Phela a siku ga Jehovha gata, u longile ke?

1. Zvini hi faneleko ku maha kasi hi pona ka siku ga Jehovha?

LOKU a Bhibhiliya gi wulawula hi “siku ga Jehovha,” gi wula cikhati leci Jehovha a lovisako valala vakwe a tlhela a ponisa vanhu vakwe. Cikhatini ci nga hundza, Jehovha i lovisile matiko yo kari. (Isa. 13:1, 6; Ezek. 13:5; Zef. 1:8) Masikwini ya hina, a “siku ga Jehovha” gi ta sangula cikhati leci a varangeli va politika va to lovisa Bhabhuloni wa Hombe, gi gemeta hi Armagedhoni. Kasi hi pona ka “siku” lego, hi fanele ku ti longisela zvezvi. Laha Jesu a nga wulawula hi “kuxaniseka ka hombe”, a nga te hi fanele ku ti longisela basi; kanilezvi i tlhelile aku hi fanele ku ‘tshama na hi longile’ kambe. — Mat. 24:21; Luka 12:40.

2. Hikuyini hi nga vhunekako hi ku kambisisa papilo go sangula ka va le Tesalonika?

² Ka papilo go sangula legi mupostoli Pawule a nga tsalela va le Tesalonika hi ku pimiselwa hi Jehovha, i tirisile mifananiso yo kari kasi ku vhuna maKristu lezvaku ma tshama na ma longile siku ga Jehovha ga ku lamula. Pawule i wa zvi tiva lezvaku a siku ga Jehovha gi wa nga ta chikela ka cikhati leco. (2 Tes. 2:1-3) Hambulezvo, i kucile vamakabye lezvaku va ti longisela siku legi a ku khwatsi gi wo chikela mandziko wa kona; niku hinawu hi nga gi tirisa a wusungukati lego. A hi woneni lezvi a nga tlhamusela xungetano hi: 1) lezvi gi nga wa ta chikelisa zvona a siku lego ga Jehovha, 2) loyi a nga wa ta kala ku pona, 3) ni lezvi hi nga ti longiselisako zvona kasi hi pona.

A SIKU GA JEHOVHA GI TA CHIKELISA KUYINI?

3. A siku ga Jehovha gi ta chikelisa ku khwatsi i khamba ni wusiku hi ndlela muni? (Wona ni mufota.)

³ “A ku khwatsi i khamba ni wusiku.” (1 Tes. 5:2) Lawa magezu yo sangula ka lawa ya manharu ma tirisilweko kasi ku fananisa lezvi a siku ga Jehovha gi to chikelisa zvona. A kutala ka zvikhati a makhamba a ma hlweli loku ma yiva niku ma nghena ni wusiku, a vanhu na va nga longangi. A siku ga Jehovha gonawu gi ta chikela hi citshuketi, gi kuma vanhu vo tala na va nga longangi. Hambu maKristu ya lisine kuzvilava ma ta hlamala hi lezvi a zvilo zvi to cicisa zvona hi citshuketi. Kanilezvi, hina hi nga ta lovisiwa, a ku fana ni vanhu va kubiha.

4. A siku ga Jehovha gi fana ni kulun’wa ka wasati hi ndlela muni?

⁴ “A ku fana ni wasati wa nyimba a lun’wako.” (1 Tes. 5:3) A wasati wa nyimba a nge gi tivi a siku ni hora leyi a to sangula ku lun’wa. Kanilezvi, wa zvi tiva khwatsi ku i ta lun’wa, niku a nga kanakani. A cikhati a sangulako ku lun’wa, zvi sangula na a nga alakanyi nchumu, zvi bayisa zva ku Sathani i n’wanana, a tlhela a nga hi na ndlela ya ku zvi nyimisa. Hinawu a hi gi tivi a siku ni hora leyi a siku ga Jehovha gi to sangula. Hambulezvo, ha zvi tiva khwatsi ku gi ta chikela niku a hi kanakani ku Nungungulu i ta lovisa vakubiha hi citshuketi, laho ku nga tava ni ndlela ya ku va pshwonyomoka va pona.

