya kutikoramisa hi ku ma nyika wudzundzo hi tindlela to hambanahambana. I va katekisa hi ku va vhuna ku zwisisa a kungo gakwe. (1 Kor. 2:7) Lava va zwako a mhaka yakwe va tlhela va mu ingisa i va nyika wudzundzo ga kuva ni kuzwanana ka hombe naye. — Jak. 4:8.
4 Jehovha i nyika malandza yakwe kambe a tshomba yo ngangamela — ku ga wutireli ga wuKristu. (2 Kor. 4:1, 7) Niku a wutireli legi gi yisa kungangameleni. Ka lava va tirisako a lungelo gabye ga ku tirela Nungungulu kasi ku mu dhumisa ni ku vhuna van’wani, Jehovha i tsumbisa lezvi: “Ndzi ta dzundza lava va ndzi dzundzako.” (1 Sam. 2:30) A vanhu lavo va na ni wudzundzo hakuva va na ni vito gi nene mahlweni ka Jehovha, niku va tolovela kuva vanhu vo dzundzeka cikari ka malandza man’wani ya Nungungulu. — Mav. 11:16; 22:1.
5 Ahati lava va ‘rindzelako Jehovha, va hlayisa a ndlela yakwe’ ke, va ta kuma yini? Va tsumbiswa lezvi: “[Jehovha] i ta ku yimisa kasi wa fumela tiko; u ta wona a kulobyiswa ka lava vo biha.” (Lis. 37:34) Va rindzela hi mahlo yo pswhuka a ku amukela wutomi ga pindzukelwa. — Lis. 37:29.
Titshomba ta moya
Perspicaz vhol. 2 paj. 222
Levhiyatani
A Lisimu 74 li tlhamusela a mitiro ya Nungungulu ya ku hanyisa vanhu vakwe niku a mavhesi 13 ni 14 ma wulawula hi lezvi Jehovha a nga tlhatlhisisa zvona a vanhu vakwe le Gibhite hi ndlela yo fananisa. Ka mavhesi lawa, a gezu ga ciHebheru gi hundzuluselweko ku ‘zvihari zvo tshisa zva lomu bimbini [ciHebheru: than·ni·ním, ku nga plurali ya tan·nín]’ ga tirisiwa kasi ku wula a “Levhiyatani”, niku a ku chindziwa ka tihloko ta Levhiyatani zvi nga wula khwatsi a kulovisiwa ka Faro ni butho gakwe a cikhati leci a vaIzrayeli va nga huma hi Gibhite. A mabhuku ya kale ya ciAramaiko laha ka mhaka leyi ma wula ku “tinhenha ta Faro” na ku nga hi “tihloko ta Levhiyatani”. (Wona Ezek. 29:3-5, laha Faro a fananisiwako ni ‘cihari co tshisa ca lomu bimbini’, ci nga mbhirini ya congo wa Nilo; na Ezek. 32:2.) Zvi wonekisa ku khwatsi Isaya 27:1 i tirisa gezu Levhiyatani (LXX: “dragawu”) kota cifananiso ca mufumo wo kari, ku nga hlengeletano ya misava yontlhe yi rangelwako hi munhu a vitaniwako kota “nyoka” ni “dragawu”. (Kuv. 12:9) A ka vaIzrayeli, a ciphrofeto leci ci wulawula hi kuwuyiselwa tikweni gabye, niku a ku Jehovha a ‘tsayisa Levhiyatani’ zvi patsa Bhabhuloni. Kanilezvi a mavhesi 12 ni 13 ma wulawula kambe hi Asiriya ni Gibhite. Makunu laha, a Levhiyatani kuzvilava ku wuliwa a hlengeletano yo kari, kutani mufumo wa misava yontlhe wu vhukelako Jehovha ni vakhozeli vakwe.
19-25 KA AGOSTO
TITSHOMBA TI NGA KA MHAKA YA NUNGUNGULU TISIMU 75-77
Hikuyini hi nga faneliko ku ti kulisa?
Murindzeli 01.18 paj. 28 par. 4-5
Wona kuhambana cikari ka vanhu
4 Andzhako ka ku wula lezvaku a vanhu vo tala va ta ti randza wutsumbu va tlhela va randza mali, Pawule i gumile aku va tava ni matshandza, ni manyanga, va tlhela va ti kukumukisa. A vanhu va nga ni matshamela lawo va tala ku ti wona na va hi va chukwana ku hundza van’wani hi kota ya matshamela yabye, lezvi va mahako, lezvi va nga nazvo, kutani ciyimo cabye ca wutomi. A vanhu lavo va zvi randza nguvhu ku hlamaliwa hi van’wani. A tlhari yo kari yi tsalile lezvi xungetano hi munhu wa tshamela lego: “Lomu ndzeni ka mbilu yakwe ku na ni cialatana a khizamako ka cona a ti khozela.” A vokari ve a matshandza ma bihile nguvhu laha ka kuza lava va nga nawo va nga tsaki loku va ma wona ka mun’wani.
