Timhaka ta mabhuku ma tako ka Cibhukwana ca Mutlhangano

© 2024 Watch Tower Bible and Tract Society of Pennsylvania

6-12 KA JANEIRO

TITSHOMBA TI NGA KA MHAKA YA NUNGUNGULU TISIMU 127-134

Vapswali, simamani ku khatalela a tshomba ya n’wina ya lisima

Murindzeli 08.21 paj. 5 par. 9

Maha zvontlhe u zvi kotako kasi u nga humi ngangweni wa Jehovha

⁹ Jehovha i vangile vanhu hi ndlela ya ku zvi koteka ku va pswala vana a tlhela a va nyika ntiro wa ku gondzisa vana lavo a ku randza Jehovha ni ku mu tirela. Loku u hi mupswali, wa ci nyika lisima a cinyikiwo leci ke? Hambu lezvi Jehovha a ti nyikileko wutlhari go tala a tingilozi, a nga ti vangangi hi ndlela ya ku ti zvi kota ku ti pswala vana. Hi cigelo leco, loku u hi mupswali, gi bonge nguvhu a thomo legi Jehovha a ku nyikileko ga ku wundla vana. A vapswali va nyikilwe ntiro wa lisima nguvhu wa ku wundla vana vabye “ni ku va gondzisa hi milayo ya Jehovha.” (Efe. 6:4; Dhewu. 6:5-7; Lis. 127:3) A hlengeletano ya Nungungulu yi humesa mahungu yo tala nguvhu ma seketelwako ka Bhibhiliya kasi ku vhuna vapswali a ku gondzisa vana vabye. A mahungu lawo hi ma kuma ka mabhuku, marevhista, mabroxura, tivhidhio, mimuzka, ni lomu ka saite ya hina. Zva dlunyateka ku Papayi wa hina wa le tilweni ni N’wana wakwe va va nyika nguvhu lisima a vanana. (Luka 18:15-17) Jehovha wa tsaka loku a vapswali va tsumba yena va tlhela va maha zvontlhe va zvi kotako kasi ku wundla vana vabye. Loku a vapswali va maha lezvo, va va vhululela ndlela a vana vabye ya ku va lumba ngango wa Jehovha kala kupindzuka!

Murindzeli 12.19 paj. 27 par. 20

Vapswali, gondzisani vana va n’wina a ku randza Jehovha

²⁰ Va tive khwatsi a vana va wena. A Lisimu 127 li fananisa a vanana ni mipaxa. (Lera Lisimu 127.) Kota lezvi a mipaxa yi nga mahiwako hi zvilo zvo hambanahambana lezvo kambe na yi hambene ku leha, ni vanana vonawu va hambene. Hikwalaho a vapswali va fanele ku bhula lezvi va to mu gondzisisa zvona a n’wana mun’we ni mun’wani. A patswa wo kari le Izrayeli wa masikwini ya hina lowu wu gondzisileko vana vabye a ku tirela Jehovha, wa hi tshandzela lezvi zvi va vhunileko: “Hi wa hambanisa vanana a cikhati leci hi nga va fambisela cigondzo ca Bhibhiliya.” Hambulezvo, a hloko ya ngango wun’we ni wun’wani yi fanele ku boha lezvaku a ku gondzisa vanana hi ndlela leyi zva laveka kutani zva koteka ke.

Titshomba ta moya

Perspicaz vhol. 1 paj. 543

Tisinya ta lomu ka Bhibhiliya

A muyimbeleli wo kari wa tisimu ta Bhibhiliya i kumbukile a matshamela yo kari ya olivha a cikhati leci a nga tsumbisa lava va chavako Jehovha, aku: “A vana va wena va ta ku khwatsi zvidhavana zva olivha zvi rendzelekeleko a meza ya wena.” (Lis. 128:1-3) A zvidhavana zvi tsemilweko zva olivha wu kulileko a kutala ka zvikhati zvi tiriselwa ku byala yin’wani miolivha. Ahandle ka lezvo, lomu ka miolivha ya hombe ku nga hluka zvidhavana hi lomu ka timitsu ta kona, lezvi zvi mahako ku a olivha wu hanya cikhati co leha. A ku khwatsi hi zvidhavana lezvo, a vanana va randzela papayi wabye va maha cipandze cabye kasi kuva ni litsako laha ngangweni.

13-19 KA JANEIRO

TITSHOMBA TI NGA KA MHAKA YA NUNGUNGULU TISIMU 135-137

“A Hosi ya hina ya hombe a ku hundza a vanungungulu vontlhe lava van’wani”

Perspicaz vhol. 2 paj. 666 par. 3-4

Ntamu, mitiro ya ntamu

Nungungulu i rangela mitamu ya ntumbuluko. Kasi ku komba lezvaku i Nungungulu wa lisine, kuzvilava ku wa ta rindzelwa lezvaku Jehovha a rangela a mitamu ya ntumbuluko a zvi maha hi ndlela ya ku a vito gakwe gi yelana ni lezvo. (Lis. 135:5, 6) Kota lezvi a gambo, ni hweti, ni maplaneta, ni tinyeleti zvi landzelako zvalezvi zvi sinako zvi vekisilwe zvona; kota lezvi a matshamela ya atmosfera ya laha misaveni (lawa ma mahako ku kuva ni moya, ni vhula, ni zvin’wani) ma landzelako milayo leyi ma yi rangelako; kota lezvi a zvidodwani zvi mahako mitlawa ya talela ni lezvi a zvinyanyani zvi yako ka matiko man’wani, a zvilo lezvi zvontlhe ni zvin’wani zvi wa nga ta enela kasi ku basisa a vito ga Nungungulu ka lava va gi vhukelako ni ka wukhozeli ga mawunwa.

