Mutsalo laha khurisini

Hi kufamba ka cikhati, Bhelxazare i no maha hosi ya Bhabhuloni. Ka wusiku go kari, i no maha festa a ramba 1000 wa vanhu va lisima nguvhu lomu tikweni. I no ruma vatiri vakwe lezvaku va ya mu tekela tikopo ta ouro leti Nebhukadnezare a nga tekile lomu tempeleni ya Jehovha. Bhelxazare ni vapfhumba vakwe va nonwa hi tikopo leto va tlhela va dhumisa vanungungulu vabye. Hi citshuketi, ku no humelela canja ga munhu gi sangula ku tsala zvilo zvo hlamalisa laha khurisini ga yindlu leyi va nga gela kona.

Bhelxazare i no chava. I no vitanisa vasalamusi vakwe a va tsumbisa lezvi: ‘Loyi a to zvi kota ku ndzi byela ku a magezu lawa ma wula yini, i tava mufumeli wa wunharu lomu Bhabhuloni’. A vasalamusi va no zama, kanilezvi ne mun’we a nga zvi kotangi ku mu byela ku a magezu lawo ma wula yini. A mamani wa hosi Bhelxazare i no nghena lomu ndlwini, aku: ‘Ku na ni wanuna wa ku hi Dhaniyeli a nga tolovela ku mu tlhamusela zvilo zvo karata Nebhukadnezare. A nga zvi kota ku ku byela ku a magezu lawa ma wula yini’.

Dhaniyeli i noya ka hosi. Bhelxazare aku: ‘Loku u zvi kota ku lera magezu lawa u tlhela u ndzi byela a ku ma wula yini, ndzi ta ku nyika kordhawu ga ouro ndzi tlhela ndzi ku maha mufumeli wa wunharu lomu Bhabhuloni’. Dhaniyeli aku: ‘A ndzi zvi lavi zvilo zva wena. Hambulezvo, ndzi ta ku byela ku a magezu lawa ma wula yini. A papayi wa wena Nebhukadnezare i wa hi munhu wa matshandza. Hikwalaho, Jehovha i no mu susa musi. Wena wa zvi tiva khwatsi zvontlhe lezvi zvi nga mu humelela. Hambulezvo, u kanyisile Jehovha hi kunwa vhinyo hi tikopo ta ouro ti tekilweko tempeleni Yakwe. Hikwalaho, Jehovha i tsalile magezu lawa: Mene, Mene, Tekel, Parsin. A magezu lawa ma wula ku a vaMedhi ni vaPersia va ta hlula Bhabhuloni, niku wena u nga ta ha fuma’.

Cikhatini leco, zvi wa wonekisa ku khwatsi a ku na tiko gi nga hi ni ntamu wa ku hlula Bhabhuloni. A dhoropa legi gi wa bhiyilwe hi muru wo tiya gi tlhela gi randzelwa hi congo wo eta nguvhu. Hambulezvo, ka wusiku galego, a vaMedhi ni vaPersia va no gi dhumela. Khurusi, a hosi ya Persia, i no jikisa mati ya congo kasi a masochwa yakwe ma zvi kota ku tsemakanya ma kwela kala laha tinyangweni ta dhoropa. Loku ma chikele, ma no kuma lezvaku a tivati ti wa vhululilwe! A masochwa ma no nghena lomu dhoropeni, ma gi hlula ma tlhela ma daya hosi. Khurusi a gumesa a fumela Bhabhuloni.

Na ku nga se hundza lembe, Khurusi i no tivisa lezvi: ‘Jehovha i ndzi rumile a ku ndzi vhuxa tempeli yakwe le Jerusalema. Ni wihi cikari ka vanhu vakwe a lavako ku vhunetela i wa fambe’. Kota lezvi Jehovha a nga tsumbisile futsi, a vaJudha vo tala va no tlhela Jerusalema loku ku hundzile 70 wa malembe na gi hahlulilwe. Khurusi i no tlhelisa tikopo ta ouro ni ta prata ni zvibya lezvi Nebhukadnezare a nga tekile lomu tempeleni. Wa zvi wona lezvi Jehovha a nga mu tirisisa zvona Khurusi kasi ku vhuna vanhu vakwe?