Jakobe a kuma tshomba

A cikhati leci Isaka a nga hi ni cipimo ca 40 wa malembe i no chadha na Rebheka. Isaka i wa mu randza nguvhu Rebheka. Hi kufamba ka cikhati, va no pswala mahahla — majaha mambiri.

Loyi wa nhondzo i no chuliwa ku hi Esawu, loyi wa ndzisana a chuliwa ku hi Jakobe. Esawu i wa randza ku tshama lomu khwatini a hlota. Kanilezvi, Jakobe i wa randza ku tshama laha kaya.

Cikhatini leco, a n’wana wa nhondzo hi yena a nga nyikiwa petso wa hombe ni mali yo tala loku a papayi wabye afa. Lezvo zvi wa vitaniwa ku i tshomba. Laha ngangweni wa Isaka, a tshomba leyo yi wa patsa ku a munhu a patseka ka zvitsumbiso lezvi Jehovha a mahileko ka Abrahama. Esawu i wa nga hi na mhaka ni zvitsumbiso lezvo, kanilezvi Jakobe i wa zvi nyika nguvhu lisima.

Ka siku go kari, Esawu i no wuya hi kuhloteni na a karele nguvhu. Laha a ngazwa masema ya ma nene ya zvakuga lezvi Jakobe a nga kari a bhika, ite: ‘Ndzafa hi ndlala! Ndzi chelele a muru lowo wo pswhuka’! Jakobe a mu byela lezvi: ‘Ndzi ta ku nyika. Kanilezvi ranga hi ku ndzi tsumbisa ku u ta ndzi nyika tshomba ya wena’. Esawu a mu hlamula lezvi: ‘A ndzi na mhaka ni tshomba ya mina! U ta yi kuma. Mina ndzo lava kuga basi’. Hi mawonela ya wena, Esawu i mahile ciboho ca cinene ke? Ahihi. Esawu i nyikele nchumu wa lisima nguvhu, hi kota ya ngelo wa zvakuga basi.

Laha Isaka a nga kumbile, ku wa hi cikhati ca ku a katekisa n’wana wakwe wa nhondzo. Kanilezvi Rebheka i no vhuna Jakobe, a n’wana wabye wa ndzisana, lezvaku a kuma cikatekiso. Laha Esawu a nga zvi tiva, i no zangara nguvhu a gumesa a maha makungo ya ku daya a hahla gakwe. Isaka na Rebheka va wa lava ku vhikela Jakobe. Hikwalaho, va no mu byela lezvi: ‘Famba u ya tshama ni tio wa wena Labani, a makabye wa mamani, kala Esawu a bohla zanga yakwe’. Jakobe i no ingisa lezvi a mamani wakwe ni papayi wakwe va nga mu byela, a tsutsuma kasi a nga dawi.