U nga zvi maheli mihoni a ku bhabhatisiwa

1. Zvigelo muni hi nga nazvo zva ku hi bhabhatisiwa?

XANA wa mu randza Jehovha Nungungulu, loyi a ku nyikileko a zvinyikiwo zvontlhe zvo saseka a ku patsa ni wutomi? Wa zvi lava a ku komba lezvaku wa mu randza? A ndlela ya yinene ya ku maha lezvo, ku ti nyikela kakwe u tlhela u zvi kombisa hi ku bhabhatisiwa hi mati. Lezvo zvi ta maha lezvaku uva ciro ca ngango wa Jehovha. Loku u maha lezvo, a Papayi wa wena tlhelo Munghana wa wena i ta ku rangela a tlhela a ku khatalela hakuva u tava u lumba yena. (Lis. 73:24; Isa. 43:1, 2) A kutinyikela ni kubhabhatisiwa zvi ta tlhela zvi ku vhulela lungelo ga ku u ti buza hi wutomi ga pindzukelwa. — 1 Ped. 3:21.

2. Zvini hi to gondza ka ndzima leyi?

² Ci kona ci ku vhalelako a ku bhabhatisiwa? Loku ci hi kona, a hi wena wece. A kutala ka vanhu zvi lavile lezvaku va cica zvokari ka mahanyela yabye ni ka maalakanyo yabye kasi va ringanelwa hi ku bhabhatisiwa. A vanhu lavo zvezvi va tirela Jehovha hi kuhiseka na va tsakile. Zvini u nga u nga gondzako ka vokari va bhabhatisilweko ka zana ga malembe go sangula? A hi woneni a zvikarato lezvi va kumeneko nazvo ni lezvi hi nga gondzako ka zvikombiso zvabye.

A VASAMARIYA VA BHABHATISIWA

3. Zvini lezvi a vaSamariya va nga fanele ku cica kasi va ringanelwa hi ku bhabhatisiwa?

³ A vaSamariya va masikwini ya Jesu va wa lumba ntlawa wo kari wa wukhozeli wu nga kumeka kusuhani ni Xekemi wa kale ni Samariya, n’walungu wa Judhiya. Na va nga se bhabhatisiwa, a vaSamariya va wa fanele ku vhumela lezvaku a Mitsalo yontlhe i Mhaka ya Nungungulu va tlhela vava ni wutivi go engeteleka. A vaSamariya va wa vhumela ntsena lezvaku a Mhaka ya Nungungulu i ntlhanu wa mabhuku yo sangula ya Bhibhiliya, ku nga Genesisi kala ka Dhewuteronome, kuzvilava ni bhuku ga Joxuwa. Hambulezvo, a vaSamariya va wa rindzela a kuta ka Mesiya hi kota ya citsumbiso ca Nungungulu ci tsalilweko ka Dhewuteronome 18:18, 19. (Joh. 4:25) Kasi va bhabhatisiwa, va wa fanele ku vhumela lezvaku Jesu hi yena Mesiya loyi a nga tsumbisilwe. “A vaSamariya vo tala” va no maha zvalezvo. (Joh. 4:39) A vokari zvi lavile ku va hlula a cihlawulela leci ci nga nwele ci nga hi kona cikari ka vaSamariya ni vaJudha. — Luka 9:52-54.

4. Hi kuya hi Mitiro 8:5, 6, 14, zvini lezvi a vaSamariya vo kari va nga maha a cikhati leci Filipu a nga va chumayela?

⁴ Zvini zvi vhunileko a vaSamariya lezvaku va bhabhatisiwa? A cikhati leci Filipu, a muvhangeli, a nga “va chumayela ha Kristu” a vokari vabye “va amukele a mhaka ya Nungungulu”. (Lera Mitiro 8:5, 6, 14.) Hambu lezvi Filipu a nga hi muJudha va mu ingisele khwatsi. Kuzvilava va wa alakanya mavhesi yo kari ya Pentatewuko ma kombako lezvaku Nungungulu a nga na cihlawulela. (Dhewu. 10:17-19) Kani cini ci va kucileko, a mhaka hi lezvaku va no “chela kota ka lezvi Filipu a nga kari a wula” xungetano hi Kristu niku va no vhumela cikombiso co dlunyateka ca lezvaku Nungungulu i wa kari a vhuna Filipu. Filipu i no tlhela a maha zvihlamaliso zvo tala zvo patsa ku hanyisa mababyi ni ku hlongola madhimoni. — Miti. 8:7.

