Lirandzo

A VANHU VONTLHE VA LAVA LIRANDZO. A ku na wukati, ngango kutani wunghana zvi tiyako na ku nga hi na lirandzo. Hikwalaho zvi na ni cigelo a kuva a lirandzo li hi la lisima kasi ku hanya khwatsi hi tlhelo ga maalakanyo ni kuva ni litsako. Kanilezvi hi lihi lirandzo li wuliwako laha?

A hi lirandzo la wanuna ni wasati, leli lonawu li nga la lisima. Kanilezvi lixaka lo tlakuka la lirandzo li mahako munhu a khatala nguvhu hi kutshamiseka ka van’wani, a ku hundza ka yena. Lirandzo li rangelwako hi matshinya ya milayo, kanilezvi lonawu la patsa lirandzo lo eta ni kutizwa.

A lirandzo li tlhamuselwa khwatsi hi magezu lawa: ‘A lirandzo li na ni lihlazva-mbilu, li nene; a lirandzo a li na makangwa; a lirandzo a li ti mahisi matshandza, a li ti kukumukisi, a li mahi lezvi zvi nga faneliko, a li ti laveli zva lona, a li na kuzangara, a li alakanyeli hi kubiha loku li mahelweko kona; a li tsaki hi lezvi zvi nga lulamangiko, kanilezvi li tsakelana ni zvinene. Li nonoka ku zwata zvilo zvontlhe, li tsumba zvilo zvontlhe, li timisela zvilo zvontlhe. A lirandzo cima li nga ta fuva.’ — 1 Va Le Korinte 13:4-8.

A lirandzo lelo “cima li nga ta fuva,” lezvi zvi wulako ku li ta tshama kala kupindzuka. Kunene a lirandzo li kula li tiya hi kufamba ka cikhati. Niku kota lezvi li nga ni lihlazva-mbilu, ni wunene, ni ku tsetselela, li maha ‘ciboho ca kumbhelela.’ (Va Le Kolosi 3:14) Hikwalaho a wunghana gi bohilweko hi lirandzo lelo ga tiya gi tlhela gi tsakisa, hambu lezvi gi wumbiwako hi vanhu vo kala kumbhelela. Hi cikombiso, ehleketa hi kubohana ka nuna ni sati.

KU BOHIWA HI ‘CIBOHO CA KUMBHELELA’

Jesu Kristu i gondzisile matshinya ya milayo ya lisima ya wukati. Hi cikombiso, i wulile lezvi: ‘A wanuna i ta siya a raru wakwe ni nyine wakwe, a namarela ka sati wakwe; lava vambiri va ta maha nyama yin’we. Hikwalaho leci Nungungulu a ci tlhanganyisileko, ngha ci nga hambanyiswi hi munhu.’ (Matewu 19:5, 6) Ka mhaka leyi hi kuma matshinya mambiri ya lisima.

‘LAVA VAMBIRI VA TA MAHA NYAMA YIN’WE.’ A wukati kubohana ka hombe ka ku hundza kontlhe ku nga kona cikari ka vanhu, niku a lirandzo li vhikela kungatsumbeki — kaku a nuna kutani sati a maha “nyama yin’we” ni munhu mun’wani wo kala a nga hi sati kutani nuna wakwe. (1 Va Le Korinte 6:16; Mahebheru 13:4) A kungatsumbeki ku daya kutsumbana niku ku hohlota wukati. Loku ku hi ni vanana, va nga ha tizwa na va nga randziwi, va nga vhikelekangi hambu kuva ni civiti.

‘LECI NUNGUNGULU A CI TLHANGANYISILEKO.’ A wukati kambe kubohana ku basileko mahlweni ka Nungungulu. A nuna ni sati lava va yi nyikako cichavo a mhaka leyi va ti karatela ku tiyisa wukati gabye. A va hloti tindlela ta ku tlhatlha wukati loku ku humelela zvikarato. A lirandzo labye li tiyile. A lirandzo lelo ‘li nonoka ku zwata zvilo zvontlhe,’ li vhuna nuna ni sati lezvaku va lulamisa zvikarato kasi ku hlayisa kuzwanana ni kurula.

Loku a vapswali va randzana hi lirandzo lo eta, zvi va vhuna nguvhu a vana laha ngangweni. A n’wana wo kari waku hi Jessica i te: “Mamani na papayi va randzana va tlhela va kombana cichavo. A ku wona mamani na a mu komba cichavo papayi, zvi ndzi maha ndzi lava ku mu pimanyisa.”

A lirandzo hi gona a tshamela ga hombe ga Nungungulu. Hi lisine a Bhibhiliya gi li: ‘Nungungulu lirandzo.’ (1 Johani 4:8) Hikwalaho a zvi hlamalisi lezvi Jehovha a vitaniwako kambe ku i “Nungungulu loyi a bongekako” kutani wo tsaka. (1 Timote 1:11) Hinawu hi ta tsaka loku hi ti karata hi pimanyisa a matshamela ya Muvangi wa hina — nguvhunguvhu a lirandzo lakwe. A bhuku ga Va Le Efesusi 5:1, 2 gi li: ‘Mahani vapimanyisi va Nungungulu, khwatsi hi vanana va randzekako, mu famba hi lirandzo.’