Ya wu 9: Wumunhu ga wena

LEZVI ZVI WULAKO ZVONA

A wumunhu ga wena a gi gumelwi ka vito ga wena ni kucuwukeka. Gi patsa a mahanyela ya wena, lezvi u zvi kholwako ni matshamela ya wena. Hi lisine a wumunhu ga wena hi zvontlhe zva le ndzeni ni le handle.

HIKUYINI ZVI NGA ZVA LISIMA?

Loku u zvi tiva khwatsi lezvaku hi wena mani, u ta zvi kota ku yimela lezvi u zvi kholwako wutshan’wini go vhumela ku kokiwa hi vanghana.

“A vanhu vo tala va fana ni zvibhonekana lezvi va hayekelako ka zvona tinguwo lomu zvitolo. A zvi hlawuli tinguwo leti zvi bohako; zvo bohisiwa.” — Adrian.

“Ndzi gondzile ku yimela zva zvi nene hambu loku zvi karata. Ndza zvi kota ku tiva lezvi a vanghana va mina va lisine va nga zvona hi lezvi va zvi mahako ni lezvi ndzi mahako loku ndzi hi navo.” — Courtney.

TSHINYA GA NAYO GA BHIBHILIYA: ‘Ngha mu nga pimanyisi a tiko ga nguva leyi; kanilezvi ngha mu hundzuluswa hi ku mahiwa luswa a kupima ka n’wina.’ — Va Le Roma 12:2.

LEZVI U NGA MAHAKO

Ti karatela ku tiva lezvi u nga zvona zvezvi ni lezvi u lavako kuva zvona hi ku hlola lezvi u zvi kotako ku maha, lezvi u zvi tsandzekako ni lezvi u kholwako. A ndlela yi nene ya ku maha lezvo ku hlamula a zviwutiso lezvi zvi landzelako.

Lezvi u zvi kotako ku maha: Wutlhari muni ndzi nga nago? Zvilo muni ndzi zvi kotako khwatsi? (Hi cikombiso: Ndza hlayisa cikhati? Ndza ti khoma? Ndza tira hi kutikarata? Ndza hana?) Zvilo muni zva zvi nene ndzi mahako?

MAWONELA: Zva ku karatela a ku pola zvilo zva zvi nene u nga maha kutani ku wula? Wutisa mupswali wa wena kutani munghana wo tsumbeka a ku zvini u zvi kotako khwatsi ku maha niku hikuyini.

TSHINYA GA NAYO GA BHIBHILIYA: ‘Ngha munhu ni munhu a hlola a ntiro wakwe, hi kona a to zvi kota ku ti kulisa hi lezvi a nga zvona, na ku nga hi ku ti fananisa ni van’wani.’ — Va Le Galatiya 6:4.

Lezvi u zvi tsandzekako: Matshamela muni ya wumunhu ga mina ndzi faneleko ku ma chukwatisa? Hi kwihi laha ndzi byekelelako nguvhu a ku wela ciringweni? Hi ka zviyimo muni zvi lavako ku ndzi ti khoma?

TSHINYA GA NAYO GA BHIBHILIYA: ‘Loku hina hiku ngalo a hi na kuwonha, ha ti khohlisa.’ — 1 Johani 1:8.

Lezvi u kholwako: Hi wahi mahanyela ya mina niku hikuyini ndzi hanyisako lezvo? Ndza kholwa ka Nungungulu? Zvini zvi ndzi kholwisako lezvaku Nungungulu i kona? Zvilo muni ndzi zvi wonako na zvi nga lulamangi, niku hikuyini? Zvini ndzi kholwako ku zvi ta maheka cikhatini ci tako?

TSHINYA GA NAYO GA BHIBHILIYA: “A kualakanya ku ta ku langutela, ni kupimisisa ku ta ku hlayisa.” — Mavingu 2:11.