ZIWUTISO ZA VAGONZI
Himani Goge wa Magoge loyi a kumbukiwako ka bhuku ga Ezekieli?
Hi malembe, a mabhuku ya hina ma tlhamusela Goge wa Magoge kota vito gi nyikilweko Satani Diabolus anzhako ka kuva a hlongolilwe le tilweni. A tlhamuselo lowu wu wa seketelwa ka lezi a bhuku ga Kuvululelwa gi tivekisako Satani kota murangeli wa kuvukelwa ka vanhu va Nungungulu misaveni yontlhe. (Kuv. 12:1-17) Hikwalaho, ku wa alakanyelwa lezaku Goge i vito ginwani ga wuprofeti ga Satani.
Kanilezi, a tlhamuselo lowu wu vuxa ziwutiso za lisima. Hi ndlela muni? Ehleketa hi lezi: Loku a wulawula hi kuhlulwa ka Goge, Jehova i wula lezi hi yena: “Nzi ta ku nyikela u giwa hi makoti ya tixakaxaka, ni zivanza za khwati.” (Ezek. 39:4) Hi kulanzela Jehova i engetela lezi: “A siku lego Goge nzi ta mu nyika wutshamu ga xilahla lomu tikweni ga Israeli . . . Lomo ku ta lahlelwa kona Goge ni xidlemo xakwe.” (Ezek. 39:11) Kanilezi a xivangwa xa moya xi nga giswa kuyini hi “makoti ya tixakaxaka, ni zivanza za khwati”? Satani a nga nyikiswa kuyini “wutshamu ga xilahla” laha misaveni? A Biblia gi komba ziku dlunya lezaku Satani i ta valelwa nkeleni wa lieswila hi 1.000 wa malembe; a gi wuli lezaku i ta giwa kutani ku lahliwa. — Kuv. 20:1, 2.
Hi byeliwa lezaku kumbheleni ka 1.000 wa malembe, Satani i ta humesiwa nkeleni wa lieswila, a “ya khohlisa a matiko ya mune wa matlhelo ya misava, Gog na Magog, a va tsombanyisela kulwa.” (Kuv. 20:8) Kanilezi Satani a nga mu khohlisisa kuyini Goge kuveni Goge wa kona hi yena wutsumbu? Hikwalaho, loku vaku “Goge” ka xiprofeto xa Ezekieli kutani ka bhuku ga Kuvululelwa a va wuli Satani.
Makunu himani Goge wa Magoge? Kasi ku hlamula xiwutiso lexi, hi fanele ku hlola Mitsalo kasi ku tiva loyi a vukelako vanhu va Nungungulu. A Biblia a gi wulawuli ntsena hi kuvukelwa kabye hi ‘Goge wa Magoge’ kanilezi, ga wulawula kambe hi kuvukelwa kabye hi “hosi ya le Nwalungu” ni kuvukelwa kabye hi “tihosi ta misava.” (Ezek. 38:2, 10-13; Dan. 11:40, 44, 45; Kuv. 17:14; 19:19) Xana lezo zi yimela kuvukelwa ko hambana? A zi wonekisi lezo. Handle ko kanakana a Biblia gi wulawula hi kuvukelwa kaloku ka kunwe hi mavito yo hambana. Hikuyini hi nga wulako lezo? Hi lezaku a Mitsalo yi hi byela lezaku a matiko wontlhe ma tava zinwe kuvukeleni loko ko gumesa loku ku to vuxa a yimpi ya Har–Magedoni. — Kuv. 16:14, 16.
Loku hi ringanisa zontlhe zipanze lezi za Mitsalo zi wulawulako hi kuvukelwa ka vanhu va Nungungulu, zi dlunya lezaku a vito Goge wa Magoge a gi wuli Satani, kanilezi gi wula kupatsana ka matiko. Xana a kupatsana loku ku ta rangelwa hi “hosi ya le Nwalungu” ke? A hi nge wuli hi kutiya. Kanilezi, a maalakanyo lawa ma wonekisa ku khwatsi ma longoloka ni lezi Jehova a nga wula xungetano hi Goge aku: “U ta suka wutshanwini ga wena le magemetamusi ya tlhelo ga Nwalungu, wena zinwe ni matiko manyingi; vontlhe na va khilele mahaxi, a xidlemo xa hombe ni yimpi ya ntamu.” — Ezek. 38:6, 15.
Muprofeti Danieli, loyi a hanyileko nguva yinwe na Ezekieli, yenawu i wula lezi xungetano hi hosi ya nwalungu: “A mahungu lawa ma ta nga huma hi le Mutsuwuka-gambo ni le Nwalungu ma ta mu karata. I ta huma hi zanga ya hombe nguvu a ku ya hlasela ni ku hihirita vo tala. I ta gwimba matenda yakwe ya wuhosi xikari ka bimbi ni xitsunga xa kubasa le’xo saseka nguvu. Kanilezi i taya gumelwa, a nga kona a to mu vunetela.” (Dan. 11:44, 45) Lezi zi longoloka khwatsi ni lezi a bhuku ga Ezekieli gi wulako xungetano hi mitiro ya Goge. — Ezek. 38:8-12, 16.
Zini zi mahekako hi kulanzela kota wuyelo ga kuvukela loko? Danieli i hi byela lezi: “Xikhatini lexo [yimpini ya Har–Magedoni] ku ta huma Mikaeli [Jesu Kristu], a hosana le’ya hombe yi yimelako a vana va tiko ga wena; ku tava ni zikhati za zikarato lezi zi kalako zi nga se huma kusukela a kusanguleni ka mifumo kala xikhatini lexo. Xikhatini xwalexo a vanhu va wena va ta tlhatlhiswa, vontlhe lava va ta nga kunwa na va tsalilwe bhukwini.” (Dan. 12:1) A ximaho lexi xa muyimeli wa Nungungulu, Jesu, xa tlhamuselwa kambe ka Kuvululelwa 19:11-21.
Kanilezi hi vamani va kumbukiwako kota “Gog na Magog” ka Kuvululelwa 20:8? Kuringweni ko gumesa kumbheleni ka 1.000 wa malembe, lava va to hluwukela Jehova va ta kombisa moya wa kudaya wo fana ni wa ‘Goge wa Magoge,’ ku nga matiko lawa ma to vukela a vanhu va Nungungulu kumbheleni ka kuxaniseka ka hombe. Niku a magumo ya mitlawa leyi hi wumbiri ga yona hi yalawa ya manwe — ku fela muphelo! (Kuv. 19:20, 21; 20:9) Makunu, zi wonekisa ku khwatsi za va fanela vontlhe vahluwuki lavo kumbheleni ka 1.000 malembe a ku vitanwa “Gog na Magog.”
Kota vanhu va gonzako a Mhaka ya Nungungulu hi wukheta, hi rinzela hi mahlo yo pswhuka a ku wona lezaku himani loyi lokuloku a to maha a ntiro wa “hosi ya le Nwalungu.” Kanilezi na ku nga khataliseki lezaku himani a to rangela a kupatsana loko ka matiko, ha tiyiseka hi zilo zimbiri: (1) Goge wa Magoge ni mabutho yakwe va ta hluliwa va tlhela va loviswa; niku (2) a Hosi ya hina yi fumako, Jesu Kristu, i ta ponisa a vanhu va Nungungulu a tlhela a va nghenisa misaveni yiswa ya kurula ni kutshamiseka ka lisine. — Kuv. 7:14-17.