5. A kuxaniseka ka hombe ku fana ni kuca ka siku hi ndlela muni?

⁵ A ku fana ni kuca ka siku. Ka mufananiso wa wunharu, Pawule i tlhelile a kumbuka makhamba ma yivako ni wusiku. Kanilezvi ka khati legi, zvi wonekisa ku Pawule i cicilenyene, a fananisa siku ga Jehovha ni kuca ka siku. (1 Tes. 5:4) A muyivi wa ku dhumela muti ni wusiku, a nga tshuka a zama ku kuma lezvi a zvi lavako laha ka ku ne a cikhati a nga ci woni ku ca famba. Gi ngaca ne na a nga zvi woni, a poliwa. A kuxaniseka ka hombe konawu ku ta polekisa lava va nga munyameni hi ku simama va maha lezvi zvi nga mu tsakisiko Nungungulu. A kuhambana ni vanhu lavo, hina hi nga tshama hi longile hi ku potsa mahanyela ma nga mu tsakisiko Jehovha hi tlhela hi ti karatela ku hanya hi “wunene gontlhe, ni kululama, ni lisine.” (Efe. 5:8-12) Hi kulandzela, Pawule i tirisile mifananiso yimbiri yo lava ku fana kasi ku komba lava va to kala ku pona.

HI VAMANI VA TO KALA KU PONA?

6. A vanhu vo tala va etlele hi ndlela muni? (1 Va Le Tesalonika 5:6, 7)

⁶ “Lava va etlelako.” (Lera 1 Va Le Tesalonika 5:6, 7.) Lava va to kala ku pona siku ga Jehovha, Pawule i va fananisile ni vanhu va etleleko. Lava va etleleko a va zvi tivi lezvi zvi humelelako, ne a va zvi woni ku a cikhati ca famba. Hikwalaho, loku ku maheka zvilo zva lisima a va zvi tivi, ne a va nge mahi nchumu. A vanhu vo tala nyamutlha va etlele hi tlhelo ga moya. (Rom. 11:8) A ka vona a ku na leci ci kombako ku hi hanya “masikwini yo gumesa” niku a kuxaniseka ka hombe ku ta chikela zvezvi. A zvilo zva hombe zvi mahekako laha misaveni zvi nga hlakahla vokari wurongweni lego va lava ku tivanyana zvokari hi mahungu ya Mufumo. Kanilezvi, a votala vo hafu matihlo va guma va tlhela kuetleleni. Hambu lava va kholwako ku a vakubiha va ta lovisiwa, va ti byela ku a hi zva nyamutlha. (2 Ped. 3:3, 4) Kanilezvi, hina ha zvi tiva ku siku ni siku gi cako, zviya zvi laveka nguvhu a ku hi tshama hi khindlimukile.

7. Lava va to lovisiwa hi Nungungulu va fana ni zvidhakwa hi ndlela muni?

⁷ “Lava va popiwako.” Lava va to lovisiwa hi Nungungulu, mupostoli Pawule i va fananisile ni zvidhakwa. Loku ku maheka zvokari, a munhu a nga popiwa i nonoka ku maha cokari, niku i maha zviboho zvo kala zvi nga hi zvi nene. A vanhu vo biha vonawu a va mahi nchumu a cikhati leci Nungungulu a va tlharihisako. Va hlawula mahanyela ma va yisako kulovisweni. Kanilezvi, a maKristu ma kuciwa ku tirisa khwatsi a kupima ka wona, ma maha zviboho zva zvi nene. (1 Tes. 5:6) Loku a tlhari yo kari ya ku hlola Bhibhiliya yi wulawula hi lava va tirisako khwatsi a kupima kabye, yi wula lezvaku a munhu loye “a nga jujeki kupima, i simama a rulile. Wa zvi kota ku pimisa khwatsi kasi a maha zviboho zva zvi nene.” Hikuyini hi faneleko ku simama hi rulile hi tlhela hi nga jujeka kupima? Kasi hi nga dzuki na hi pelile ka zvilo zva politika zva tiko legi ni magujeguje man’wani. Laha a siku ga Jehovha gi yako gi tshinela, a ku nga ngheni ka zvilo lezvo zvi taya zvi karata nguvhu. Hambulezvo, a zvi lavi ku hi karateka hi lezvi hi to maha. A moya wa ku basa wa Nungungulu wu ta hi vhuna ku hi nga jujeki kupima, kanilezvi hi simama hi rulile hi tlhela hi maha zviboho zva zvi nene. — Luka 12:11, 12.

