Wa ha zvi alakanya ke?

U gondzile zvi buvha a tindzima ta Murindzeli wa lembe legi? A hi wone ku u nga zvi kota ku hlamula zviwutiso zvi landzelako:

Zvini zvi patsekako ka kuva ni “ni kupima kuswa”? (Rom. 12:2)

Zvi patsa zvo hundza ku maha zvilo zva zvinene basi. Zvi patsa ku hlola lezvi zvi nga timbilwini ta hina hi tlhela hi maha zvontlhe hi zvi kotako kasi hi cica a wutomi ga hina hi gi zwananisa ni milayo ya Nungungulu hi laha zvi kotekako hi kona. — Murindzeli 01.23, paj. 8-9.

Hi nga kombisisa kuyini kuringanisela laha hi wonako lezvi zvi humelelako lomu tikweni?

Ha tsaka hi ku wona lezvi a zvilo lezvi zvi mahekako nyamutlha zvi tatisisako zvona a zviphrofeto. Wutshan’wini ga ku dhumbela, zvi nga zvilo zvi nga vangako kungazwanani, hi fanele ku seketela mabhulo ya hina ka mahungu ma humesilweko hi hlengeletano ya Jehovha. (1 Kor. 1:10) — Murindzeli 02.23, paj. 16.

A kubhabhatiswa ka Jesu ku hambanisa kuyini ni loku ka valandzeli vakwe?

Kota munhu a pswalilweko ka tiko gi ti hendleletileko ka Nungungulu, Jesu i wa nga hi na cilaveko ca ku ti hendleleta ka Jehovha a ku khwatsi hi lezvi hina hi mahako. Jesu i wa hi munhu wo mbhelela wo kala a nga hi na ciwonho. Ku wa nga hi na cilaveko ca ku a ti sola hi zviwonho zvakwe. — Murindzeli 03.23, paj. 5.

Hi nga va vhunisa kuyini a van’wani a ku hlamula mitlhanganweni?

Hi nga komisa mihlamulo ya hina kasi a van’wani va kuma co hlamula. Hi nga potsa kambe ku hlamula timhaka to tala. Lezvo zvi ta maha ku a timhaka tin’wani ti hlamuliwa hi van’wani. — Murindzeli 04.23, paj. 23.

Cini a “Ndlela yi basileko” yi kumbukiwako ka Isaya 35:8?

Kusanguleni, a ndlela leyo yo fananisa yi wa yimela a ndlela ya vaJudha ya ku suka hi Bhabhuloni kala tikweni gabye. Ahati masikwini ya hina ke? Hi malembe yo tala mahlweni ka 1919, a ntiro wa ku hlahla wu no mbhela — ku nga ku hundzulusela ni ku gandla maBhibhiliya, ni zvilo zvin’wani. A vanhu va Nungungulu va endza hi “Ndlela yi basileko” vaya paradhiseni ga moya, legi gi va yisako ka makatekwa ya Mufumo. — Murindzeli 05.23, paj. 15-19.

Mavingu cipimo 9 i hi nyika wusungukati muni xungetano hi vavasati vambiri vo fananisa?

Mavingu i wulawula hi “wasati wa cipumbu” loyi a cirambu cakwe ci yisako “cilahleni” na “wutlhari ga lisine,” ku nga wasati wo fananisa, loyi a cirambu cakwe ci yisako ka “ndlela ya kupimisisa” ni ya wutomi. (Mavingu 9:1, 6, 13, 18) — Murindzeli 06.23, paj. 22-24.

A kutikoramisa ka Nungungulu ni kuolova kakwe zvi ti kombisile kuyini laha a nga tirisana na Loti?

Jehovha i byelile Loti lezvaku a huma hi Sodhoma a ya tikweni ga zvitsunga. Laha Loti a nga khongotela Jehovha lezvaku a tsutsumela Zoware wutshan’wini ga lomu va nga mu byela, Nungungulu i no vhumela a cikombelo cakwe. — Murindzeli 07.23, paj. 21.

Zvini lezvi a sati a nga mahako loku a nuna wakwe a wona Pornografia?

I fanele ku alakanya lezvaku yena a nga na nandzu. I fanele ku veka kupima ka wunghana gakwe na Nungungulu a tlhela a ehleketa hi matimu ya Bhibhiliya ya vavasati va nga karatekile va nga tiyisiwa hi Nungungulu. A nga vhuna a nuna wakwe a ku potsa a zviyimo zva mhango. — Murindzeli 08.23, paj. 14-17.

A kupimisisa ku nga hi vhunisa kuyini kuva vanhu vo olova loku lezvi hi zvi kholwako zvi kanetiwa?

Hi nga wona a ciwutiso kutani cikarato kota ndlela ya ku hi maha hi wona lezvi a munhu mun’wani a ehleketako hi zvona kutani lezvi a zvi nyikako nguvhu lisima. Hi hlomisilwe khwatsi kasi hi hlamula hi ndlela yo olova. — Murindzeli 09.23, paj. 17.

Zvini hi nga gondzako ka Mariya xungetano hi lezvi hi nga wu kumisako zvona ntamu?

A cikhati a nga tiva lezvaku i tava mamani wa Mesiya, Mariya i nyikilwe ntamu hi van’wani. Gabriyeli na Elizabheti va tiyisile Mariya hi ku tirisa Mitsalo. Hinawu hi nga kuma ntamu ka vakhozeli-kuloni. — Murindzeli 10.23, paj. 15.

Jehovha a nga hlamulisa kuyini a mikhongelo ya hina?

I tsumbisa ku ingisela mikhongelo ya hina ni ku wona lezvi yi yelanisako zvona ni kungo gakwe. (Jer. 29:12) A nga hlamula a mikhongelo ya ku fana hi tindlela to hambana, kanilezvi contlhe cikhati i ta hi tiyisa. — Murindzeli 11.23, paj. 21-22.

Va Le Roma 5:2 i kumbuka a “ku tsumba,” makunu hikuyini ku tlhelako ku kumbukiwa ka vhesi 4?

Hi ku ingisela a mahungu ya manene, a munhu a nga kuma kutsumba ka ku ti buza hi wutomi misaveni yi nga paradhise. Kanilezvi laha a kumanako ni zvikarato, a zvi timisela, a tlhela azwa ku Nungungulu wa mu tsakela, a kutsumba kakwe ka kula ku tlhela ku tiya kuva ka lisine kakwe. — Murindzeli 12.23, paj. 12-13.