Hambulezvo, ahandle ka lezvi a zvilo lezvi zvi mahako, Jehovha Nungungulu i mahile ku a zvivangwa ni zvilo zva ntumbuluko zvi nyika wukustumunyu ga wuNungungulu gakwe hi ku zvi tirisa kasi ku tatisa makungo yakwe yo kongoma ka zvikhati zvo kari a nga zvi yimisile. Hambu loku a zviyimo zvo kota cihala, cingulo ni zviyimo zvin’wani zvo khwatsi hi lezvo zvi nga hambani ni lezvi zvi nga tolovelekile, a ku tatisa ka zvona a zviphrofeto zva Jehovha ku wa zvi hambanisa ni lezvi zvin’wani. (Fananisa lezvo na 1 Tih. 17:1; 18:1, 2, 41-45.) Kanilezvi a kutala ka zvikhati, a zviyimo lezvo zvi wa hambana nguvhu ni lezvi zvi nga tolovelekile, ku ngava hi kukula ka zvona ni cikhati leci zvi nga teka (Ekso. 9:24), kutani hi ndlela yo kala ku toloveleka leyi zvi nga maheka hi yona ya ku zvi wa nga se tshuka zvi mahekisa lezvo, kutani hi nguva ya ku zvi wa nga maheki. — Ekso. 34:10; 1 Sam. 12:16-18.

Murindzeli 11.21 paj. 6 par. 16

U vhunekisa kuyini hi lirandzo li nga mbheliko la Jehovha?

¹⁶ Loku hi kholwa ku Jehovha i ta hi vhikela, a hi chavi nchumu. Hambulezvo, ku ta tshuka kuva ni masiku lawa hi mbhelako ntamu, zvi tlhela zvi hi karatela ku zvi hlula. Ka zvikhati lezvo, zvini a to hi mahela Jehovha? (Lera Lisimu 136:23.) I ta hi tlhateka mawokweni yakwe, a hi tlakusa khwatsanyana, a hi vhuna ku suka hi yima. (Lis. 28:9; 94:18) Hi vhunekisa kuyini? A ku tiva lezvaku contlhe cikhati Nungungulu i na hina, zvi hi vhuna hi tindlela timbiri. Yo sangula, ni kwihi laha hi nga kona, ha zvi tiva ku contlhe cikhati Jehovha i ta hi vhikela. Ya wumbiri, a Papayi wa hina wa lirandzo wa hi hlayisa khwatsi.

Titshomba ta moya

Perspicaz vhol. 2 paj. 15

Jah

A gezu Jah, gi yelana nguvhu ni kutizwa ka hombe ka ku dhumisa ni ku yimbelela, ni ku khongela, ni ku khongotela, ni ku a kutala ka zvikhati gi kumeka ka zviyimo lezvi a hloko ya mhaka ku nga kutsaka ka hombe ku vangiwako hi kuhlula ni kutlhatlhisiwa, kutani ka zviyimo lezvi a munhu a zwisisako lezvaku i vhunilwe hi canja ga ntamu ga Nungungulu ni ntamu wa Nungungulu. A zvikombiso zva lezvo zvi tele nguvhu. A magezu: “Dhumisani Jah!” (Haleluya!) ma kumeka lomu ka Tisimu kota magezu ya ku dhumisa Nungungulu niku ma kumeka hi khati go sangula ka Lisimu 104:35. Ka tisimu tin’wani, ma kumeka ntsena kusanguleni (Lis. 111, 112), ka zvikhati zvin’wani lomu cikari ka lisimu (135:3), ka zvin’wani zvikhati le magumo basi (Lis. 104, 105, 115-117), hambulezvo a kutala ka zvikhati ma kumeka kusanguleni ni magumo (Lis. 106, 113, 135, 146-150). Ka bhuku ga Kuvhululelwa, a zvivangwa zva le tilweni zvi phindaphindile ku dhumisa Jehovha hi magezu lawa. — Kuv. 19:1-6.

A makhati lawa man’wani ku kumekako a gezu “Jah” gi dhumisa Jehovha lomu ka tisimu ni mikhongelo. A gezu Jah ga kumeka ka lisimu la kutlhatlhisa li yimbelelweko hi Mosi. (Ekso. 15:2) Lomu ka bhuku ga Isaya ku khanyisiwa hi ku patsa a gezu “Jah ni Jehovha” laha ka kun’we. (Isa. 12:2; 26:4) Andzhako ka loku Hezekiya a hanyisilwe hi cihlamaliso a cikhati a nga babya zva mahati, ka magezu yakwe yo sasekiselwa ya ku tsaka, i no komba lezvi a nga ti zwisa zvona hi ku phindaphinda gezu Jah. (Isa. 38:9, 11) Ku kombiwa kuhambana ku nga kona cikari ka vafileko lava va kalako va nga dhumisi Jah ni lava va ti yimiseleko ku hanya wutomi ga ku mu dhumisa. (Lis. 115:17, 18; 118:17-19) A tin’wani tisimu ti komba kubonga hi mukhongelo hi kota ya kutlhatlhisiwa ni kuvhikelwa ni ku kawukiwa. — Lis. 94:12; 118:5, 14.

20-26 KA JANEIRO

TITSHOMBA TI NGA KA MHAKA YA NUNGUNGULU TISIMU 138-139

U nga tsiki kuchava ku ku tlhelisela ndzhako

Murindzeli 01.19 paj. 10 par. 10

Dhumisa Jehovha lomu bandleni

¹⁰ Khati ni khati u pimisako ku tlakusa woko u hlamula, xana u ya hi ku woma hi ku chava? Loku u ti zwisa lezvo, a hi wena wece. A lisine hi ku hontlheni ha chavanyana loku hi hlamula. Kasi ku hlula cikarato leco, u fanele ku ranga hi ku pola leci u ci chavako. Ku ngava lezvaku u chava ku rivakelwa lezvi u lavako ku wula, kutani u chava ku phazama ke? U chava ku a hlamulo wa wena wu ngavi wu nene a ku fana ni ya van’wani? Hi lisine, a kuchava loko ku nene. Ku komba lezvaku u munhu wo ti koramisa niku u wona van’wani va hi chukwana ku hundza wena. Jehovha wa gi randza tshamela legi ga kutikoramisa. (Lis. 138:6; Filp. 2:3) Hambulezvo, i lava lezvaku u mu dhumisa u tlhela u tiyisa vamakabye va wena mitlhanganweni. (1 Tes. 5:11) Phela Jehovha wa ku randza, niku i ta ku tiyisa hlanha kasi u hlamula.

