Jehovha i kombisile lihlazva-mbilu ka Jona

A vanhu va le Ninivha, a dhoropa ga Asiriya, va wa bihile nguvhu. Hikwalaho, Jehovha i no byela muphrofeti wakwe Jona lezvaku a famba Ninivha a ya va byela ku va fanele ku cica mahanyela yabye. Kanilezvi, Jona i no tsutsuma aya ka tlhelo gin’wani. I no nghena lomu ka ngalava yi ngaya Tarxixi, a tsutsuma.

A cikhati leci a ngalava yi nga hi lomu bimbini, ku noba moya wa hombe, a vamarinyero va sangula ku chava. Va no khongela ka vanungungulu vabye va wutisa, vaku: ‘Hikuyini zvi hi humelelako’? Jona i no gumesa a va byela lezvi: ‘Hi mina ndzi nga ni nandzu. Ndzo tsutsuma ku maha lezvi Jehovha a nga ndzi ruma. Ndzi hoxeni lomu bimbini, a moya wu ta nyima’. A vamarinyero va wa nga zvi lavi ku mu hoxa lomu bimbini, kanilezvi Jona i no simama ku va kurumeta. A cikhati leci va nga mu hoxa lomu bimbini, a moya wu no nyima.

Jona i wa alakanya lezvaku i tafa. Laha a nga kari a mbombomela lomu bimbini, i no khongela ka Jehovha. Hi kulandzela, Jehovha i no rumela njhanjhi ya hombe nguvhu yi ta mita Jona. Kanilezvi, a nga fangi. Jona i no maha mukhongelo na hi lomu ndzeni ka njhanjhi, aku: ‘Jehovha, ndzi ta ku ingisa contlhe cikhati’. Jehovha i no vhikela Jona lomu ndzeni ka njhanjhi hi masiku manharu, yi gumesa yi ya mu hlata laha ka misava yo woma.

Lezvi Jehovha a nga ponisa Jona, xana zvi wula ku zvi wa hundzile, i wa nga ha faneli kuya Ninivha? Ahihi. Jehovha i no tlhela a byela Jona lezvaku a famba Ninivha. Ka khati legi, Jona i no ingisa. I no famba a ya byela vanhu lavo vo biha, aku: ‘Ndzeni ka 40 wa masiku, Ninivha i ta lovisiwa’. Ku no maheka zvilo zvo hlamalisa nguvhu — a vaNinivha va no ingisa, va cica mahanyela yabye. A hosi ya Ninivha yi no byela vanhu va yona, yiku: ‘Khongelani ka Nungungulu, mu ti sola. Kuzvilava a nga ta hi lovisa’. A cikhati leci Jehovha a nga wona lezvaku a vanhu va wa ti solile, a nga ha lovisangi a dhoropa ga Ninivha.

Jona i no zangara hi lezvi a dhoropa gi nga kala ku lovisiwa. Hi nga ehleketa hi mhaka leyi: Jehovha i kombisile lihlazva-mbilu hi Jona a tlhela a mu zwela wusiwana. Kanilezvi, yena makunu i wa nga va zweli wusiwana a vanhu va Ninivha! Wutshan’wini ga lezvo, i no ya tshama le handle ka dhoropa laha ka ndzhuti wa sinya yi vitaniwako ku i khungu, a tsuva. Hi kulandzela, a sinya yi nofa niku Jona i no zangara. Jehovha i no wutisa Jona, aku: ‘Hikuyini u karatekako hi kota ya sinya leyi yi ngafa, kanilezvi u nga hi na mhaka ni vaNinivha? A wu zvi woni ku ndzi va zwele wusiwana kasi va ngafi’! Kasi Jehovha i wa lava ku wula yini? I wa komba lezvaku a vanhu va Ninivha va wa hi va lisima nguvhu a ku hundza tisinya.