5. Zvini u gondzako ka vaSamariya?

⁵ A cihlawulela kutani ku kala wutivi na zvi mahile lezvaku a vaSamariya lavo va nga kuli hi tlhelo ga moya. Kanilezvi a va tsikangi ku lezvo zvi humelela. Andzhako ka loku a vaSamariya va kholwile lezvaku lezvi Filipu a nga kari a va gondzisa lisine a va hlwelangi a ku bhabhatisiwa. A matimu ya Bhibhiliya ma wula lezvi: “Laha va nga kholwa ka Filipu, loyi a nga chumayela a mahungu ya manene ya Mufumo wa Nungungulu, ni vito ga Jesu Kristu, a vavanuna ni vavasati va no bhabhatiswa.” (Miti. 8:12) Wa kholwa lezvaku a Mhaka ya Nungungulu lisine niku a Vakustumunyu va Jehovha va hlula cihlawulela va tlhela va ti karatela ku kombisa lirandzo la lisine, leli li tivekisako a maKristu ya lisine? (Joh. 13:35) Makunu, maha ciboho co tiya na u tiyiseka lezvaku Jehovha i ta ku katekisa.

6. A cikombiso ca Ruben ci nga ku vhunisa kuyini?

⁶ Ruben, wa le Alemanya, i kulele ka ngango wa Vakustumunyu va Jehovha. Hambulezvo, na a ha hi muswa i wa kanakana lezvaku Jehovha i kona. I ku hlulisile kuyini a kukanakana kakwe? Kota lezvi a nga wona lezvaku i kiyelelwa hi wutivi, i no boha ku maha cokari. Ruben i wula lezvi: “Ndzi no maha cigondzo ca mina wutsumbu kasi ku hlula kukanakana ka mina. Ndzi no gondza makhati yo tala a tindzima ti nga wulawula hi evholusawu.” I no lera a bhuku “Existe um Criador Que Se Importa com Você?” A bhuku lego gi mu vhunile nguvhu. Ruben i no pimisa lezvi: ‘Yeee, kasi Jehovha i kona?’ A cikhati leci a nga endzela a tsindza ga misava yontlhe, Ruben i no engetela lezvi a nga gi nyikisa zvona lisima a wumun’we legi hi nga nago ni vamakabye misaveni yontlhe. Laha a nga tlhela Alemanya, i no bhabhatisiwa na a hi ni 17 wa malembe. Loku u hi ni kukanakana hi lezvi u gondzako, hlula a kukanakana loko hi ku kambisisa lomu ka mabhuku ya hina. A kukanakana ku nga hluliwa hi “wutivi ga lisine”. (Efe. 4:13, 14) Laha u zwako matshango xungetano hi lirandzo ni kuzwanana ka vanhu va Jehovha ka matshamu man’wani ya misava u tlhela u zvi wona hi lawa ya wena laha bandleni ga n’wina, u ta engetela lezvi u gi nyikisako zvona lisima a wumun’we legi hi nga nago ni vamakabye misaveni yontlhe.

SAWULE WA LE TARSUSI A BHABHATISIWA

7. Zvini lezvi Sawule a nga fanele ku cica?

⁷ Wona cikombiso ca Sawule wa le Tarsusi. I wa gondzisilwe khwatsi a nayo wa ciJudha niku i wa hi ni nduma cikari ka vaJudha. (Gal. 1:13, 14; Filp. 3:5) Ka cikhati leco, a vaJudha va wa wona maKristu kota vadhuki; hikwalaho, Sawule i no ma xanisa nguvhu. Sawule i wa alakanya lezvaku i maha kurandza ka Nungungulu, kanilezvi i wo ti kalavela. (Miti. 8:3; 9:1, 2; 26:9-11) Kasi a vhumela Jesu a tlhela a bhabhatisiwa kota muKristu, Sawule i wa fanele ku ti yimisela ku xanisiwa.

8. a) Zvini zvi vhunileko Sawule lezvaku a bhabhatisiwa? b) Hi kuya hi Mitiro 22:12-16, Ananiyasi i mu vhunisile kuyini Sawule? (Wona ni mufota.)