Murindzeli 04.23 paj. 21 par. 7

⁷ Kuzvilava zvi nga ku vhuna a ku vhuxeta mawonela yo kari ma humesilweko ka marevhista A Murindzeli. A gin’we ga mawonela ku vhuxeta khwatsi. (Mav. 21:5) Loku u vhuxeta zvi buvha khwatsi lezvi mu gondzako, zvi ta hungula ku chava, u zvi kota ku tlakusa woko u hlamula. A cin’wani, ku komisa hlamulo wa wena. (Mav. 15:23; 17:27) Loku u lava ku hlamula zvilo zva zvitsongwani, u nga ta karateka nguvhu. A hlamulo wo koma, kuzvilava wa frazi yin’we kutani timbiri, wu nga olovela ni vamakabye a ku va wu zwisisa, a ku hundza hlamulo wo leha wu tlhamuselako zvilo zvo tala. A ku nyika hlamulo wo koma hi magezu ya wena, zvi ta komba ku u ti longisele khwatsi niku wa ma zwisisa khwatsi a mahungu lawa ma gondziwako.

Titshomba ta moya

Perspicaz vhol. 2 paj. 630 par. 5

Kutsetselela

Ahandle ka lezvo, a ku tsetselela van’wani hambu loku va hi wonhele makhati yo tala i fanelo ya muKristu. (Luka 17:3, 4; Efe. 4:32; Kol. 3:13) Nungungulu a nga tsetseleli lava va alako ku tsetselela van’wani. (Mat. 6:14, 15) Hambulezvo, hambu loku a ciwonho ca hombe ci maha a “muwonhi” a susiwa bandleni ga wuKristu, a munhu loye hi kufamba ka cikhati a nga tsetselelwa loku a komba lezvaku hakunene wa ti sola. Ka ciyimo leco, vontlhe lomu bandleni va fanele ku mu tiyisekisa lezvaku va mu randza. (1 Kor. 5:13; 2 Kor. 2:6-11) Hambulezvo, a zvi wuli ku a maKristu ma fanele ku tsetselela lava va mahako makungo ya ku maha ciwonho ha womu va tlhela va nga ti soli. A vanhu lavo valala va Nungungulu. — Mah. 10:26-31; Lis. 139:21, 22.

27 KA JANEIRO–2 KA FEVEREIRO

TITSHOMBA TI NGA KA MHAKA YA NUNGUNGULU TISIMU 140-143

Maha zvilo zvi yelanako ni mikhongelo ya wena ya ku lava ku vhuniwa

Murindzeli 02.22 paj. 12 par. 13-14

Ingisa wusungukati ga lava va nga ni wutlhari

¹³ Wona wusungukati kota cikombiso ca ku Jehovha wa ku randza. Jehovha i lava ku zvi hi fambela khwatsi wutomini. (Mav. 4:20-22) Loku a hi nyika wusungukati hi ku tirisa Mhaka yakwe, mabhuku ya hlengeletano kutani makabye wo buvha, o kombisa lezvaku wa hi randza. Mahebheru 12:9, 10 i wula lezvi: “I hi laya kasi hi vhuneka.”

¹⁴ Veka kupima ka wusungukati ga kona, na ku nga hi ka lezvi u nga nyikisiwa zvona. Ka zvikhati zvin’wani, hi nga ti zwisa ku loyi a nga hi nyika wusungukati a nga hi nyikangi hi ndlela ya yi nene. Lisine ku loyi a nyikako wusungukati yenawu i fanele ku zvi maha hi ndlela ya ku zvi olova ku gi amukela. (Gal. 6:1) Hambulezvo loku hi nyikiwa wusungukati, i chukwana ku hi veka kupima ka wusungukati ga kona, hambu loku hi ti zwisa ku i wa fanele ku hi nyika hi ndlela ya yi nene. Hi nga ti wutisa lezvi: ‘Hambu loku ndzi nga xalali hi lezvi a nga ndzi nyikisa zvona, a ku ci kona ndzi nga gondzako ka lezvi a nga wula? A ku ndzi nga tsika cihoxo ca loyi a nga ndzi nyika wusungukati, ndzi maha lezvi a nga wula ke?’ Zvi wa tava zvi nene nguvhu ka hina a ku zama ku vhuneka hi ni gihi wusungukati hi nyikiwako. — Mav. 15:31.

Sentinela 15/03/10 paj. 32 par. 4

Simama ni “mbilu yi basileko” masikwini lawa ya zvikarato

A malandza yo kari ya Nungungulu ma mbhela ntamu hi kota ya ku vhukelwa hi valala, ni wusiwana, ni mababyi ya hombe. Ka zvikhati zvin’wani lezvo zvi khumba ni lezvi ma ti zwisako zvona. Hambu hi Hosi Dhavhidha i kumene ni ciyimo leco. I te: “A moya wa mina wa rereka; a mbilu ya mina yi tsindzivele ndzeni ka mina.” (Lis. 143:4) Dhavhidha i zvi kotisile kuyini a ku hlula kukarateka loko? I wa alakanya hi lezvi Jehovha a nga va vhunisile zvona a vanhu vakwe ni lezvi a nga mu tlhatlhisisile zvona yena wutsumbu. I wa ehleketa hi lezvi Jehovha a nga mahile hi kota ya vito Gakwe ga hombe. Dhavhidha i wa chela kota hi mitiro ya Nungungulu. (Lis. 143:5) Hi kufanana, loku hinawu hi ehleketa hi Muvangi wa hina ni zvontlhe lezvi a hi maheleko ni lezvi a simamako ku hi mahela zva hi vhuna loku hi kumana ni zvikarato.

