WA HA ZI ALAKANYA KE?

U gonzile zi buva a marevista A Murinzeli ma ha hi ku hunzako? Loku zi hi tano, zama ku hlamula a ziwutiso lezi zi lanzelako:

A xikhati lexi a kugumesa ku to chikela, hi zihi a zilo zo kari zi to gumesa?

A zilo zo kari zi to gumesa mifumo ya vanhu, tiyimpi ni wubihi, wukhongeli legi gi nga tsakisiko Nungungulu ni vanhu, zinwe ni vanhu va kubiha. — 1/5, pp. 3-5.

Himani Goge wa Magoge loyi a kumbukiwako ka bhuku ga Ezekieli?

Zi wonekisa ku khwatsi a ku Goge wa Magoge a zi wuli Satani, kanilezi zi wula kupatsana ka matiko lawa ma to zama ku hihirita vanhu va Nungungulu anzhako ka kusangula ka kuxaniseka ka hombe. — 15/5, pp. 29-30.

Hi zihi a ntlhanu wa zilo ni xinwe zi nga vunako munhu ku hanya khwatsi wukhosaneni gakwe?

A Biblia gi hi kuca lezaku 1) hi ti tsongahata, hi tiva xiyimo xa hina 2) hi nga hunzeleti zilo 3) hiva ni mawonela ma nene, 4) hi hana, 5) hi ranza ku tshama ni vanwani, ni 6) ku ranza kubonga. A ku kombisa a matshamela lawa zi nga vuna munhu lezaku a hanya khwatsi wukhosaneni. — 1/6, pp. 8-10.

A zihlamaliso za Jesu zi kombisisa kuyini kuhana kakwe?

Laha muchadweni le Kana, Jesu i lo hunzula a 380 wa tilitro ta mati ti maha vinya. Ka khati ginwani, i lo gisa a 5.000 wa vanhu hi xihlamaliso. (Mat. 14:14-21; Joh. 2:6-11) Ka makhati wontlhe lawo, i wa pimanyisa a wuhana ga Dadani wakwe. — 15/6, pp. 4-5.

Hikuyini hi nga tiyisekako lezaku hi nga mu tsakisa Nungungulu, hambu lezi hi nga mbhelelangiko?

A vavanuna vo kota Joba, Loti, na Davida va mahile zihoxo. Hambulezo, va wa lava ku tirela Nungungulu, va wa ti sola hi zionho zabye, niku va cicile mahanyela yabye. Va lo tsakelwa hi Nungungulu, niku hinawu hi nga zi kota. — 1/7, pp. 12-13.

Xana a kuloviswa ka Babuloni loyi wa Hombe ku ta maha lezaku vontlhe lava va lumbako wukhongeli ga mawunwa vafa ke?

Zi wonekisa ku khwatsi zi nga ta mahekisa lezo. Zakaria 13:4-6 i komba ku hambu vafundisa vo kari va ta tsika wukhongeli gabye va tlhela va kaneta lezaku va tshukile va maha xipanze xa wukhongeli ga mawunwa. — 15/7, pp. 15-16.

Hikuyini Barake a nga vumela kuya yimpini ntsena loku a famba na Debora?

Barake i wa hi wanuna wa kukholwa. Wutshanwini ga ku kombela Jehova lezaku a va engetela matlhari, i wa lava ku famba ni muyimeli wa Nungungulu — Debora — kasi ku mu tiyisa ni ku tiyisa vavanuna vakwe. (Vala. 4:6-8; 5:7) — 1/8, p. 13.

Hi zihi zilo zo kari lezi a muKristu a nga ehleketako hi zona?

A zokari zivangwa za Jehova, lisima la Mhaka yi pimisilweko ya Nungungulu, lungelo ga hina ga mukhongelo, ni lulamiselo gakwe ga liranzo ga nzhiho. — 15/8, pp. 10-13.

A ku potsa vanghana vo biha zi khumbisa kuyini a kugangisana?

A hi va vengi vanhu lava va nga kholwiko. Hambulezo, a ku gangisana ni munhu a nga ti hendleletangiko ka Nungungulu a tlhela a tsumbeka ka milayo yakwe zi wa ta lwisana ni xileletelo xakwe. (1 Kor. 15:33) — 15/8, p. 25.

Pedro i luzisile kuyini kukholwa kakwe a tlhela a wuyisa ke?

Hi kukholwa, mupostoli Pedro i lo famba hehla ka mati aya ka Jesu. (Mat. 14:24-32) Kanilezi, laha a nga cuwuka xingulo, Pedro i lo chava. Zalezo, i lo tlhelisa kupima kakwe ka Jesu a tlhela a vumela xivuno xakwe. — 15/9, pp. 16-17.

Mitiro 28:4 i wula lezaku a vanhu va le Melita va alakanyile lezaku mupostoli Paule i wa hi mudayi. Hikuyini va ngaza va alakanyela lezo?

Kuzilava a xikhati lexi Paule a nga lumiwa hi nyoka va alakanyile lezaku i wo tsayiswa Dike, a nungungulu wa kululama wa xisati. — 1/10, p. 9.

Xigonzo muni hi xi kumako ka lezi Marta a nga karateka hi mitiro yo tala?

Ka khati go kari, Marta i wa karatekela ku longiselela zakuga zo tala. Jesu i lo wula lezaku a makabye wakwe i hlawulile zilo za chukwana hi ku ingisela tigonzo takwe. Hi fanele ku ti wonela lezaku a zilo zi nga hiko na lisima zi nga hi colopeteli a mitiro ya hina ya moya. — 15/10, pp. 18-20.