⁸ Zvini zvi vhunileko Sawule lezvaku a bhabhatisiwa? A cikhati leci Hosi Jesu a nga woneka kakwe, Sawule i nova cikhumu. (Miti. 9:3-9) Sawule i no pfhunga masiku manharu niku handle ko kanakana, ndzeni ka cikhati leco i wa ehleketa hi lezvi zvi nga ha hi ku mu humelela. Sawule i no kholwa lezvaku Jesu i wa hi yena Mesiya ni lezvaku a valandzeli vakwe va wa hi ka wukhozeli ga lisine. Sawule i wa ti sola nguvhu hi lezvi a nga patsekile ka ku dawa ka Stefani! (Miti. 22:20) Andzhako ka masiku manharu, a mupizani wo kari wa ku hi Ananiyasi, hi wunene i no tshinelela Sawule a mu hanyisa ka wukhumu gakwe a tlhela a mu kuca lezvaku a bhabhatisiwa hi kuhatlisa. (Lera Mitiro 22:12-16.) Sawule i no ti koramisa a ingisa Ananiyasi a tlhela a bhabhatisiwa. — Miti. 9:17, 18.

9. Zvini hi gondzako ka Sawule?

⁹ Hi nga gondza zvokari ka Sawule. Kuzvilava a matshandza ni kuchava vanhu na zvi mu vhalele a ku a bhabhatisiwa. Kanilezvi a nga tsikangi ku lezvo zvi humelela. I no ti koramisa a cica mahanyela yakwe a cikhati leci a nga vhumela lisine xungetano hi Kristu. (Miti. 26:14, 19) Sawule i wa ti yimisele a kuva muKristu hambu lezvi a nga zvi tiva lezvaku i ta xanisiwa. (Miti. 9:15, 16; 20:22, 23) Andzhako ka loku a bhabhatisilwe, i simamile a tsumba lezvaku Jehovha i ta mu vhuna a ku timisela zvikarato zvo tala lezvi a nga wa ta kumana nazvo. (2 Kor. 4:7-10) A ku bhabhatisiwa kota Kustumunyu wa Jehovha zvi nga maha lezvaku u kumana ni zviringo zva kukholwa kutani zvikarato, kanilezvi u nga tava wece. U nga tiyiseka lezvaku Nungungulu na Kristu va nga ta tshuka va tsika a ku ku vhuna. — Filp. 4:13.

10. A cikombiso ca Anna ci nga ku vhunisa kuyini?

¹⁰ Anna i kulele ka ngango wa vaCurdo, mutsuwuka-gambo wa Europa. Andzhako ka loku a mamani wakwe a bhabhatisilwe, Anna i no vhumelelwa hi papayi wakwe lezvaku a gondza Bhibhiliya; ka cikhati leco Anna i wa hi ni 9 wa malembe. Hambulezvo, zvi vangile cikarato ka maxaka lawa man’wani ma nga hanya ni ngango wa Anna. A maxaka yakwe ma wa zvi wona na zvi bihile nguvhu a ku a munhu a tsika wukhongeli ga laha lixakeni. A cikhati leci a nga hi ni 12 wa malembe, i no kombela papayi wakwe lezvaku a mu vhumelela ku a bhabhatisiwa. A papayi wakwe i no mu wutisa lezvaku ci wa hi ciboho cakwe kutani i wo kucetelwa hi wokari ke. Anna a hlamula, aku: “Ndza mu randza Jehovha.” A papayi wakwe a vhumela lezvaku Anna a bhabhatisiwa. Andzhako ka loku a bhabhatisilwe, a maxaka yakwe ma no simama ku mu poyilela ni ku mu xanisa hi tindlela to tala. A gin’we ga maxaka yakwe gi zile gi mu byela ku: “Zvi wa tava chukwana loku u wa no maha cibhayi kutani ku u dzaha wutshan’wini ga kuva Kustumunyu wa Jehovha.” Anna i zvi kotisile kuyini a ku timisela? I wula lezvi: “Jehovha i ndzi vhunile ku ndzi tiya niku mamani na papayi vonawu va ndzi vhunile nguvhu.” Anna i tsalile lista ya makhati yo kongoma lawa a wonileko a woko ga Jehovha wutomini gakwe niku i ta na a cuwuka lista leyo kasi a nga rivali lezvi Jehovha a mu vhunisileko zvona. Loku u chava ku vhukelwa, alakanya lezvaku wenawu Jehovha i ta ku vhuna. — Mah. 13:6.

KORNELIYU A BHABHATISIWA

11. Zvini zva ku na zvi mahile ku Korneliyu a kanakana ku bhabhatisiwa?

¹¹ Lomu ka Bhibhiliya ku na ni cikombiso ca Korneliyu kambe. Korneliyu i wa hi “hosana ya zana” zvi wulako lezvaku i wa hi murangeli wa 100 wa masochwa ya butho ga Roma. (Miti. 10:1, nota.) Hi kota ya lezvo, i wa hi ni cikhundla ci nga maha lezvaku a masochwa ni vanhu van’wani va mu kombisa cichavo. Korneliyu “i wa vhuna nguvhu zvisiwana”. (Miti. 10:2) Jehovha i no rumela mupostoli Pedro lezvaku a ya mu byela mahungu ya manene. Xana a cikhundla ca Korneliyu ci mu mahile a hlwela ku bhabhatisiwa?