Murindzeli 15/03/15 paj. 32 par. 2

A ku tekana ‘Hosini ntsena’ zva ha tira ke?

Ka zvikhati zvo kari u nga ha ti zwisa ku khwatsi hi Dhavhidha loyi a ngaku: “Jehovha, hatlisa u ndzi hlamula, a moya wa mina wa mbhela ntamu; u nga ndzi fihleli nghohe ya wena.” (Lis. 143:5-7, 10) Ka zvikhati lezvo, mu nyike cikhati a Dhadhani wa wena wa le tilweni ca ku komba a ku hi kwihi kurandza kakwe hi wena. U nga maha lezvo hi ku ti nyika cikhati ca ku gondza Mhaka yakwe u tlhela u ehleketa hi lezvi u gondzako. U ta tiva milayo yakwe u tlhela u wona lezvi a vhunisileko zvona a malandza yakwe cikhatini ci hundzileko. A cikhati u zwako gezu gakwe, u ta engetela kutsumba ka wena ka lezvaku a ku ingisa milayo yakwe hi gona gi nga wutlhari.

Titshomba ta moya

Perspicaz vhol. 2 paj. 609

Wuxungu

Hi ndlela yo fananisa. A mawunwa ni mahlevo ma wonhako a vito ga munhu ma fananisiwa ni wuxungu gi dayako ga tinyoka. (Lis. 58:3, 4) Ku wuliwa lezvi hi valumbeti: “A wuxungu ga maphiri gi minon’wini yabye” (kutani “lendzhako ka minomu yabye”), a ku fana ni lezvi lezvi zvi humesako wuxungu ga maphiri zvi nga lendzhako ka minomu ya wona ni lomu ka tihlaya ta le hehla. (Lis. 140:3; Rom. 3:13) A lirimi la hina lonawu, loku li tirisiwa hi ndlela ya hava kasi ku lumbeta, ku wulawula zvo biha, ku gondzisa mawunwa kutani zvin’wani zvo fana ni lezvo “li tele hi vhenene yi dayako”. — Jak. 3:8.

3-9 KA FEVEREIRO

TITSHOMBA TI NGA KA MHAKA YA NUNGUNGULU TISIMU 144-146

“Va tsaka a vanhu lava a Nungungulu wabye ku nga Jehovha!”

Murindzeli 04.18 paj. 32 par. 3-4

Zviwutiso zva vagondzi

2. A magezu ya wuhundzuluseli ga misava yiswa gi chukwatisilweko ma zwanana khwatsi ni mongo wa Lisimu 144. A ku tirisiwa ka gezu “makunu” laha ka vhesi 12 ku komba lezvaku zvontlhe a zvilo zva zvinene zvi tlhamuselwako kusukela laha ka vhesi 12 kala 14 zvi tirela ka valulamileko — lava va kombelako ku ‘tlhatlhisiwa ni ku ponisiwa’ ka lava va kubiha (vhesi 11). A kucica loko ku khumba ni vhesi 15, legi zvezvi gi nga ni mawonela mambiri yo fana. A kuphindiwa ka magezu “va tsaka” ku wula vanhu valava va van’we, ku nga “lava a Nungungulu wabye ku nga Jehovha!” Zva lisima kambe a ku alakanya lezvaku a ciHebheru ci wa nga tirisi tiponto (sinais de pontuação), to kota maaspa dupla. Hikwalaho, a vahundzuluseli hi vona va faneleko ku hlola mongo lowu wu nga wona, na va alakanya lezvi a magezu yo sasekiselwa ya ciHebheru ma nga tsalisiwa zvona, ni mongo wa kona, ni mavhesi man’wani ya Bhibhiliya ma yelanako nawo.

3. A magezu ya wuhundzuluseli ga misava yiswa gi chukwatisilweko ma yelana ni mavhesi man’wani ya Bhibhiliya ma kombako lezvaku Nungungulu i ta katekisa lava va tsumbekako kakwe. A kucica ka lezvi a gezu asher gi nga hundzuluseliswa zvona ku yelana ni kutsumba loku Dhavhidha, a mutsali wa Lisimu 144 a nga hi nako. Dhavhidha i wa tsumba lezvaku Jehovha i ta tlhatlhisa tiko ga Izrayeli ka valala a gumesa a va katekisa hi ku va nyika litsako ni kuhumelela. (Lev. 26:9, 10; Dhewu. 7:13; Lis. 128:1-6). Hi cikombiso, Dhewuteronome 28:4 i wula lezvi: “Ku ta katekiswa ni vana va wena ni handzu wa misava ya wena ni pswalo wa zvifuyo zva wena, a marole ya wena ni tiyivhana ta wena.” Lezvo hakunene zvi humelela mufun’weni wa Solomoni, a n’wana wa Dhavhidha. Ku vile ka cikhati leco a tiko ga Izrayeli gi ngava ni kurula ni kuhumelela ka ku gi wa nga se tshuka giva nako. Ahandle ka lezvo, a zvilo zvo kari zvi mahekileko mufun’weni wa Solomoni zvi komba lezvi a mufumo wa Mesiya wu to fumisa zvona. — 1 Tih. 4:20, 21; Lis. 72:1-20.