5 Jehovha wa ma venga matshandza, lawa a Bhibhiliya gi nge i “mahlo ya matshandza”. (Mav. 6:16, 17) A matshandza ma maha munhu a hambana nguvhu na Nungungulu. (Lis. 10:4) A kutikukumukisa i tshamela ga Sathani. (1 Tim. 3:6) A co biha hi ku hambu malandza yo kari ya Jehovha ma tshuka ma thapelwa hi matshandza. Hi cikombiso, Hosi Uziya wa le Judha ive munhu wo tsumbeka hi malembe yo tala. Kanilezvi a Bhibhiliya gi ngalo: “Laha a nga wa hi ni ntamu, a mbilu yakwe yi no ti kukumukisa kala a huma zvineneni; i no wonhela Jehovha Nungungulu wakwe.” Uziya i nghenile tempeleni a hisa libani, kasi lezvo i wa nga hi na fanelo yo maha lezvo. Hi kufamba ka cikhati, Hosi Hezekiya yenawu ive ni matshandza, hambu lezvi zvi ngava zva cikhatanyana. — 2 Kro. 26:16; 32:25, 26.
Sentinela 15/07/06 paj. 11 par. 2
Timhaka-tshinya ta bhuku ga wunharu ni ga wumune ga Tisimu
75:4, 5, 10 — Gi wula yini a gezu “limhondzo”? A limhondzo la cihari i tlhari ga cona ga ntamu nguvhu. Hikwalaho, a gezu “limhondzo” gi yimela ntamu. Jehovha i ‘tlakusa limhondzo la vanhu vakwe’, a va kulisa a cikhati leci a tsemako a ‘timhondzo ta lava va kubiha’. Hi tlharihisiwa ku hi nga tlakusi limhondzo la hina, zvi wulako ku hi ngavi ni matshandza. Kota lezvi ka ku hi Jehovha a ‘tlakusako’, a zviavelo ni wutihlamuleli lomu bandleni zvi fanele ku woniwa na zvita hi ka yena. — Lis. 75:7.
Titshomba ta moya
Sentinela 15/07/06 paj. 11 par. 3
Timhaka-tshinya ta bhuku ga wunharu ni ga wumune ga Tisimu
76:10 — A “zanga ya munhu” yi mu dhumisisa kuyini Jehovha? A cikhati leci Jehovha a tsikako vanhu va kombisa zanga yabye hi hina hi kota ya lezvi hi nga malandza yakwe, zvi maha lezvaku ku maheka a zvilo zva zvinene. Ni kwihi kuxaniseka loku hi nga kumanako nako, ku nga hi gondzisa cokari. Jehovha o vhumelela ntsena ku hi xaniseka kala laha a kuxaniseka loko ku hi mahako hi gondza cokari. (1 Ped. 5:10) ‘A cipandze leci cin’wani ca zanga ya munhu, Jehovha o ci ambala.’ Makunu loku hi xaniseka kala hifa ke? Lezvo zvonawu zvi nga dhumisa Jehovha, hakuva lava va wonako a kutimisela ka hina ko tsumbeka vonawu va nga dhumisa Nungungulu.
26 KA AGOSTO–1 KA SETEMBRO
TITSHOMBA TI NGA KA MHAKA YA NUNGUNGULU LISIMU 78
A kungatsumbeki ka vaIzrayeli citlharihiso ka hina
Sentinela 01/12/96 paj. 29-30
“Akakanyani lezvi zvi mahekileko cikhatini ci nga hundza” — hikuyini?
A ya hava hi ku a vaIzrayeli a kutala ka zvikhati va wa tala ku rivakelwa. Gi ve gihi a wuyelo ga kona? ‘Va no engeta va ringa Nungungulu, va tsan’wisa Wakubasa wa Izrayeli. A va alakanyangi lezvi a va tireleko, hi siku legi a nga va tlhatlhisa valaleni.’ (Lis. 78:41, 42) Va no gumesa hi ku Jehovha a va tsika hi kota ya lezvi va nga rivakelwa a zvileletelo zvakwe. — Mat. 21:42, 43.
A cikombiso ca cinene hi vekelwe hi mutsali wa Tisimu loyi a nga tsala, aku: ‘Ndzi ta zwata a mitiro ya Jehovha; ina, ndzi ta alakanya a zvirewukiso zva wena zva kaleloko. Ndzi ta ehleketa hi mitiro ya wena yontlhe, ndzi alakanyela hi zvimaho zva wena.’ (Lis. 77:11, 12) Loku hi ehleketa hi ntiro wa hina wo tsumbeka lowu hi maheleko Jehovha ka masiku ma hundzileko, ni lirandzo li nga mbheliko la Jehovha zva hi kuca, zvi hi tiyisa, zvi tlhela zvi maha ku hi bonga. Ahandle ka lezvo, loku hi ‘alakanya hi lezvi zvi hundzileko’ zvi nga maha ku hi nga karali, kanilezvi hi kuma ntamu wa ku maha zvontlhe hi zvi kotako hi tlhela hi timisela na hi tsumbekile.
