A Mufumo Wu Avanyisiwa

WA ZI tiva a ku hikuyini wanuna loyi a hanzulelako a nguwo yakwe yi maha zipanze ke? Jehova i lo mu byela ku maha lezo. A wanuna loyi hi Ahija a muprofeti wa Nungungulu. Wa zi tiva a ku xini muprofeti? Munhu loyi a tivisiwako hi Nungungulu na ka ha hi mahlweni hi zilo lezi zi to maheka.

Ahija i laha na a wulawula na Jeroboamu. Jeroboamu wanuna loyi a vekilweko hi Solomoni lezaku a rangela mitiro yo kari ya kuaka kakwe. Laha Ahija a tlhanganako na Jeroboamu laha ndleleni, yena Ahija i maha nchumu wo hlamalisa. Yena i tlhatlha a nguwo ya yiswa leyi a bohileko a yi hanzulela yi maha 12 wa zipanze. Yena i byela Jeroboamu ku ngalo: ‘Teka a 10 wa zipanze zi maha za wena.’ Wa zi tiva a ku hikuyini Ahija a nyikako Jeroboamu a 10 wa zipanze?

Ahija i mu tlhamusela lezaku Jehova i ta wutla a mufumo ka Solomoni. A tlhela aku ngalo Jehova i ta nyikela a 10 wa tixaka ka Jeroboamu. Lezo zi wula ku ngalo a n’wana wa Solomoni Rehoboamu i ta salelwa hi tixaka timbiri ntsena a kuva a ti fumela.

Laha Solomoni a zwako lezi Ahija a byelileko Jeroboamu, i zangara nguvu. Yena i zama ku daya Jeroboamu. Kanilezi Jeroboamu i tsutsuma aya Gipite. Solomoni ifa loku ku hunzile xikhati xo kari. Yena ive hosi a 40 wa malembe, kanilezi a n’wana wakwe Rehoboamu i mahiwa hosi makunu. Kwale Gipite Jeroboamu izwa lezaku Solomoni i file, hizalezo yena i wuya Israeli.

Rehoboamu a hi hosi ya yi nene. Futsi yena i ti komba a hi wo biha nguvu ka vanhu ku hunza lezi raru wakwe Solomoni a ngave zona. Jeroboamu ni vanwani vavanuna vo chaveka vaya ka Hosi Rehoboamu vaya mu kombela lezaku ava mu nene ka vanhu. Kanilezi Rehoboamu a nga va ingisi. Hakunene, yena i maha wo biha nguvu ku hunza lezi a ngave zona kusanguleni. Hikwalaho a vanhu va maha Jeroboamu ava hosi ya tixaka ta 10, kanilezi a tixaka timbiri ta Benjamini na Juda ti simama ku veka Rehoboamu kota hosi yabye.

Jeroboamu a nga lavi lezaku a vanhu vakwe vaya Jerusalema a kuya khozela le tempeleni ya Jehova. Hikwalaho yena i maha marole mambiri ya nzalama zonake a hambukisa vanhu va mufumo wa tixaka ta 10 lezaku va ma khozela. Hi xikhatanyana a tiko gi tala hi wugevenga ni timholova.

Ku na ni zikarato lomu mufunweni wa tixaka timbiri na konawu. Na ma nga se ku tlhangana a ntlhanu wa malembe anzhako ka loku Rehoboamu a mahile hosi, a hosi ya Gipite yita a ku talwa ni Jerusalema. Yona yi phanga a titshomba to tala lomu tempeleni ya Jehova. Hikwalaho a tempeli yi simamisa lezi yi nga akisilwe zona a xikhati xo koma ntsena.