Ndlela yo hlula kuchava

ZA KU olovela a ku tirela Jehova? — Mugonzisi wa Hombe a nga wulangi lezaku za olova. Ka wusiku legi a nga dawa hi gona, Jesu i byelile a vapostoli vakwe aku: “Loku tiko gi mu venga, zi tiveni lezaku gi rangile hi mina gi nzi venga.” — Johani 15:18.

Pedro i lo ti kulisa a wula lezaku i wa nga ta tshuka a tsika Jesu, kanilezi Jesu i wulile lezaku Pedro i wa ta mu kaneta makhati manharu ka wusiku lego. Niku hi zalezo Pedro a nga maha futsi! (Mateu 26:31-35, 69-75) Zi mahekisile kuyini? — Zi mahekile hi kota ya lezi Pedro ni vapostoli lava vanwani va nga chava.

Wa zi tiva a ku hikuyini a vapostoli va nga chava? — Va wa tsikile ku maha nchumu wa lisima nguvu. A ku gonza hi lezo zi nga hi vuna a ku tirela Jehova, na zi ngayi hi lezi a vanwani va wulako kutani va hi mahelako. Hambulezo, na hi nga se sangula ku bhula hi zona, a hi range hi ku vuxeta lezi zi humeleleko ka wusiku go gumesa legi Jesu a nga hi ni vapostoli vakwe.

A kusangula, va lo maha mubuzo wa Pasika. Loko ku wa hi kuga ko hlawuleka ku nga mahiwa lembe ni lembe kasi ku alakanyisa vanhu va Nungungulu xungetano hi kutlhatlhiswa kabye wukhumbini le Gipite. Hi kulanzela, Jesu i lo yimisa a kuga kunwani ko hlawuleka na a hi zinwe navo. Ka xipimo xa ha tako hi ta gonza hi kuga loko, ni lezi ku hi vunisako zona a ku alakanya Jesu. Anzhako ka kuva a yimisile a kuga loko, ni kuva a wulile magezu ya ku tiyisa vapostoli vakwe, Jesu i lo va teka a famba navo sinwini ga Getsemane. Va wa tolovela kuya ka wutshamu lego, hakuva va wa gi ranza nguvu.

Jesu i lo suka ka wutshamu legi va nga hi ka gona a famba yece kasi ku ya khongela. I lo byela Pedro, na Jakobe, na Johani lezaku vonawu va sala va khongela. Kanilezi, va lo sala va khonwa hi wurongo va etlela. Jesu i lo va siya hi makhati manharu lezaku a ya khongela. Ka makhati wontlhe lawo ya manharu, i lo wuya a ta kuma Pedro ni lava vanwani na va etlele! (Mateu 26:36-47) Wa zi tiva a ku hikuyini va nga fanele ku simama va hanyanya kasi va khongela? — A hi wone hlamulo wa kona.

Kusanguleni ka wusiku lego, Judasi Iskarioti i wa hi kona ka Pasika lego na Jesu zinwe ni vapostoli lava vanwani. Kota lezi kuzilava u zi alakanyako, Judasi makunu i wa hi khamba. Zezi i wa mahile mutokometi. I wa gi tiva khwatsi a simu ga Getsemane ku nga hi wutshamu legi Jesu a nga tolovela kuya tlhangana ni vapostoli vakwe. Hikwalaho, Judasi i lota ni masochwa ka wutshamu lego lezaku ma ta khoma Jesu. A xikhati va nga chikela, Jesu i lo va wutisa lezi: “Mu lava mani ke?”

A masochwa ma lo hlamula maku: ‘Hi lava Jesu.’ Jesu i wa nga chavi, hikwalaho i lo va hlamula aku: “Hi mina loyi.” A masochwa ma lo hlamala nguvu hi kutiya-hlana ka Jesu laha ka kuza ma hlehla mawa lahasi. Zonake Jesu i lo va byela lezi: ‘Loku mu lava mina, tsikani vapostoli va mina, va ti fambela.’ — Johani 18:1-9.

A xikhati lexi a masochwa ma nga khoma Jesu ma tlhela ma mu boha, a vapostoli va lo chava va gumesa va tsutsuma. Kanilezi, Pedro na Johani va wa lava ku tiva lezi zi nga wa ta humelela. Hikwalaho, va lo lanza hi le kulanyana. Hi kugumesa, Jesu i lo yisiwa mutini wa Kayafasi, a mupristi wa hombe. Kota lezi Johani a nga tiviwa hi mupristi wa hombe, a muwoneleli wa nyangwa i lo tsika yena na Pedro va nghena lomu ndlwini ya hubye.

