A Mufumo wu avanyisiwa

A cikhati leci Solomoni a nga khozela Jehovha, le Izrayeli ku wa hi ni kurula. Kanilezvi, Solomoni i no chadha ni vavasati vo tala va matiko man’wani. A vasati lavo va wa khozela zvifananiso. Solomoni i no cica hi kutsongwani-kutsongwani, yenawu a sangula ku khozela zvifananiso. Jehovha i no zangara, a byela Solomoni, aku: ‘Izrayeli i ta susiwa lixakeni la wena a tlhela a avanyisiwa hi zvipandze zvimbiri. Ndzi ta nyikela cipandze ca hombe ka mun’we wa malandza ya wena, niku a lixaka la wena li ta fumela cipandze leci ca citsongwani basi’.

Jehovha i no maha lezvaku a ciboho cakwe ci woneka khwatsi hi ndlela yin’wani. I zvi kombisile a cikhati leci Jerobhowamu, a nandza ga Solomoni, a nga kari a famba a gumesa a kumana na muphrofeti Ahija laha ruweni. Ahija i no handzula a nguwo yakwe yi huma 12 wa zvipandze a gumesa a byela Jerobhowamu, aku: ‘Jehovha i ta susa mufumo wa Izrayeli lixakeni la Solomoni a wu avanyisa hi zvipandze zvimbiri. Teka 10 wa zvipandze laha ka lezvi hakuva u ta fumela 10 wa tixaka’. Hosi Solomoni i no zvi tiva lezvo a zama ku daya Jerobhowamu! Hikwalaho, Jerobhowamu i no tsutsuma aya Gibhite. Hi kufamba ka cikhati, Solomoni i nofa, a n’wana wakwe Rehobhowamu a maha hosi. Makunu, Jerobhowamu i no zvi wona na zvi ringana ku tlhela Izrayeli.

A madhota ya Izrayeli ma no byela Rehobhowamu, maku: ‘Loku u va khoma khwatsi vanhu, va ta ku ingisa’. Kanilezvi, a majaha yo kari ma nga hi vanghana va Rehobhowamu, ma no mu byela lezvi: ‘Wena sa, va xanise u tlhela u va nyika mitiro ya ku bindza nguvhu’! Rehobhowamu i no ingisa a wusungukati ga vanghana vakwe. I no xanisa vanhu va se tsika ku mu ingisa. Va no yimisa Jerobhowamu kota hosi ya 10 wa tixaka. A cipandze leco, ci gumesile ci tiviwa kota mufumo wa Izrayeli. A cipandze leci cin’wani ca tixaka timbiri, ci no tiviwa kota mufumo wa Judha. A tixaka leto, ti no ingisa Rehobhowamu. A 12 wa tixaka ta Izrayeli makunu ti wa avanyisilwe.

Jerobhowamu i wa nga zvi lavi lezvaku a vanhu vakwe vaya le Jerusalema va ya khozela, lomu ku nga fumelwa hi Rehobhowamu. Wa zvi tiva ku hikuyini? Jerobhowamu i wa chava lezvaku va nga mu tsika, va seketela Rehobhowamu. Hikwalaho, i no maha zvifananiso zvimbiri zva zvihon’wana hi ouro a gumesa a byela vanhu vakwe, aku: ‘Le Jerusalema kule nguvhu. Khozelani kwalaha’. A vanhu va no sangula ku khozela zvihon’wana lezvo zva ouro va mu rivala kambe Jehovha.