MIHLAMULO YA BIBLIA
Hikuyini hi faneleko ku maha mukhongelo wa lezaku a Mufumo wa Nungungulu wuta?
Wa zi lava ku tiva zinwani hi Mufumo wa Nungungulu ni lezi wu to zi maha?
A Mufumo wa Nungungulu wukosi ga le tilweni. Jesu i byelile vapizani vakwe a ku va kombela lezaku a Mufumo lowo wuta hakuva wu ta neha kululama ni kurula laha misaveni. A ku na mufumo wa vanhu wu nga ni ntamu wa ku fuvisa hi kumbhelela a wugevenga, wubihi, kutani mababyi, kanilezi a Mufumo wa Nungungulu wu nga zi kota niku wu ta zi fuvisa futsi. Nungungulu i hlawulile a N’wana wakwe, Jesu, lezaku ava Hosi ya Mufumo lowo. Jehova kambe i hlawulile a ntlawa wa valanzeli va Jesu lezaku va ta fuma zinwe na Jesu Mufunweni lowo. — Gonza Luka 11:2; 22:28-30.
Lokuloku, a Mufumo wa Nungungulu wu ta lovisa vontlhe va lwisanako nawo. Hikwalaho, a xikhati lexi hi mahako mukhongelo wa lezaku a Mufumo wa Nungungulu wuta, hi kombela lezaku wuta wu ta valeta a mifumo yontlhe ya vanhu. — Gonza Danieli 7:13, 14; Kuvululelwa 11:15, 18.
Hikuyini a Mufumo wa Nungungulu wu to vuna vanhu?
Jesu i Hosi yi ringanelwako khwatsi, hakuva munhu wo zwela wusiwana. Kota N’wana wa Nungungulu, i na ni ntamu kambe wa ku vuna vontlhe la’va rilako ka Nungungulu va kombela ku vuniwa. — Gonza Tisimu 72:8, 12-14.
A Mufumo wa Nungungulu wu ta vuna vontlhe va mahako mukhongelo wa mbilu yontlhe wo kombela lezaku wuta, va tlhela va hanya hi kuyelana ni kuranza ka Nungungulu. U nga ta tshuka u ti laya hi ku gonza lezi a Biblia gi zi wulako hi Mufumo wa Nungungulu. — Gonza Luka 18:16, 17; Johani 4:23.