ZVINI HI NGA MAHAKO KASI HI TI LONGISELA SIKU GA JEHOVHA?

8. Ka 1 Va Le Tesalonika 5:8, a matshamela lawa ma lavekako kasi hi tshama na hi longile siku ga Jehovha ma fananisiwa ni yini? (Wona ni mufota.)

⁸ “Boha a cikatawu ca simbi . . . ni cihuko ca simbi.” Pawule i hi fananisa ni musochwa a ma vhulileko, loyi a bohileko khwatsi tinguwo takwe ta kulwa hi tona. (Lera 1 Va Le Tesalonika 5:8.) Loku ku hi ni yimpi, ku rindzelwa ku a musochwa a tshama na a longile kulwa ni ka cihi cikhati. Na hinawu zvi tshamisile zvezvo. Hi tshama hi longile siku ga Jehovha hi ku boha cikatawu ca simbi ca kukholwa ni lirandzo, ni cihuko ca simbi, ci nga kutsumba. A matshamela lawa ma nga hi vhuna nguvhu.

9. A kukholwa ku hi vhikelisa kuyini?

⁹ A cikatawu ca simbi ci vhikela mbilu ya musochwa. A kukholwa ni lirandzo zvi vhikela mbilu ya hina yo fananisa. A matshamela lawa ma ta hi vhuna ku simama hi tirela Nungungulu hi tlhela hi landzela Jesu. A kukholwa ku hi tiyisekisa lezvaku Jehovha i ta hi chachazela hi kuva hi mu hlota hi mbilu yontlhe. (Mah. 11:6) Ku ta hi kuca ku simama hi tsumbeka ka Jesu, a Murangeli wa hina, hambu loku zvi lava ku hi lwisana ni mindzhingo. A ku gondza hi vanhu va masiku ya hina va timiseleko zvikarato zvo kota ku xanisiwa ni wusiwana, hambulezvo va simama ku tsumbeka, zvi nga tiyisa kukholwa ka hina kasi hi zvi kota ku lwisana ni zvikarato zva wutomi legi. A ku pimanyisa cikombiso ca lava va nga tsika titshomba va rangisa ntiro wa Mufumo wa Nungungulu, zvi nga hi vhuna ku hi nga phasiwi hi ntlhamu wa ku hlongolisela titshomba.b

10. A ku randza Nungungulu ni vanhu zvi hi vhunisa kuyini ku timisela hi simama ku chumayela?

¹⁰ A lirandzo lonawu la lisima kasi hi tshama hi khindlimukile ni kuva ni kupima ku nene. (Mat. 22:37-39) A ku randza Nungungulu zvi hi vhuna ku timisela hi simama ku chumayela hambu loku hi kumana ni zvikarato. (2 Tim. 1:7, 8) Kota lezvi hi randzako ni lava va nga mu randziko Jehovha, hi simama ku chumayela ni ku tira lomu cipandzeni ca bandla ga hina, hambu ku chumayela hi fone ni mapapilo. A hi ti byeli ku a vanhu va lomu cipandzeni ca hina va tsandzile va nga ta tshuka va cica va sangula ku maha zva zvi nene. — Ezek. 18:27, 28.