Murindzeli 10.22 paj. 28 par. 16-17

Simama ku tiyisa kutsumba ka wena kota muKristu

¹⁶ A kutsumba ka hina ka ku kuma wutomi ga pindzukelwa cinyikiwo ca lisima ci tako hi ka Nungungulu. Hi rindzela zvilo zvo tsakisa nguvhu, lezvi hi tiyisekako ku zvi ta maheka cikhatini ci tako. A kutsumba loko ko fana ni âncora, ka hi yimisa hi tiya kasi hi zvi kota ku lwisana ni zvikarato, hi timisela ku xanisiwa, hambu hi kufa loku zvi laveka. A kutsumba loko ko fana ni capacete, ka vhikela maalakanyo ya hina kasi hi zvi kota ku potsa ku maha zvilo zva kubiha, kanilezvi hi maha zva zvinene. A kutsumba ka hina ku seketelwako ka Bhibhiliya ku hi maha hiva ni wunghana ga hombe na Nungungulu ku tlhela ku hi komba ku wa hi randza nguvhu. Laha hi yako hi tiyisa nguvhu a kutsumba ka hina, ha vhuneka nguvhu.

¹⁷ Ka papilo legi Pawule a nga tsalela va le Roma, i va kucile lezvi: “Tsakani kutsumbeni ka n’wina.” (Rom. 12:12) Pawule i wa hi ni cigelo ca ku a tsaka hakuva i wa tiyiseka lezvaku loku a simama ku tsumbeka, i wa ta kuma wutomi ga pindzukelwa le tilweni. Hinawu hi nga tsaka hi kutsumba ka hina hakuva ha tiyiseka lezvaku Jehovha i ta maha lezvi a nga tsumbisa. A mutsali wa tisimu i wa wula lisine futsi loku aku: ‘I katekile loyi . . . a tsumbako Jehovha, . . . loyi a tsumbekako kala kupindzuka.’ — Lis. 146:5, 6.

Murindzeli 01.18 paj. 26 par. 19-20

Lirandzo muni li nyikako litsako la lisine?

¹⁹ A tiko ga Sathani gi kari gi xanisa vanhu hi 6000 wa malembe. Ka masiku lawa yo gumesa, a misava yi tele hi vanhu va ti kokelako gabye basi, va tlhela va randza mali ni ku ti tsakisa. Va lwela ku kuma lezvi va zvi lavako ni ku tatisa kunavela kabye basi. Kanilezvi a vanhu lavo a va nge kumi litsako la lisine! A Bhibhiliya gi ngalo: “I katekile loyi Nungungulu wa Jakobe a nga muvhuni wakwe, loyi a tsumbako Jehovha, Nungungulu wakwe.” — Lis. 146:5.

²⁰ A malandza ya Jehovha ma mu randza nguvhu niku lembe ni lembe ku na ni vanhu vo tala va gondzako va mu tiva va tlhela va mu randzawu. Lezvo zvi komba ku a Mufumo wa Nungungulu wa fuma, niku lokuloku wu ta neha makatekwa yo hundza ni cihi hi ci alakanyako! Loku hi maha lezvi Jehovha a zvi lavako, hi tsakisa mbilu yakwe niku lezvo zvi hi nyika litsako la lisine. Lava va randzako Jehovha va ta tsaka kala kupindzuka! Ka ndzima yi landzelako, hi ta wona matshamela yo kari ya hava ma pswaliwako hi lirandzo la makangwa. Hi kulandzela hi ta wona lezvi a matshamela lawo ma hambanisako zvona ni matshamela ma nene ya malandza ya Jehovha.

Titshomba ta moya

Perspicaz vhol. 1 paj. 135 par. 5

Zvihari

A Bhibhiliya gi hi kuca ku hi zvi mahela kululama ni wuxinji a zvihari. Kunene, Jehovha hi yena a zvi nyikako wutomi a tlhela a zvi khatalela. (Mav. 12:10; Lis. 145:15, 16) A Nayo wa Mosi wu wa patsa ku khatalela zvifuyo. Loku a cifuyo leci ci nga lahlekile ci kumiwa, ci wa fanele ku tlhelisiwa ka n’winyi wa cona; loku a zvifuyo zvi bindziwa nguvhu hi mindzhwalo zvi wa fanele ku hungulelwa. (Ekso. 23:4, 5) Zvi wa nga faneli ku tirisiwa hi tihanyi. (Dhewu. 22:10; 25:4) A zvifuyo ni vanhu, zvontlhe zvi wa fanele ku humula hi siku ga sabhadho. (Ekso. 20:10; 23:12; Dhewu. 5:14) A zvifuyo zvo leva zvi wa fanele ku wonelelwa kutani ku dawa. (Gen. 9:5; Ekso. 21:28, 29) Zvi wa betelwa a ku tlhanganisa a matsune ni kati wa zvifuyo zva tixaka to hambana. — Lev. 19:19.

10-16 KA FEVEREIRO

TITSHOMBA TI NGA KA MHAKA YA NUNGUNGULU TISIMU 147-150

Hi na ni zvigelo zvo tala zva ku dhumisa Jah

Murindzeli 07.17 paj. 16 par. 5-6

‘Dhumisani Jehovha!’ — Hikuyini?

⁵ Jehovha a nga chavelelangi a tiko ga Izrayeli ntsena kanilezvi i tlhelile a va chavelela hi mun’we mun’we. Jehovha i maha zvezvo ka hina nyamutlha. A mutsali wa Lisimu 147 i wulile lezvaku Nungungulu “wa tangalisa lava va timbilu ti tshovekileko, a bohelela timbanga tabye.” (Lis. 147:3) Loku hi babya kutani loku hi hi ni gome, hi nga tiyiseka lezvaku Jehovha wa khatala hi hina. Jehovha i xuva nguvhu ku hi chavelela ni ku holisa zvilondza zva timbilu ta hina. (Lis. 34:18; Isa. 57:15) I hi nyika wutlhari ni ntamu kasi hi zvi kota ku timisela ni cihi cikarato hi kumanako naco. — Jak. 1:5.