12. Zvini zvi vhunileko Korneliyu lezvaku a bhabhatisiwa?

¹² Zvini zvi vhunileko Korneliyu lezvaku a bhabhatisiwa? A Bhibhiliya gi wula lezvaku Korneliyu i wa “chava Nungungulu, yena ni vontlhe va ngango wakwe”. A cin’wani kambe, i wa khongela ka Nungungulu a nga tsiki. (Miti. 10:2) A cikhati leci Pedro a nga mu byela mahungu ya manene, yena ni ngango wakwe va no vhumela Kristu va tlhela va tekela ku bhabhatisiwa. (Miti. 10:47, 48) Handle ko kanakana, Korneliyu i wa ti yimisele ku cica ni cihi ci nga laveka kakwe kasi a khozela Jehovha zvin’we ni ngango wakwe. — Jox. 24:15; Miti. 10:24, 33.

13. Zvini u gondzako ka Korneliyu?

¹³ A ku fana na Sawule, kuzvilava Korneliyu na a tsikile a cikhundla leci a nga hi naco ci mu vhalela kuva muKristu. Kanilezvi a nga tsikangi ku lezvo zvi humelela. Xana u fanele ku cica zva hombe wutomini ga wena kasi u ringanelwa hi ku bhabhatisiwa? Loku zvi hi lezvo, Jehovha i tava Muvhuni wa wena. I ta katekisa kutiyimisela ka wena ka ku mu tirela hi kuyelana ni matshinya ya milayo ya Bhibhiliya.

14. A cikombiso ca Tsuyoshi ci nga ku vhunisa kuyini?

¹⁴ Tsuyoshi, wa le Japão, zvi lavile lezvaku a cica zvokari ka ntiro wakwe kasi a ringanelwa hi ku bhabhatisiwa. Tsuyoshi i wa hi muvhuneteli wa murangeli wa cikola ca Ikenobo ca ku gondzisa vanhu a ku veketela zvitsangi hi ndlela yo saseka. Loku a murangeli wakwe a nga hi kona ka marilo yo kari a kutala ka zvikhati Tsuyoshi hi yena a nga mu vhaleta ka mikhuwo ya ciBhudha. Hambulezvo, a cikhati leci a nga gondza lisine xungetano hi kufa, i no zvi zwisisa lezvaku i wa nga ta bhabhatisiwa loku a simama a hlengela ka mikhuwo leyo. I no maha ciboho ca ku a nga ha hlengeli ka mikhuwo ya ciBhudha. (2 Kor. 6:15, 16) Tsuyoshi i no wulawula ni murangeli wakwe hi mhaka leyi. Zvini zvi nga humelela? I simamile ni ntiro wakwe kanilezvi na a nga ha hlengeli ka mikhuwo ya ciBhudha. I no bhabhatisiwa andzhako ka lembe na a sangulile ku gondza Bhibhiliya.a Loku zvi lava lezvaku u cica zvokari ka ntiro wa wena kasi u tsakisa Nungungulu, tiyiseka lezvaku i ta ku khatalela wena ni ngango wa wena. — Lis. 127:2; Mat. 6:33.

A VAKORINTE VA BHABHATISIWA

15. Zvini zva ku na zvi vhalele a vaKorinte a ku va bhabhatisiwa?

¹⁵ A vanhu va nga hanya dhoropeni ga kale ga Korinte va wa ti randza nguvhu a titshomba niku va wa hi zvibhayi. A kutala kabye va wa hi ni mahanyela ma nga tsakisiko Nungungulu. Zvi laha kubaseni lezvaku ni wihi a nga wa ta amukela lisine zvi wa ta mu karatela. Hambulezvo, a cikhati leci Pawule a ngaya dhoropeni lego a ya chumayela mahungu ya manene xungetano hi Kristu ‘a vaKorinte vo tala lava va nga muzwa, va no kholwa va bhabhatiswa’. (Miti. 18:7-11) Hi kulandzela, Hosi Jesu i no woneka ka Pawule hi muwoniso a mu byela lezvi: “Ndzi na ni vanhu vo tala dhoropeni legi”. Hikwalaho, Pawule i no simama ka dhoropa lego hi lembe ni khihlanya a chumayela.

