Randza van’wani

Ka mhaka leyi

A cihlawulela a ci mbheli zva nyamutlha para mandziku. A ku fana ni cipungwani (virus) ca mababyi ci mbhetako a cikhati co leha kasi ku ci susa mirini, a ku susa cihlawulela zvi lava ku tikarata ni ku zvi mbheta cikhati ci leha. Zvini u nga mahako kasi u tsuwula cihlawulela leco?

Tshinya ga nayo ga Bhibhiliya

Mufota: 1. Wanuna wa le Ásia a vhulelako livati a wanuna wa mulandi a nga khoma a tikopo ta caya. 2. A wanuna yaloyi wa mulandi wonwa caya ni vatiri kuloni zvin’we ni wanuna wa le Asia a nga mu vheulela livati kusanguleni.

“Ambalani lirandzo, hakuva a lirandzo li zwananisa vanhu vontlhe.” — VA LE KOLOSI 3:14.

Lezvi zvi wulako zvona: A ku va mahela zvilo zva zvi nene van’wani zvi wumba wunghana. Laha hi yaku hi kombisa a lirandzo hi van’wani, a cihlawulela ci taya ci mbhela. Loku contlhe cikhati u ti karatela ku randza van’wani, a cihlawulela ci ta vhumala ndawu ya ku tshama kona.

Lezvi u nga mahako

Alakanyela hi tindlela to kari u nga kombisako hi tona lirandzo ka vanhu va midhawuku u nga yi woniko khwatsi. A zvizi zvi lava ku uya hi ku tsala tindlela leto. Ka tindlela leti ti landzelako, zama ku landza yin’we kutani tontlhe

Ni cihi hi nga mahako kasi ku kombisa a lirandzo, hambu loku ci hi citsongwani ci nga hlongola cihlawulela

Kombisa matshamela ya manene ka vanhu lavo, hi ku va nyesela wundawu go tshama loku mu hi lomu xapeni.
Zama ku va bhulisanyana hambu loku va nga li tivi khwatsi a lirimi la wena.
Vana ni lihlazwa-mbilu loku va maha zvilo hi ndlela yo kala ku toloveleka ka wena.
Kombisa kuzwela-wusiwana loku va wulawula hi zvikarato zvabye.

Zvikombiso zva zvilo zvi mahekileko: Nazaré (Guiné-Bissau)

“Ndzi wa hi ni cihlawulela hi valuveli va nga nghena tikweni ga hina. Ndzi wa byelilwe lezvaku a valuveli lavo va wa kanganyisile mufumo kasi va ganya mali niku a kutala kabye va wa hi zvigevenga. Lezvi zvi mahile ku zvi ndzi karatela ku va amukela. Hambulezvo, ndzi wa nga vhumeli lezvaku ndzi wa hi ni cihlawulela, hakuva a votala lomu ka hina va wa va wonisa zvezvo.”

“Hi ku famba ka cikhati ndzi no zvi pola lezvaku ndzi na ni cihlawulela hi valuveli. A handle ka kuva ni cihlawulela, a wutlhari ga Bhibhiliya gi ndzi vhunile ku va randza. Zvezvi a ndza hi na cihlawulela, ndza va losa niku ndza bhula navo. Ndzi zama ku tiva matshamela ya mun’we ni wun’wani wabye. Zvezvi ndza va wona khwatsi, niku ndzi tizwa khwatsi hi vona.”