Sentinela 15/07/06 paj. 17 par. 16
‘Mu nga nguranguri’
16 A kungurangura ku maha ku hi veka nguvhu kupima ka hina wutsumbu ni ka zvikarato zva hina, hi nga woni makatekwa lawa hi ma kumako hi kuva Vakustumunyu va Jehovha. Kasi ku hlula moya lowo, contlhe cikhati hi fanele ku alakanya makatekwa lawa hi nga nawo. Hi cikombiso, a mun’we ni mun’wani wa hina i na ni thomo ga ku vitaniwa hi vito ga Jehovha. (Isa. 43:10) Hi ngava ni wunghana ga hombe na Jehovha hi tlhela hi bhula ni “muzwe wa mukhongelo” contlhe cikhati. (Lis. 65:2; Jak. 4:8) Hi hanyela ca ku ci tiva, hakuva ha yi zwisisa a mhaka leyi yi vhukileko le tilweni ya ku phikiziwa ka wuhosi ga Jehovha niku ha zvi zwisisa lezvaku i thomo a ku hi tsumbeka ka Nungungulu. (Mav. 27:11) Hi nga patseka hi kukhandzakanya ntirweni wa kuchumayela mahungu ya manene ya Mufumo. (Mat. 24:14) A kukholwa ka hina ka muphahlo wa Jesu Kristu ku maha ku hiva ni livhalo li basileko. (Joh. 3:16) Hi na ni makatekwa lawo hambu loku hi timisela cikarato co tshamisa kuyini.
Sentinela 01/07/11 paj. 10 par. 3-4
Jehovha i na ni kutizwa?
A muyimbeleli wa Tisimu i te: ‘Zvikhati zvingani va nga mu hluwukela ciwuleni’! (Vhesi 40) A vhesi gi landzelako gi engetela giku: ‘Va lo engeta va ringa Nungungulu’. (Vhesi 41) Wona lezvaku a mutsali loyi i wula ku va wa wonha hi ku phindaphinda. Niku a zvi tekangi cikhati co leha kasi va sangula ku maha zvilo lezvo zvakubiha. Va sangulile kuhluwuka le ciwuleni, neti va nga tlhatlhisiwa Gibhite. A vanhu va no sangula ku ngurangura, va wutisa ku Nungungulu i wa ta va khatalela niku i wa zvi lava ku maha lezvo futsi ke. (Mitse. 14:1-4) A bhuku go kari gi tirisiwako hi vahundzuluseli va Bhibhiliya gi wula lezvaku a magezu ‘va mu hluwukele’ ma nga “hundzuluselwa kambe ma wula ku ‘va nonohisile timbilu tabye ka Nungungulu’ kutani ku ‘va byelile Nungungulu aku “Ahihi”.’” Hambulezvo, hi kota ya wuxinji, Jehovha i wa tsetselela a vanhu vakwe loku va kombisa kutisola. Kanilezvi, va wa tlhela va phinda zvalezvi zva zvin’we va hluwukela Jehovha, zvi simamisa zvezvo. — Lis. 78:10-19, 38.
Jehovha i wa ti zwisa kuyini a khati ni khati a vaIzrayeli va nga mu hluwukela? A vhesi 40 gi ngalo: ‘Va wa mu zwisa kubayisa’. A Bhibhiliya gin’wani gi zvi wulisa ku va wa mu “zangarisa”. A bhuku go kari ga ku tlhamusela Bhibhiliya gi wula lezvi: “Laha a mongo wu komba ku lezvi a vaHebheru va nga zvi maha zvi wa ku khwatsi vo maha ha womu kasi ku zwisa kubayisa, a ku khwatsi hi lezvi a n’wana wo kala ku ingisa ni wo hluwuka a mahako.” A ku fana ni lezvi a n’wana wa ku phungela a va zwisako kubayisa ka hombe a vapswali vakwe, a vaIzrayeli vo hluwuka ‘va wa tsan’wisa Wakubasa wa Izrayeli’. — Vhesi 41.
Titshomba ta moya
Sentinela 15/07/06 paj. 11 par. 4
Timhaka-tshinya ta bhuku ga wunharu ni ga wumune ga Tisimu
78:24, 25 — Hikuyini a mana ma nga vitaniwa ku “mavele ya tilo” niku ‘zvibaba zva tingilozi’? Lezvo a zvi wuli ku a mana ma wa hi zvakuga zva tingilozi. Ma wa hi “mavele ya tilo” hakuva ma wata hi le tilweni. (Lis. 105:40) Kota lezvi a tingilozi, kutani “zvivangwa zva ntamu”, ti tshamako le tilweni, a magezu ‘zvibaba zva tingilozi’ kuzvilava ma wula basi ku a mana ma wata hi ka Nungungulu, loyi a tshamako le tilweni. (Lis. 11:4) Niku kuzvilava Jehovha i tirisile a tingilozi kasi ti nyikela mana ka vaIzrayeli.