Jakobe A Famba Harani

A VA tiva a ku hi vamani vavanuna lava va wulawulako na Jakobe? Jakobe i va kumile laha hlobyeni, anzhako ka ku ngha a fambile masiku yo tala. Vona va wa risa tiyivu tabye. Jakobe i lo va wutisa: ‘Muta hi kwihi?’

Vona va lo hlamula vaku: ‘Harani.’

Jakobe a wutisa aku: ‘Ma mu tiva Labani?’

Va hlamula vaku: ‘Ina. Cuwuka, hi gaya Rakeli a nhanyana wakwe a tako ni tiyivu takwe.’ Wa mu wona Rakeli a tako hi seniya?

Loku Jakobe a wonile Rakeli ni tiyivu ta Labani, makabye wa mamani wakwe, i lo ya wumbuluta ribye hi laha hlobyeni kasi ku nwisa tiyivu. Anzhako ka lezo, Jakobe i lo pswopswa Rakeli a mu byela a ku hi yena mani. Rakeli i lo tsaka nguvu, a tlhela kaya a ya byela raru wakwe Labani.

Labani i lo xalala nguvu hi kuva a tshama na Jakobe. Kambe laha Jakobe a nga kombela ku teka Rakeli, Labani i lo tsaka. Kasike Labani i lo kombela Jakobe a ku tira ntlhanu wa malembe ni mambiri sinwini gakwe hi kota ya Rakeli. Jakobe i lo maha lezo hakuva i wa mu ranza nguvu Rakeli. Kanilezi wa zi tiva lezi zi nga maheka loku xi chikele xikhati xa ku va tekana?

Labani i lo nyikela Lea, a nhanyana wakwe wa nhonzwa, ka Jakobe wutshanwini ga Rakeli. Loku Jakobe a vumelile a ku tirela Labani manwani malembe ya ntlhanu ni mambiri, Labani i lo mu nyikawo Rakeli a kuva sati wakwe. Xikhatini lexo Nungungulu i wa vumela vavanuna a kuva ni vasati vanyingi. Kanilezi, makunu a wanuna i fanele kuva ni sati munwe ntsena, kota lezi a Biblia gi kombako.