⁶ Hi kulandzela a mutsali wa Lisimu 147 i cuwukile tilweni a gumesa a wula lezvaku Jehovha “wa hlaya a ntsengo wa tinyeleti” niku “wa ti vitana hi mavito ya tona.” (Lis. 147:4) A mutsali loye i wa ti wona a tinyeleti, kanilezvi i wa nga zvi tivi ku tingani hakunene ti nga kona. Inyamutlha, a titlhari ta siensia ta zvi tiva lezvaku ku na ni tibhiliyoni ta tinyeleti ka ntlawa lowu hina laha misaveni hi wu wonako. Kasi lezvo wuakweni gontlhe, kuzvilava ku na ni mitlawa ya tsandza-vahlayi ya tinyeleti. A vanhu a va nge zvi koti ku hlaya tinyeleti tontlhe, kanilezvi a Muvangi wa zvi kota. Hi lisine, wa ti tiva khwatsi hi yin’we yin’we laha ka kuza a ti nyika ni mavito. (1 Kor. 15:41) A Nungungulu loyi a tivako a nyeleti yin’we ni yin’wani wa ku tiva na wenawu. Contlhe cikhati wa ku tiva khwatsi laha u nga kona, lezvi u ti zwisako zvona ni lezvi u zvi vilelako!

Murindzeli 07.17 paj. 16 par. 7

‘Dhumisani Jehovha!’ — Hikuyini?

⁷ Jehovha wa zvi zwisisa a zvikarato lezvi u kumanako nazvo, niku i na ni ntamu wa ku ku vhuna kulwa nazvo. (Lera Lisimu 147:5.) U nga ha ti zwisa ku khwatsi a cikarato ca wena ca hombe nguvhu niku a wu nge zvi koti ku yimisana naco. Nungungulu wa ku tiva a kugumelwa ka hina; ‘wa alakanya lezvaku hina hi ntshuri.’ (Lis. 103:14) Kota lezvi hi kalako hi nga mbhelelangi, hi tshama hi ku maha zvihoxo zvalezvi zva zvin’we hi kuphindaphinda, niku lezvo zvi nga tshuka zvi hi mbheta ntamu. A ho ku ti sola hi zvilo hi tshukako hi wula, maalakanyo ya hava ma tshukako ma hi tela, kutani ciluse leci hi tshukako hiva naco! Jehovha a nga tshuki ava ni gome, hambulezvo wa zvi zwisisa khwatsi lezvi hina hi ti zwisisako zvona! — Isa. 40:28.

Murindzeli 07.17 paj. 20 par. 18

‘Dhumisani Jehovha!’ — Hikuyini?

¹⁸ A mutsali wa Lisimu 147 i wa zvi tiva lezvaku ka matiko wontlhe ya laha misaveni, Jehovha i wa hlawulile a vaIzrayeli va kale lezvaku va maha vanhu vakwe. Hi vona voce va nga amukele “mhaka” ya Nungungulu ni ‘zvileletelo zvakwe.’ (Lera Lisimu 147:19, 20.) Inyamutlha, hi na ni thomo ga hombe ga ku vitaniwa hi vito ga Nungungulu. Ha bonga hi lezvi hi mu tivako, ni lezvi hi nga ni mhaka yakwe kasi ku hi rangela, hi tlhela hiva ni kuzwanana ka hombe naye. A ku fana ni mutsali wa Lisimu 147, wenawu u na ni zvigelo zvo tala zva kuva u ‘Dhumisa Jehovha!’ u tlhela u kuca van’wani lezvaku vonawu va mu dhumisa.

Titshomba ta moya

Murindzeli 03.23 paj. 17 par. 6

Gondza zvotala hi Jehovha hi ku cuwukisela zvivangwa zvakwe

⁶ Jehovha i ni cikhati leci a mahako hi cona zvilo zvo kari. Lembe ni lembe, kumbheleni ka Fevereiro ni cikari ka Maio, zvi wa koteka ku a vaIzrayeli va wona misekwa na yi haha laha yi nga kari yi rura yi kongoma n’walungu. Jehovha i byelile vaIzrayeli aku: ‘A [sekwa] wa le pfhukeni wa tiva tinguva takwe.’ (Jer. 8:7) A ku fana ni lezvi Jehovha a zvi vekeleko tinguva a zvinyanyani lezvi, i yimisile cikhati leci a to lamula hi cona a tiko legi. Inyamutlha, laha hi wonako zvinyanyani lezvi zvi rurako hi kuya hi tinguva, zvi hi alakanyisa lezvaku hi nga tsumba ku ku na ni cikhati leci Jehovha a ci ‘yimisileko’ kasi a lovisa a tiko legi go biha. — Hab. 2:3.

17-23 KA FEVEREIRO

TITSHOMBA TI NGA KA MHAKA YA NUNGUNGULU MAVINGU 1

Vaswa — himani loyi mu to mu ingisa?

Murindzeli 11.17 paj. 32 par. 16-17

U nga tsiki nchumu wu ku vhalela ku kuma nchachazelo

¹⁶ Kuzvilava u muswa u alakanyako lezvaku a vapswali va wena va karata kutani a va ku zwisisi. Lezvo zvi nga ku maha u bayiseka nguvhu laha ka kuza u ti wutisa ku kona ndza zvi lava ku tirela Jehovha ke. Kanilezvi loku u tsika Jehovha, u ta wona lezvaku a ku na munhu wa tiko a ku randzako nguvhu a ku fana ni lezvi a vapswali va wena va maKristu ni vanghana va wena va lomu bandleni va ku randzisako zvona.

