Lomu Ndlwini Yi Khotsilweko

ANZHAKO ka loku Pedro na Johani va sukile hi le xilahleni ku nga vekilwe kona a miri wa Jesu, Maria i sala yece. Yena i sangula ku rila. Zonake a korama a hlomela nzeni ka xilahla, kota lezi hi zi wonileko ka mufananiso wo gumesa. Kwalomo i wona a tingelosi timbiri! Tona ti mu wutisa tiku: ‘U rilela yini ke?’

Maria i hlamula aku: ‘Va susile a Hosi ya mina, niku a nzi ku tivi laha va yi vekileko kona.’ Zonake Maria i hunzuluka a wona a wanuna. A wanuna loye i mu wutisa aku: ‘Himani u mu lavako ke?’

Maria i alakanya lezaku a wanuna loye hi muhlayisi wa simu, niku ku ngava yena a susileko a miri wa Jesu. Hikwalaho yena i ngalo: ‘Loku u mu susile laha nzi byele laha u mu vekileko kona.’ Kanilezi, hi lisine, a wanuna loye hi Jesu. Yena i ambele miri lowu Maria a nga wu tiviko. Kanilezi laha Jesu a mu vitanako hi vito gakwe, Maria i tiva ku ngalo gayani hi Jesu. Yena i tsutsuma aya byela a vapizani ku ngalo: ‘Nzi yi wonile Hosi!’

Anzhako ka xikhati nzeni ka galego siku, laha a vapizani vambiri va fambako na vaya xidoropaneni xa Emausi, a wanuna wo kari i longoloka navo. A vapizani va bayiseka nguvu hi lezi Jesu a delweko. Kanilezi laha va fambako, a wanuna loye i tlhamusela a zilo zo tala za lomu ka Biblia lezi zi va tangalisako. Hi kugumesa, laha va nyimako kasi kuga zakuga, a vapizani va tiva lezaku a wanuna gayani hi Jesu. Zalezo Jesu a nyamalala, zonake a vapizani lavo va vambiri va tlhela hi kuhatlisa le Jerusalema lezaku va ya bikela a vapostoli ha yena.

Laha lezo zi mahekako, Jesu i wonekawu ka Pedro. Lava vanwani va tsaka loku vazwa lezo. Makunu a vapizani lavo va vambiri vaya Jerusalema va ya kuma a vapostoli. Va va byela lezi Jesu a wonekisileko zona ka vonawu laha ndleleni. Niku na va ha hlawutela lezo, wa wu tiva a nchumu wo hlamalisa lowu wu mahekako?

Cuwuka a mufananiso. Jesu i humelela kwalomuya ndlwini, hambulezi a livati li khotsilweko. A hi kutsaka loku vapizani va nga nako! A hi siku ga litsako lego? Wa zi kota ku hlaya a ntsengo wa makhati lawa Jesu a wonekileko ka vapizani vakwe kala lezi? U hlaya a ntlhanu wa makhati?

Mupostoli Tomasi a nga kona zinwe navo a xikhati lexi Jesu a wonekako. Hikwalaho a vapizani va mu byela lezi: ‘Hi wonile Hosi!’ Kanilezi Tomasi i ngalo i fanele ku wona Jesu ha yece a fela ku kholwa. Makunu, loku ku hunzile a ntlhanu wa masiku ni manharu a vapizani va tlhelile va tlhangana lomu ndlwini yi khotsilweko, niku a ka xikhati lexi Tomasi i na vona. Hi xitshuketi, Jesu i humelela kwalomuya ndlwini. Tomasi wa kholwa makunu.