11. A ku randza vamakabye zvi hi vhunisa kuyini? (1 Va Le Tesalonika 5:11)

¹¹ A vamakabye va hina vonawu ha va randza. Hi kombisa lirandzo lelo hi “ku tiyisana ni ku akana”. (Lera 1 Va Le Tesalonika 5:11.) A ku fana ni masochwa ma yimileko zvin’we malwa, ha tiyisana. Lisine ku laha a musochwa a lwako a nga tshuka a bayisa munghana wakwe; kanilezvi i wa nga ta tshuka a zvi maha ha womu. Hi kufanana, hinawu a hi nge tshuki hi bayisa vamakabye va hina ha womu, kutani ku va tlhelisela kubiha hi kubiha. (1 Tes. 5:13, 15) Hi kombisa lirandzo kambe hi kuva ni cichavo hi lava va rangelako lomu bandleni. (1 Tes. 5:12) A cikhati leci Pawule a nga va tsalela papilo legi a va le Tesalonika, a bandla legi ne gi wa nga hi na lembe na gi wumbilwe. Zvi wonekisa ku a madhota ya kona ni malandza ma wa nga hi na wutlhari ga kuya kule, niku kuzvilava va wa maha zvihoxo. Hambulezvo, zvi wa ringana ku a bandla gi va kombisa cichavo. Laha a kuxaniseka ka hombe ku tshinelako, kuzvilava a madhota ya laha bandleni ga hina zvi ta lava ku hi tsumba wona ku ma hi nyika zvileletelo a ku hundza zvezvi. Kuzvilava zvi nga tshuka zvi nga ha koteki ku a vamakabye va le tsindza ni va laha ravini va hi nyika zvileletelo. Hikwalaho, zva lisima nguvhu a ku zvezvi hi gondza ku ma randza ni ku ma kombisa cichavo a madhota ya hina laha bandleni. Hambu ko humelela yini, a hi simamani kuva ni mawonela ma nene, hi nga veki kupima ka zvihoxo zvabye; kanilezvi, hi tshama hi ku ti alakanyisa ku Jehovha i rangela vavanuna lava vo tsumbeka hi ku tirisa Kristu.

12. A kutsumba ku vhikelisa kuyini a mapimo ya hina?

¹² A ku fana ni lezvi a cihuko ca musochwa ci vhikelako hloko yakwe, a kutsumba ka hinawu ku vhikela mapimo ya hina. A kutsumba ko tiya, ku hi vhuna ku zwisisa lezvaku lezvi a tiko legi gi hi nyikako a zvi vhuni nchumu. (Filp. 3:8) A kutsumba ka hina kambe ku hi vhuna ku hi nga jujeki kupima hi tlhela hi simama hi rulile. Hi zvezvo zvi nga humelela Wallace na Laurinda, va tirako lomu Afrika. Ndzeni ka mavhiki manharu, a mun’we i no felwa ni mamani, a mun’we a felwa hi papayi. Hi kota ya ntungu wa COVID-19, zvi wa nga koteki a ku va tlhela kaya va ya singatana ni maxaka yabye. Wallace i tsalile lezvi: “A ku tsumba ku a vafileko va ta vhuka, zvi ndzi vhuna ku ndzi va alakanyela lezvi va to tshamisa zvona ka masiku yo sangula misaveni yiswa. A ndzi alakanyeli lezvi va nga hi zvona ka masiku yo gumesa misaveni leyi. A kutsumba loko ku rulisa moya wa mina loku ndzi xukuvala kutani loku ndzi sangula ku va rila.”

13. Zvini hi nga mahako kasi hi kuma moya wa ku basa?

¹³ “Mu nga timi a ndzilo wa moya.” (1 Tes. 5:19) Pawule i fananisile moya wa ku basa ni ndzilo wu nga ndzeni ka hina. Loku hi hi ni moya wa Nungungulu, ho vhura hi ku lava ku maha zva zvi nene hi tlhela hi hisekela ku tirela Jehovha. (Rom. 12:11) Zvini hi nga mahako kasi hi kuma moya wa ku basa? Hi nga khongela hi mu kombela, hi gondza Bhibhiliya hi tlhela hi maha mitiro ya hlengeletano, yo kota ku chumayela kuya mitlhanganweni ni zvin’wani. A ku maha lezvo zvi ta hi vhuna kuva ni “mihandzu ya moya”. — Gal. 5:22, 23.

