Va Tlhatlhiswa Hi Lomu Paxweni

CUWUKA a ngelosi leyi laha yi khomileko a livati la paxo li vululweko. A vavanuna lava va tlhatlhiswako hi yona vapostoli va Jesu. A hi tiveni lezi zi nga va yisa kuvalelweni lomu paxweni.

Ku hunza xikhatanyana ntsena kusukela a xikhati lexi ku nga chululwa moya wa ku basa hehla ka vapizani va Jesu. Zonake ku maheka lezi: Ka gambo go kari Pedro na Johani vaya tempeleni le Jerusalema. Kwaseyo, laha kusuhani ni livati, ku na ni wanuna a nga xilema wutomini gakwe gontlhe. A vanhu va mu rwala va ta naye laho a masiku wontlhe lezaku a ta kombela mali ka lava va yako tempeleni. Laha a wonako Pedro na Johani, i va kombela lezaku va mu nyika xo kari. Va ta ku yini a vapostoli lavo ke?

Vona va nyima va cuwuka a wanuna loye wa xisiwana. Pedro aku ngalo: ‘A nzi na mali, kanilezi nzi ta ku nyika lezi nzi nga nazo. Hi vito ga Jesu, suka u famba!’ Pedro makunu i khoma a wanuna loye hi canja ga xinene a mu yimisa, zonake hi xalexo xikhati yena i tlula a sangula ku famba. Laha a vanhu va wonako lezo, va hlamala ni ku tsaka nguvu hi xihlamaliso lexo xo saseka.

Pedro i ngalo: ‘Hi mahile xihlamaliso lexi hi ntamu wa Nungungulu, loyi a vuxileko Jesu hi ka vafileko.’ Laha yena na Johani va wulawulako, ku chikela varangeli vo kari va wukhongeli. Vona va zangarile hakuva Pedro na Johani vo byela vanhu lezaku Jesu i vuxilwe hi ka vafileko. Hikwalaho va va khoma va va valela paxweni.

Hi manziko wa kona a varangeli va wukhongeli va na ni mutlhangano wa hombe. Pedro na Johani, zinwe ni wanuna gayani va mu hanyisileko, va engheniswa lomo. A varangeli va wukhongeli va wutisa vaku: ‘Mu mahile xihlamaliso lexi hi ntamu muni?’

Pedro i va byela ku ngalo va xi mahile hi ntamu wa Nungungulu, loyi a vuxileko Jesu hi ka vafileko. A vapristi a va xi tivi ni xo maha, hakuva a va zi koti ku ala a xihlamaliso lexo xo saseka xi nga maheka hakunene. Hikwalaho va laya a vapostoli lezaku va nga ha wulawuli ha Jesu kambe, zonake va va tsika va famba.

Laha a masiku ma hunzako a vapostoli va simama ku xumayela ha Jesu ni ku hanyisa vababyi. A mahungu xungetano hi zihlamaliso lezo ma hangalaka. Niku hambu ni zidlemo za madoropa ma ranzelako Jerusalema zi neha vababyi akuva va ta hanyiswa hi vapostoli. Lezo zi vanga xiluse ka varangeli va wukhongeli, zonake va khoma a vapostoli va va valela paxweni. Kanilezi a va tshami xikhati xo leha lomo.

Ni wusiku a ngelosi ya Nungungulu yi vulula a livati la paxo, kota lezi u zi wonako kwalaha. A ngelosi yi ngalo: ‘Fambani mu ya yima tempeleni, mu simama ku wulawula ka vanhu.’ Ka mixo lowu wu nga lanzela, laha a varangeli va wukhongeli va rumelako vavanuna le paxweni a ku ya teka vapostoli, vona va wa nga hi kona. Loku ku hunzile xikhati a vavanuna lavo va va kuma na va gonzisa lomu tempeleni zonake va va neha ndlwini ya Hubye.

A varangeli va wukhongeli ve ngalo: ‘Hi mu layisisile lezaku mu nga ha gonzisi ha Jesu. Kanilezi mu tatile Jerusalema hi kugonzisa ka nwina.’ Makunu a vapostoli va hlamula vaku: ‘Hi fanele ku ingisa Nungungulu kota mufumeli a ku hunza ku ingisa vanhu.’ Zonake vona va simama a ku gonzisa a “mahungu yo saseka.” A hi xikombiso xa xi nene lexo hi faneleko ku xi lanzela?