¹⁷ Ehleketa hi lezvi: Loku a vapswali va wena va wo ku tsika va nga ku kawuki, u wa ta zvi tivisa kuyini lezvaku va khatala hi wena? (Mah. 12:8) Lisine ku a va mbhelelangi, hikwalaho va nga tshuka va ku kawuka hi ndlela yo kala yi nga tsakisi. Kanilezvi u nga veki kupima ka lezvo. Wena zama ku zwisisa ku hikuyini va wulako lezvo kutani ku maha. Rula, u nga va holovise. A Mhaka ya Nungungulu yi ngalo: “Loyi a tlharihileko wa ti khoma kuwulawuleni kakwe; ni loyi a nga ni kupimisisa i na ni moya wa kurula.” (Mav. 17:27) Ti karatele kuva munhu wo buvha loyi a vhumelako wusungukati a tlhela a vhuneka hi gona na a nga cuwuki lezvi gi nga tisa zvona. (Mav. 1:8) U nga tshuki u rivala lezvaku a kuva ni vapswali va randzako Jehovha cinyikiwo ca lisima nguvhu. Va lava ku ku vhuna ku kuma wutomi ga pindzukelwa.

Sentinela 15/02/05 paj. 19-20 par. 11-12

Hlayisa matshamela ya wena kota muKristu

¹¹ Tsakisa Nungungulu na ku nga hi vanhu. Zva ntumbuluko a ku tlhamusela lezvi hi nga tshamisa zvona hi kuya hi ntlawa lowu hi lumbako wona. Hontlheni hi lava vanghana niku a ku lumba a ntlawa wo kari wa vanghana zvi maha ku hi tizwa khwatsi. Loku ha ha hi vaswa — ni loku hi kulilenyene — a kucetelo wa vanghana wu ngava wa hombe, wu maha ku hiva ni kuxuva ka ku pimanyisa van’wani kutani ku va tsakisa. Kanilezvi a vanghana ni lava hi tirako navo kutani hi gondzako navo, a hi contlhe cikhati va hi xuvelako zvazvinene. Ka zvikhati zvin’wani, vo lava ku hi va pangalata a ku maha zvakubiha. (Mav. 1:11-19) Loku a muKristu a hluliwa hi kucetelo wa vanghana, a kutala ka zvikhati i fihla ku muKristu. (Mav. 26:4) Mupostoli Pawule i hi tlharihisile, aku: “Mu nga pimanyisi a mahanyela ya tiko legi”. (Rom. 12:2, Bíblia de Jerusalém) Jehovha wa hi nyika ntamu lowu hi wu lavako kasi kulwa ni kucetelo wa tiko legi wa ku hi gi pimanyisa. — Mah. 13:6.

¹² Loku a mikucetelo yi zama ku hi wonha kota maKristu hi fanele ku alakanya lezvaku a kutsumbeka ka Nungungulu zva lisima a ku hundza lezvi a vanhu vo tala va zvi alakanyako kutani va zvi mahako. A magezu ya Eksodhusi 23:2 i tshinya ga nayo go tiya. Ma wula lezvi: “U nga landzeli citshungu kasi ku maha zvakubiha.” A cikhati leci a kutala ka vaIzrayeli va nga kanakanela a ntamu wa Jehovha wa ku tatisa zvitsumbiso zvakwe, Kalebhi i no ala hi kutiya a ku ti patsa ni lava vo tala. I wa tiyiseka lezvaku a zvitsumbiso zva Nungungulu zvi wa tsumbekile, niku i katekisilwe nguvhu hi lezvi a nga yima a tiyile ka ciboho cakwe. (Mitse. 13:30; Jox. 14:6-11) Kasi ku hlayisa a wunghana ga wena na Nungungulu, wenawu wa xuva ku ala ku maha lezvi a votala va mahako?

Titshomba ta moya

Perspicaz vhol. 2 paj. 1140

Cipumbu

Wutshan’wini ga ku wula munhu a nga ni cikarato ca mapimo, a gezu “cipumbu”, hi kuya hi lezvi gi tirisiswako zvona lomu ka Bhibhiliya, a kutala ka zvikhati gi wula munhu loyi a kanyisako razawu ni kuva ni hanyela go huma ndleleni gi nga yelaniko ni milayo yo lulama ya Nungungulu. Ku na ni magezu yo hambanahambana ya ciHebheru kasi ku wula munhu wa tshamela lego, kanilezvi hi ciTshwa a kutala ka zvikhati ku tirisiwa a gezu galegi ga gin’we. Hi cikombiso: kesíl (“cipumbu”; Mav. 1:22), ʼewíl (“cipumbu”; Mav. 12:15), na·vál (“cipumbu”; Mav. 17:7), ni lets (“mutseketseli”; Mav. 13:1). A gezu “cipumbu” hi ciGreki i á·fron (Luka 12:20), ni a·nó·e·tos (Gal. 3:1), ni mo·rós (Mat. 23:17; 25:2).

24 KA FEVEREIRO–2 KA MARÇO

TITSHOMBA TI NGA KA MHAKA YA NUNGUNGULU MAVINGU 2

Hikuyini u faneleko ku hisekela cigondzo ca wena wutsumbu?

Murindzeli 08.22 paj. 19 par. 16

“Famba lisineni”

¹⁶ A hi hontlheni hi zvi randzako a ku lera ni ku gondza. Kanilezvi Jehovha wa hi ramba lezvaku hi simama ku “hlota” ni ku “lavisisa” kasi hi li zwisisa khwatsi a lisine. (Lera Mavingu 2:4-6.) Loku hi ti karata, contlhe cikhati ha vhuneka. Na a wulawula hi cigondzo cakwe wutsumbu ca Bhibhiliya, Corey i wula lezvaku i veka kupima ka vhesi gin’we hi khati. I tlhamusela lezvi: “Ndzi lera a mitlhamuselo yontlhe ya lahasi, ndzi cuwuka a mitsalo yontlhe ya lomu matlhelweni ndzi tlhela ndzi hlota a mahungu man’wani. . . . Ndzi gondza zvilo zvo tala nguvhu hi mahela legi!” Kani hi tirisa a mahela legi kutani gin’wani, hi komba lezvaku a lisine la lisima ka hina laha hi ti nyikako cikhati hi tlhela hi ti karata kasi ku li gondza. — Lis. 1:1-3.

