Jakobe na Esawu va maha kurula

Jehovha i tsumbisile Jakobe lezvaku i wa ta mu vhikela a ku fana ni lezvi a nga vhikela Abrahama na Isaka. Jakobe i no ya tshama ka wutshamu gi vitaniwako ku Harani; i no chadha kwaseyo, a pswala vana vo tala a tlhela a ganya nguvhu.

Jehovha i no gumesa a byela Jakobe, aku: ‘Tlhela tikweni ga wena legi u nga pswaliwa kona’. Hikwalaho, Jakobe ni ngango wakwe va no sangula lipfhumba la hombe la ku tlhela kaya. Na va hi lomu ndleleni, Jakobe i no khingiwa hi vanhu vo kari va ta mu byela lezvi: ‘A makabye wa wena Esawu wata, i na ni 400 wa vavanuna’! Jakobe i no chava hi ku alakanya lezvaku Esawu i wa hi lomu ka ku hlota yena ni ngango wakwe kasi ku va mahela kubiha. Hikwalaho, i no khongela ka Jehovha, aku: ‘Ndza ku kombela, ndzi ponise ka makabye wa mina’. Ka siku gi nga landzela, Jakobe i no rumela zvifuyo zvo kari ka Esawu kota cinyikiwo — a tiyivhu, ni timbuti, ni tihomu, ni makameli, ni timbongola.

Ni wusiku ga kona, na a hi yece, Jakobe i no wona ngilozi! A ngilozi leyo yi no sangula ku pfinyana naye. Va no pfinyana kala gica. Hambu lezvi Jakobe a nga bayisiwa, a nga yi tsikangi. A ngilozi yi te: “Ndzi tsike ndzi famba”. Kanilezvi Jakobe i no hlamula aku: ‘Nyawowe! Ndzi nga ta ku tsika, kala u ndzi katekisa’.

Hi kugumesa, a ngilozi yi no mu katekisa. Jakobe i no tekela ku zvi wona lezvaku Jehovha i wa nga ta tsika Esawu a mu mahela kubiha.

Ni mixo ya kona, Jakobe i no cuwuka hi le kulenyana, a wona Esawu na a hi ni 400 wa vavanuna. Jakobe i no ranga a siya ngango wakwe a ya khizama 7 wa makhati mahlweni ka makabye wakwe. Esawu i no khinga Jakobe hi kutsutsuma a ya mu bharasara. Hi wumbiri gabye va no rila va gumesa va maha kurula. U alakanya ku Jehovha i ti zwisile kuyini hi ku wona lezvi Jakobe a nga yi lulamisisa zvona a mhaka leyi?

Va no gumesa va hambana. Esawu a tlhela kaya kakwe, Jakobe a simama ni lipfhumba lakwe. Jakobe i wa hi ni 12 wa vana. A mavito yabye ku wa hi Rubheni, Simeyoni, Levhi, Judha, Naftali, Dhani, Gadhi, Axeri, Isakari, Zebhuloni, Josefa na Bhenjamini. A mun’we wa vana lavo — ku nga Josefa — i tirisilwe hi Jehovha kasi ku ponisa vanhu vakwe. Wa zvi tiva ku hi ndlela muni? Hi ta zvi wona ka cigondzo ci landzelako.