16. Zvini zvi vhunileko a vaKorinte vo kari lezvaku va kula va bhabhatisiwa? (2 Va Le Korinte 10:4, 5)

¹⁶ Zvini zvi vhunileko a vaKorinte lezvaku va bhabhatisiwa? (Lera 2 Va Le Korinte 10:4, 5.) A Mhaka ya Nungungulu ni moya wakwe wo basa zvi va vhunile ku va cica zvahombe wutomini gabye. (Mah. 4:12) A vaKorinte lava va nga amukela mahungu ya manene xungetano hi Kristu va zvi kotile a ku tsika a zvilo zvo kota wudhakwa, ni ku yiva ni ku hlengela masango ni vavasati-kuloni kutani vavanuna-kuloni. — 1 Kor. 6:9-11.b

17. Zvini u gondzako ka vaKorinte?

¹⁷ Wona lezvaku hambu lezvi a vaKorinte vo kari va nga fanele ku tsika ku maha zvilo lezvi zvi nga zimile timitsu a va alakanyangi lezvaku zvi ta va karatela nguvhu a kuva maKristu. Va no ti karata nguvhu kasi va famba hi ndlela yo hlongana yi yisako wutomini ga pindzukelwa. (Mat. 7:13, 14) Xana u kari u kulula u n’watseka kasi u hlula mukhuwo wo kari wo biha lezvaku u bhabhatisiwa? Simama kulwa! Kombela Jehovha hi mbilu yontlhe lezvaku a ku nyika moya wakwe wo basa kasi wu ku vhuna a ku u nga naveli ku maha zvakubiha.

18. U nga vhunekisa kuyini hi cikombiso ca Monika?

¹⁸ Monika, wa le Geórgia, i kululile a n’watseka kasi a tsika a mawulawulela ni mihlakano yo kala ku hlazveka kasi a bhabhatisiwa. I wula lezvi: “Na ndza ha hi muswa, leci ci nga ndzi vhuna ku cica ku khongela ka Jehovha. Jehovha i wa zvi tiva lezvaku ndzi lava ku maha lezvi zvi nga zvinene niku contlhe cikhati wa ndzi vhuna a tlhela ndzi rangela.” Monika i bhabhatisilwe na a hi ni 16 wa malembe. Xana zvi kona u faneleko ku zvi tsika kasi u tirela Jehovha hi ndlela leyi yi amukelekako kakwe? Simama ku mu kombela lezvaku a ku nyika ntamu kasi u cica. Jehovha i nyika moya wakwe wo basa na a nga feleli. — Joh. 3:34.

A KUKHOLWA KA WENA KU NGA KUNULA ZVITSUNGA

19. Zvini zvi nga ku vhunako ku hlula zvikarato zvo fana ni zvitsunga? (Wona ni mufota.)

¹⁹ Tiyiseka lezvaku Jehovha wa ku randza niku i lava lezvaku uva cipandze ca ngango wakwe. Lezvo lisine na ku nga khataliseki a zvikarato lezvi u kumanako nazvo kasi u bhabhatisiwa. Jesu i wulile lezvi ka ntlawa wo kari wa vapizani vakwe va zana ga malembe go sangula: “Loku mu hi ni kukholwa ko ringana ni mbewu ya cinapi mu ta wula ka citsunga leci muku: ‘Kunuka laha uya le’, ci ta kunuka; a ku na leci ci to mu tsandza.” (Mat. 17:20) Lava va ngazwa magezu lawo va wa hi ni malembe ma tsongwani na va hi na Jesu; hikwalaho a kukholwa kabye ku wa ha lava ku kula. Kanilezvi Jesu i va tiyisekisile lezvaku loku va hi ni kukholwa loku ku ringanako, Jehovha i ta va vhuna ku hlula zvikarato zvo fana ni zvitsunga. Wenawu Jehovha i ta ku vhuna!

20. A zvikombiso zva maKristu ya zana ga malembe go sangula ni zva masikwini ya hina zvi kumbukilweko ka ndzima leyi zvi ku kucisa kuyini?

²⁰ Loku u pola lezvi zvi ku vhalelako a ku bhabhatisiwa tekela kuba mazambo ma lavekako kasi ku zvi hlula. Chavelelwa u tlhela u tiyisiwa hi zvikombiso zva maKristu ya zana ga malembe go sangula ni zva masikwini ya hina. Ngha a zvikombiso zvabye zvi ku kuca a ku u ti nyikela ka Jehovha u tlhela u bhabhatisiwa. Leco hi cona ciboho ca cinene nguvhu u nga mahako wutomini ga wena!