Muri wa hombe wa ku hlula cihlawulela
A vanhu va timiliyoni va landzele a milayo leyi yi kumbukilweko kusanguleni kasi ku hlula cihlawulela va nga hi naco timbilwini tabye. Lisine ku hi nge zvi koti a ku hlula a cihlawulela hi ntamu wa hina wutsumbu. Hikwalaho hi fanele ku wula ku ne a hi faneli ku maha cokari?
Mawonela yo tala ya mufumo xungetano hi cihlawulela
A mifumo ya vanhu a yi zvi koti a ku hlula a cihlawulela. Kanilezvi lezvo zvi lava ku wula ku a kuna mufumo wu nga zvi kotako ku mbheta cihlawulela?
A mufumo wu to mbheta cihlawulela wu ta
1. Kuca vanhu kasi va cica a ndlela leyi va pimisako hi yona ni lezvi va ti zwisako zvona hi vanʼwani.
2. Mbheta a cikarato ci mahako ku zvi karata ku va khoma khwatsi van’wani.
3. Tava ni varangeli va va nene vo tsumbeka va to simama kala kupindzuka na va nga hi na cihlawulela.
4. Tlhanganyisa vanhu va midhawuku yontlhe.
A Bhibhiliya gi hi tiyisekisa lezvaku Nungungulu i vangile Mufumo. Wu vitaniwako ku “Mufumo wa Nungungulu.” — Luka 4:43.
Wona lezvi a Mufumo lowo wu zvi to tisa:
1. Gondziselelo yo tlakuka
‘A vaaki va yona va [ta] gondza kululama.’ — ISAYA 26:9.
‘A ntiro wa kululama wu tava kurula, ni mihandzu ya kululama yi tava kuhumula ni kutsumba kala kupindzuka.’ — ISAYA 32:17.
Lezvi zvi wulako zvona: A Mufumo wu ta gondzisa kululama. A cikhati leci a vanhu va to tiva zva zvi nene ni zvo biha — zva ku lulama ni zvo kala kululama — a mawonela yabye hi mun’we ni mun’wani ma ta cica. Vontlhe va ta zvi tiva a ku maha zva zvi nene ka van’wani ni ku randza a vanhu vontlhe.
2. A Mufumo wa Nungungulu wu ta mbeta a kubiha
Nungungulu “i ta kulula mihloti yontlhe matihlweni yabye, ku nga ta hava ni kufa, hambu ni hlomulo, kutani kurila, ni kubayisa, hakuva a zvilo zva kale zvi hundzile.” — KUVHULULELWA 21:4.
Lezvi zvi wulako zvona: A Mufumo wa Nungungulu wu ta mbheta kubayisa kontlhe ku vangiwako hi ku karateka. Makunu a ku nga ta hava ni cighelo ci to maha vanhu va xaniseka.
3. Wurangeli ga ginene
‘I ta tsakela ku chava Jehovha. A nga ta lamula hi lezvi a matihlo yakwe ma zvi wonako, ge hambu ku kona hi kuzwa ka tindleve takwe. Kanilezvi lava va vhumalako i ta va lamula hi kululama, a lamula hi nongameto a timhakeni ta lava va tsimbeketilweko misaveni; i taba misava hi nhonga ya nomu wakwe.’ — Isaya 11:3, 4.
Lezvi zvi wulako zvona: Jesu Kristu, a Hosi ya Mufumo wa Nungungulu wa le tilweni, i ta fumela misava yontlhe hi kurula. Jesu a nga ta nyika lisima a lixaka lo kari a chepeta lin’wani, niku yena i ta tiyiseka lezvaku a vanhu vontlhe va ta ingisa milayo yakwe.
4. Wumun’we
A Mufumo wa Nungungulu wu gondzisa vanhu kasi va va ni ‘kupima kun’we, [va va] ni lirandzo lin’we, va zwanana zvilweni zvontlhe, ni lezvaku va pimisa cilo cin’we’. — VA LE FILIPI 2:2
Lezvi zvi wulako zvona: A zviga-tshomba zva Mufumo wa Nungungulu a zvi nga tava ni kuzwanana basi, kanilezvi zvi tava ni wumun’we go mbhelela hakuva vontlhe va ta randzana.