Murindzeli 10.22 paj. 19 par. 3-4

A wutlhari ga lisine ga banguleka gi vitana

³ A wutlhari ku nga wuliwa a ku zvi kota ku tirisa wutivi legi a munhu a nga nago kasi ku maha zviboho zva zvinene. Hambulezvo, a wutlhari ga lisine gi patsa zvo hundza lezvo. A Bhibhiliya gi wula lezvi: ‘A masangulo ya wutlhari hi ku chava Jehovha; ni ku tiva Loyi a Basileko, kupimisisa.’ (Mav. 9:10) Hikwalaho, loku hi lava ku maha ciboho ca lisima, hi fanele ku ci maha hi ku ya hi mawonela ya Jehovha — ku nga ku tirisa ‘wutivi [ga] Loyi a Basileko.’ Hi nga maha lezvo hi ku hlola Bhibhiliya ni mabhuku ya hlengeletano. Loku hi maha lezvo, ho kombisa wutlhari ga lisine. — Mav. 2:5-7.

⁴ Jehovha hi yena yece a nga hi nyikako wutlhari ga lisine. (Rom. 16:27) Hikuyini a nga yena yece a nga ni wutlhari ga lisine? Co sangula, hi yena a nga Vanga zvilo zvontlhe; hikwalaho, wa zvi tiva khwatsi a zvivangwa zvakwe. (Lis. 104:24) Ca wumbiri, zvontlhe lezvi Jehovha a mahako, zvi komba lezvaku i na ni wutlhari. (Rom. 11:33) Ca wunharu, a wusungukati gakwe contlhe cikhati ga va vhuna lava va gi tirisako. (Mav. 2:10-12) Loku hi lava ku kuma wutlhari ga lisine, hi fanele ku zvi zwisisa lezvo hi tlhela hi zvi vhumela. A hi lezvo basi, zvi lava ku loku hi maha cokari kutani loku hi maha zviboho, hi zvi maha hi kuyelana ni lisine lelo.

Murindzeli 09.16 paj. 23 par. 2-3

Vaswa, tiyisani kukholwa ka n’wina

² A vanhu vo tala inyamutlha a va kholwi lezvaku Nungungulu hi yena a nga hi vanga. Loku u hi muswa a tirelako Jehovha kutani a sangulako ku gondza hi yena, kuzvilava wa tshuka u ti wutisa ku cini ci ndzi kholwisako lezvaku Jehovha hi yena Muvangi wa hina. A Bhibhiliya ga hi vhuna ku ehleketa khwatsi hi lezvi hi zvi zwako kutani hi zvi gondzako ni ku alakanyisisa khwatsi hi zvona. A Mhaka ya Nungungulu yi ngalo: “[A] kupimisisa ku ta ku hlayisa.” Hi ndlela muni? Lezvo zvi ta ku vhuna a ku ala maalakanyo ya mawunwa zvi tlhela zvi tiyisa kukholwa ka wena ka Jehovha. — Lera Mavingu 2:10-12.

³ Kasi hiva ni kukholwa ko tiya ka Jehovha, hi fanele ku mu tiva khwatsi. (1 Tim. 2:4) Hikwalaho, a cikhati leci u gondzako a Bhibhiliya ni mabhuku ya hina, zva lisima nguvhu a ku nyima u ehleketa hi lezvi zvi wuliwako. Zama ku zwisisa lezvi u gondzako. (Mat. 13:23) Loku u gondza hi ndlela leyo, u ta kuma zvikombiso zvo tala zvi tiyisako lezvaku Jehovha hi yena Muvangi wa hina niku a Bhibhiliya gita hi kakwe. (Mah. 11:1) A hi kambisiseni lezvi hi nga mahisako zvona.

Titshomba ta moya

Perspicaz vhol. 1 paj. 1237 par. 1

Kutsumbeka

A kutsumbeka loko a ku kotekangi ntsena hi kota ya ntamu wakwe wutsumbu, kanilezvi hi kota ya kukholwa ka hombe ni ku tsumba Jehovha ni ntamu wakwe wa ku ponisa. (Lis. 25:21) Nungungulu i tsumbisa ku i tava “citlhangu” ni “khokhola”, a hlayisa ndlela ya lava va fambako hi kutsumbeka. (Mav. 2:6-8; 10:29; Lis. 41:12) A kutikarata ka wena ka ku lava ku tsakelwa hi Jehovha ku ku maha ku u hanya khwatsi, lezvi zvi vhunako ku u nga hambuki ka ndlela leyi u fambako hi yona. (Lis. 26:1-3; Mav. 11:5; 28:18) Hambu lezvi Joba a zvi wonileko na a karatekile, a munhu wa kululama a nga xaniseka hi kota ya ku fumelwa hi wakubiha, a tlhela afa zvin’we ni vakubiha, Jehovha i hi tiyisekisa lezvaku wa chela kota hi wutomi ga vakululama niku i tiyisekisa lezvaku a tshomba ya vanhu lavo yi ta pindzuka, niku i ta hanya hi kurula cikhatini ci tako a tlhela a kuma tshomba ya lezvi zvi nga zvinene. (Joba 9:20-22; Lis. 37:18, 19, 37; 84:11; Mav. 28:10) A ku fana ni lezvi zvi mahekileko ka Joba, leci ci mahako ku a munhu ava wa lisima nguvhu a tlhela a kombisiwa cichavo kuva munhu wo tsumbeka na ku nga hi kuva munhu wa ku ganya. (Mav. 19:1; 28:6) A vana lava va nga ni thomo ga kuva ni mamani kutani papayi wo tsumbeka va tsaka (Mav. 20:7), vava ni cikombiso ca cinene ca wutomi ga papayi wabye, va ti buza hi lezvi a papayi wabye a zvi kumileko hi kota ya vito gi nene ni cichavo leci a kombisiwako.