Jona Ni Njhanjhi Ya Hombe

CUWUKA wanuna loyi lomu matini. Yena i lomu kuxanisekeni ka hombe, a hi zona? A njhanjhi liya yi laha kusuhani ni ku mu mita! Wa zi tiva a ku hi mani wanuna loyi? A vito gakwe hi Jona. A hi woneni ku ngalo i nghenisile kuyini ka kuxaniseka loko ka hombe.

Jona muprofeti wa Jehova. A ku hunzi xikhati xo leha na muprofeti Elixa a file laha Jehova a byelako Jona ku ngalo: ‘Famba le doropeni ga hombe ga Niniva. A wubihi ga vanhu va kwaseyo ga hombe nguvu, hikwalaho nzi lava lezaku wena u ya va byela hi wubihi lego.’

Kanilezi Jona a nga zi lavi ku famba. Hizalezo yena i khilela a taru gi yako ka tlhelo go hambana ni Niniva. Jehova a nga tsaki hi lezi Jona a tsutsumako. Hikwalaho yena i vanga a bhubhutsa ga hombe. Ga hombe nguvu laha ka kuza taru giva mhangweni ya ku mbemba. A vamarinyero va khonwa hi kuchava ka hombe nguvu, zonake va bela tihuwa vanungungulu vabye hi ku lava xivuno.

Hi kugumesa Jona i va byela lezi: ‘Nzi khozela Jehova, a Nungungulu loyi a mahileko a tilo ni misava. Niku nzo tsutsuma ku maha lezi Jehova a nzi byelileko ku maha.’ Hikwalaho a vamarinyero va wutisa vaku: ‘Zini hi faneleko ku ku maha kasi ku nyimisa a bhubhutsa ke?’

Jona aku ngalo: ‘Nzi hoxeni lomu bimbini, zonake a bimbi gi ta tlhela gi rula.’ A vamarinyero a va zi lavi ku maha lezo, kanilezi kota lezi a bhubhutsa gi engetelanako, hi magumo ya kona vona vaza va hoxa Jona le handle ka taru. Zalezo a bhubhutsa gi nyima, ni bimbi gi tlhela gi rula.

Laha Jona a relelako hi kumbombomela lomu matini, yena i mitiwa hi njhanjhi ya hombe. Kanilezi a ngafi. Yena i tshama lomu ka rumbu ga njhanjhi a masiku manharu ni wusiku ginharu. Jona i ti sola nguvu hi lezi a nga kala ku ingisa Jehova lezaku aya Niniva. Makunu wa zi tiva lezi a mahako?

Jona i khongelela xivuno ka Jehova. Hizalezo Jehova i maha lezaku a njhanjhi yi hlata Jona laha muhanzeni. Anzhako ka lezo Jona i famba Niniva. Xana lezo a zi hi gonzisi ku ngalo za lisima a ku maha xihi ni xihi lexi Jehova a wulako ke?