A Hosi Ya Yi Nene Yo Gumesa Ya Israeli

JOSIA i na ni tanga ya ntlhanu wa malembe ni manharu ntsena laha a mahako hosi ya tixaka timbiri ta ka Israeli ta le dzonga. A tanga leyo yi tsongwani nguvu kasi ku munhu a maha hosi. Hikwalaho, a kusanguleni yena i vuniwa ku rangela tiko hi vanhu vo kari va hombe.

Loku Josia a mahile ntlhanu wa malembe ni mambiri na a hi hosi yena i sangula ku hlota Jehova. Yena i lanzela xikombiso xa tihosi ti nene to kota Davida, Jehoxafate na Hezekia. Zonake, laha a ha hiko tangeni yo rama ntsena, Josia i maha nchumu wu lavako kutiya-hlana.

Hi xikhati xo leha a vaIsraeli vo tala va sina va bihile nguvu. Vona va khozela vanungungulu va mawunwa. Va khizamela zifananiso. Makunu Josia i huma ni vavanuna vakwe va sangula ku fuvisa wukhozeli ga mawunwa lomu tikweni. Lowo i ntiro wa hombe hakuva a vanhu vo tala nguvu va khozela vanungungulu va mawunwa. Wa zi kota ku wona Josia ni vavanuna vakwe laha na va fayetela zifananiso.

Anzhako ka xikhati, Josia i veka vavanuna vanharu kota varangeli va ntiro wa ku aketa a tempeli ya Jehova. Ku hlengisiwa mali ka vanhu zonake yona yi nyikelwa ka vavanuna lavo lezaku yi rihela a ntiro lowu wu faneleko ku mahiwa. Laha va tirako laha tempeleni, mupristi wa hombe Hilkia i thumba nchumu wa lisima nguvu kwalomo. I bhuku ga nayo ha goce legi Jehova a gi tsalisileko hi mandla ya Mosi xikhatini xa kale nguvu. Gona gi wa lahlekile hi malembe yo tala.

A bhuku gi tekiwa gi yisiwa ka Josia, zonake yena a kombela lezaku gi gonziwa mahlweni kakwe. Laha a ingisako, Josia i wona lezaku a vanhu a va hlayisangi nayo wa Jehova. Yena i bayiseka nguvu hi lezo, zonake a hanzula a tinguwo takwe, kota lezi u zi kotako ku zi wona kwalaha. Yena i ngalo: ‘Jehova i hi zangarele, hakuva a vararu va hina a va hlayisangi milayo yi tsalilweko bhukwini legi.’

Josia i ruma mupristi wa hombe Hilkia a ku ya tiva lezi Nungungulu a to va maha. Hilkia i famba ka wasati Hulda, a nga muprofeti wa xisati, a ya mu wutisa. Hulda i mu nyika mhaka leyi yi tako hi ka Jehova lezaku a yi tlhelisa ka Josia: ‘Jerusalema ni vanhu vontlhe va ta tsayisiwa hakuva va khozele vanungungulu va mawunwa ni lezaku a tiko gi tele hi wubihi. Kanilezi kota lezi wena, Josia, u mahileko lezi zi nga zi nene, a kutsayiswa loko ku nga tata kala nzhako ka kufa ka wena.’