14. Zvini hi nga faneliko ku maha kasi Nungungulu a simama ku hi nyika moya wa ku basa? (Wona ni mufota.)

¹⁴ Loku Nungungulu a hi nyikile moya wakwe wa ku basa, hi fanele ku ti wonela kasi hi “nga timi a ndzilo [lowo] wa moya.” Ntsena lava va nga ni mapimo ni mahanyela yo basa hi vona a va nyikako moya wa ku basa Nungungulu. Loku hi tshama hi gayela zvilo zvo kala zvi nga hlazvekangi hi tlhela hi zvi maha, Nungungulu a nge hi nyiki a moya wakwe wa ku basa. (1 Tes. 4:7, 8) Kasi Nungungulu a simama ku hi nyika moya wa ku basa kambe, a hi faneli ku ‘kanyisa a zviphrofeto.’ (1 Tes. 5:20) Laha ka vhesi legi, a “zviphrofeto” ku wuliwa mahungu ya moya wa ku basa wa Nungungulu — a ku patsa ni lawa ya ku a siku ga Jehovha gi laha kusuhani niku hi hanya masikwini yo gumesa. A siku lego a hi zvi wonisi ku ga hi kule nguvhu, hi ti byela ku a Armagedhoni yi nga ta chikela masikwini ya hina. Kanilezvi, hi komba ku ha zvi zwisisa ku gi ta chikela zvezvi — hi tshama hi ku gi alakanya— hi kuva ni mahanyela ma nene, siku ni siku hi tshama na hi khomekile ‘hi mitiro [yi kombisako] lezvaku hi khozela Nungungulu.’ — 2 Ped. 3:11, 12.

“HLOLANI A ZVILO ZVONTLHE”

15. Zvini hi nga mahako kasi hi nga fayeliselwi hi mahungu yo kanganyisa ma tako hi ka madhimoni? (1 Va Le Tesalonika 5:21)

¹⁵ Zvezvanyana, hi ndlela yo kari a valala va Nungungulu va taku: “Ku rulile, a matiko ma etlele!” (1 Tes. 5:3) A mahungu lawo ma tako hi ka madhimoni ma ta tata misava, ma pengisa votala. (Kuv. 16:13, 14) Hina ke? Loku hi ‘hlola a zvilo zvontlhe’ hi nga ta fayeliselwa hi wona. (Lera 1 Va Le Tesalonika 5:21.) A gezu ga ciGreki gi tirisilweko laha ka ku “hlolani” gi wa tirisiwa kasi ku komba lezvi a vanhu va nga hlolisa zvona a zvilo zvo kota ouro ni prata kasi ku wona ku a hi pirata ke. Hinawu, hi fanele ku hlola lezvi hi zvi zwako kutani lezvi hi lerako kasi ku tiva ku lisine ke. Lezvo zvi wa hi zva lisima ka va le Tesalonika, niku zvi ta laveka nguvhu ka hina laha a kuxaniseka ka hombe ku tshinelako. Wutshan’wini ga ku hi ku khube hi kholwa lezvi a van’wani va wulako, hi tirisa kupima ka hina, hi fananisa lezvi hi lerako kutani lezvi hi zvi zwako ni lezvi a Bhibhiliya ni hlengeletano ya Jehovha yi wulako. Loku hi maha lezvo, hi nga ta fayeliselwa hi mahungu yo kanganyisa ma tako hi ka madhimoni. — Mav. 14:15; 1 Tim. 4:1.

16. Kutsumba muni ko tiya hi nga nako, niku a kutsumba loko ku hi kuca ku maha yini?

¹⁶ Kota ntlawa, a vanhu va Nungungulu va ta pona kuxanisekeni ka hombe. Kanilezvi, a hi zvi tivi lezvi a wutomi ga mun’we ni mun’wani wa hina gi to tshamisa zvona mandziko. (Jak. 4:14) Hambulezvo, kani ha hanya kala ku chikela kuxaniseka ka hombe, kani hafa na ku nga se chikela, hi ta chachazelwa hi wutomi ga pindzukelwa loku hi simama ku tsumbeka. A vatotilweko va tava na Kristu le tilweni. Lava va tiyivhu tin’wani va tava paradhiseni kwalaha misaveni. Hontlheni a hi simameni ku veka kupima ka kutsumba loku hi nga nako hi tlhela hi tshama hi longile a kuta ka siku ga Jehovha!