Mutsalo Laha Khurisini

ZINI zi mahekako laha? A vanhu lava va lomu mubuzweni wa hombe. A hosi ya Babuloni yi rambile a khume ga mazana ya vanhu vo chaveka. Vona vo tirisa a magombe ya nzalama ni ya siliva zinwe ni mingelo zi tekilweko tempeleni ya Jehova le Jerusalema. Kanilezi, hi xitshuketi, ku woneka a titiho ta canja ga wanuna le hehla gi sangula ku tsala laha khurisini. Vontlhe va khonwa hi kuchava.

Belxazzare, a zukulu wa Nebukadnezzare, hi yena a nga hosi makunu. Yena i kanyuluka a vitanisa a titlhari takwe. Yena hosi aku ngalo: ‘Loyi a zi kotako ku gonza a mutsalo lowu a nzi byela a tlhamuselo wa kona, i ta nyikwa zinyikiwo zo tala a tlhela a mahiwa mufumeli wa wunharu lomu mufunweni.’ Kanilezi a ku na munhu xikari ka titlhari leto a zi kotako ku gonza a mutsalo laha khurisini, ge hambu ku wula a tlhamuselo wa kona.

A mamani wa hosi izwa a guwa zonake a enghena lomu ndlwini ya hombe yo gela kona. A yaku ngalo ka hosi: ‘Maha wuxinji, u nga chavi nguvu. Ku na ni wanuna lomu mufunweni wa wena a tivako vanungungulu va basileko. A xikhati lexi a kokwani wa wena Nebukadnezzare a nga hi hosi yena i mu mahile nduna ya titlhari takwe tontlhe. A vito gakwe hi Danieli. Mu vitanise, zonake yena i ta ku byela zontlhe lezi wona wu tlhamuselako zona.’

Zalezo Danieli i nehiwa lomo ndlwini. Anzhako ka kuva a alile ku teka ni zihi zinyikiwo, Danieli i sangula ku tlhamusela a xigelo xa kuva Jehova a susile a kokwani wa Belxazzare, Nebukadnezzare, xitshanwini xa wuhosi. Danieli aku ngalo: ‘Yena i wa ti kulisa nguvu zonake Jehova i lo mu tsayisa.’

Danieli i byela Belxazzare ku ngalo: ‘Kanilezi wena u wa zi tiva zontlhe lezi zi nga mu humelela, hambulezo wa ha ti kulisa a kufanana ni lezi Nebukadnezzare a nga ve zona. U nehile a magombe ni mingelo ya tempeli ya Jehova lomu ndlwini u ta nwela ka zona. U dumisile vanungungulu va mahilweko hi tisinya ni maribye, zonake a wu dzunzangi a Muvangi wa hina wa Hombe. Hi zona lezo zi mahileko ku ngalo Nungungulu a rumela a canja legi lezaku gi ta tsala a timhaka leti.’

Danieli aku ngalo: ‘Lezi zi nga tsaliwa hi lezi, MENE, MENE, TEKEL na UFARSIN.’

‘A ku MENE zi wula ku ngalo Nungungulu i hlayile a masiku ya mufumo wa wena, a wu mbhetisa. TEKEL zi wula ku ngalo u kalilwe xikalwini, u kumeka na u hehuka. UFARSIN zi wula a ku a mufumo wa wena wu nyikelwe ka vaMedi ni vaPersia.’

Ka xalexo xikhati Danieli a wulawulako, a vaMedi ni vaPersia va sina va sangulile ku vukela Babuloni. Vona va khozisa a doropa va tlhela va daya Belxazzare. A mutsalo lowo wu nga laha khurisini wu tatiseka wusikwini galego! Kanilezi zini lezi zi to humelela a vaIsraeli makunu? Hi ta zi tiva lokuloku, kanilezi a hi woneni hi kusangula lezi zi humelelako Danieli.