Wa ha zvi alakanya ke?

Xana u gondzile zvi buvha a tindzima ta A Murindzeli wa lembe legi? A hi wone ku u nga zvi kota ku hlamula zviwutiso zvi landzelako:

Zvini zvi hi kucako ku mu nyika wudzundzo Jehovha?

Hi mu nyika wudzundzo Jehovha hakuva hi mu kombisa cichavo co eta niku ha mu randza. A cin’wani kambe, hi mu nyika wudzundzo hakuva hi lava ku a van’wani va mu tiva. — Murindzeli 01.25, paj. 3.

Loku a wokari a hi khunguvanyisa hi nga zvi kotisa kuyini ku mu tsetselela?

A hi zvibi hi makatla ntsena lezvi hi ti zwisako zvona; hambulezvo, a ku boha ku tsika zanga ni civiti zvi nga hi vhuna ku hi bohla hi tlhela hi nga xanisiwi hi civiti. — Murindzeli 02.25, paj. 15-16.

Hikuyini Marku a nga cikombiso cinene ka majaha?

Marku i vhumele ciavelo ca ku tirela van’wani. A cikhati leci Pawule a nga ala ku famba naye ka liendzo lakwe la wumbiri la wurumiwa, kuzvilava Marku zvi mu swirile zvi tlhela zvi mu bayisa, kanilezvi a zvi mu mbhetangi ntamu wa ku tirela vamakabye vakwe. I nova ni wunghana go tiya na Pawule ni man’wani maKristu yo buvha. — Murindzeli 04.25, paj. 27.

Jesu i wa lava ku wula yini a cikhati leci a nga khongela, aku: “Ndzi va tivisile a vito ga wena”? (Joh. 17:26)

A vapizani vakwe va wa sina va gi tiva a vito ga Nungungulu. Kanilezvi Jesu i va vhunile ku mu tiva khwatsi Jehovha, a ku patsa ni makungo yakwe, ni mitiro yakwe ni matshamela yakwe. — Murindzeli 05.25, paj. 20-21.

Loku hi ti koramisa zvini hi to zvi vhumela?

Ha vhumela lezvaku zvi kona hi kalako hi nga zvi tivi. Hi cikombiso, a hi zvi tivi ku a magumo ma tata rini kutani lezvi Jehovha a to zvi mahisa zvona zvilo cikhatini ci tako. Ahandle ka lezvo, a hi zvi tivi ku zvini zvi to humelela mandziko ne a hi zvi zwisisi hi kumbhelela lezvi Jehovha a hi tivisako zvona. — Murindzeli 06.25, paj. 15-18.

Zvini hi nga mahako kasi hi vhuneka khwatsi a cikhati hi lerako ndzima yo kari kutani ku ingisela kanelo?

Hi nga ti wutisa lezvi: ‘Zvikombiso muni zvi tirisiwako kasi ku kholwisa vaingiseli? Ku na ni mufananiso wa wunene ndzi nga wu tirisako a cikhati leci ndzi gondzisako? Himani a nga tsakelako mahungu lawa?’ — Murindzeli 07.25, paj. 19.

Hi gondza yini ka kutsetselela ka Nungungulu ka ndlela leyi a nga mu khoma hi yona Dhavhidha?

Hambu lezvi Dhavhidha a mahileko zviwonho zva hombe, a cikhati leci a nga ti sola zva lisine Jehovha i no mu tsetselela. (1 Tih. 9:4, 5) A cikhati leci Nungungulu a hi tsetselelako i tlhela a zvi rivala laha ka ku a nga ta ha hi tsayisa hi zvona cikhatini ci tako. — Murindzeli 08.25, paj. 17.

Zvini u nga mahako loku ku hi ni mhaka yo kari yi karatelako cigondzani ca wena a ku yi zwisisa?

Loku ku hi ni mhaka yo kari yi simamako ku mu karatela ku yi zwisisa, andzhako ka ku mu tlhamusela hi ku tirisa Bhibhiliya, tlulani muya ka mhaka yin’wani mu gumesa mu wuya. — Murindzeli 09.25, paj. 24.

Hikuyini a Bhibhiliya gi wulako lezvaku a ciwonho ci na ni “ntamu wa kukanganyisa”? (Mah. 3:13)

A ciwonho ci nga hi xengetela ku maha zvilo zvo biha. Ahandle ka lezvo, ci nga tlhela ci hi maha hi tshamela ku kanakana ku Jehovha wa hi randza. — Murindzeli 10.25, paj. 16.

Zvilo muni zva zvinharu hi nga mahako kasi a mikhongelo ya hina yiva yo zwala khwatsi?

1) Hi nga ehleketa hi matshamela ya Jehovha. 2) Hi nga ehleketa hi zvikarato lezvi hi kumanako nazvo hi zvi kumbuka mikhongelweni ya hina, zvo kota loku hi lava ku tsetselela wokari. 3) A hi faneli ku khongela hi kutsutsuma. Lezvo zvi ta hi vhuna ku hi zvi kota ku phofula lezvi hi ti zwisako zvona. — Murindzeli 10.25, paj. 19-20.

U nga va vhunisa kuyini lava va khosaheleko?

Hi nga vhuxela vakhosaheleko kutani ku va fonela. Hi nga tlhela hi va heleketa cipitali. Kutani ku chumayela navo hi tindlela to hambanahambana. — Murindzeli 11.25, paj. 6-7.

Hi zvihi a zvilo zva tshinya zvi nga mahako a muchadho wa wuKristu wuva wo dzundzeka?

Landzelani milayo ya mufumo. Mahani zvontlhe zvi kotekako kasi laha mubuzweni wa muchadho kuva ni kurula ku tlhela ku kombisiwa handzu wa moya wa Nungungulu. Vanani ni kuringanisela ka lezvi mu to boha mu tlhela mu potsa mikhuwo yi nga hiko ya wuKristu. Bhulani hi ndlela ya yinene laha mu longiselako muchadho. — Murindzeli 12.25, paj. 21-24