A vapristi va wa sina va tlhangene laha mutini wa Kayafasi kasi ku xuxa mhaka leyo. Va wa lava tindlela ta ku daya Jesu. Hikwalaho, va lo vitanisa vanhu lezaku va ta wulawula mawunwa xungetano hi Jesu. A vanhu va loba Jesu hi zibhakela ni tipama. A xikhati lexi zi nga kari zi maheka lezo, Pedro i wa hi laha kusuhani.

A nanza ga xisati legi gi nga kari gi wonelela laha nyangweni a xikhati lexi Pedro na Johani va nga nghena, gi lo tiva Pedro zonake giku: “Wenawu u wa hi na Jesu”! Kanilezi, Pedro i lo kaneta a wula lezaku ne a nga mu tivi Jesu. Na ku nga se hunza xikhati xo leha, a nhanyana munwani i lo tiva Pedro zonake a byela lava va nga hi kusuhani kakwe aku: ‘A wanuna loyi i wa hi na Jesu.’ Ka khati legi kambe, Pedro i lo kaneta aku a nga mu tivi Jesu. Loku ku hunzile xikhatanyana, a vanhu vo kari va lo wona Pedro va gumesa va mu byela lezi: “Hakunene wenawu u munwe wa vona.” Pedro i lo kaneta hi khati ga wunharu aku: ‘A nzi mu tivi a wanuna loyi’! Pedro i lo hlambanya lezaku lezi a nga zi wula lisine, zonake Jesu a hunzuluka a mu cuwuka. — Mateu 26:57-75; Luka 22:54-62; Johani 18:15-27.

Wa zi tiva a ku hikuyini Pedro a nga hemba? — Hi zona, hi lezaku i wo chava. Makunu, hikuyini a nga kari a chava? Zini a nga tsika ku maha kasi a nga chavi? Hi nga alakanyela: Zini lezi Jesu a nga mahile kasi ava ni kutiya-hlana? — I wa khongele ka Nungungulu niku Nungungulu i lo mu vuna lezaku ava ni kutiya-hlana. Alakanya lezaku Jesu i wa byelile Pedro makhati manharu lezaku a khongela, a nga khudzeheli, ni lezaku a tshama na a rinzele. Kanilezi, zini lezi Pedro a nga mahile? —

Ka makhati wontlhe ya manharu, Jesu i lo wuya a ta kuma Pedro na a etlele. I wa nga khongeli, niku i wa nga tshami na a rinzele. Hikwalaho, Pedro i lo dzuka nguvu a xikhati lexi Jesu a nga khonwa. Laha va nga kari va xuxa Jesu, ni xikhati lexi va nga kari muba ni ku lava tindlela ta ku daya Jesu, Pedro i lo chava. Hambulezo, zini lezi Jesu a nga byelile vapostoli vakwe lezaku va wa ta kumana nazo? — Jesu i wa va byelile lezaku a ku fana ni lezi a tiko gi nga mu vengile, vonawu va wa ta vengiwa.

Zezi, a hi alakanyele zilo zo kari zo fana ni lezi zi nga humelela Pedro, lezi zi nga hi humelelako. A hi zi veki laha ka ku u lomu saleni zonake a zigonzani zo kari zi sangula ku wulawula kubiha hi lava va kalako va nga yimbeleli a Hino nacional ne va kalako va ngagi a Khisimuso. Makunu ahati loku a wokari a ku wutisa lezi: “Lisine lezaku wena a wu yimbeleli Hino nacional?” Kutani a vanwani vaku: “Hi zwile lezaku wena ne a wugi Khisimuso!” U ta chava ku wula lisine? — U ta ringiwa ku hemba a kufana ni lezi Pedro a nga maha? —

Loku ku hunzile xikhati, Pedro i lo ti sola nguvu hi kuva a kanetile lezaku wa mu tiva Jesu. Laha a nga wona lezaku lezi a nga zi mahile zi wa bihile, Pedro i lo huma lehandle a ya rila. I lo gumesa a maha lezi Jesu a nga zi lava. (Luka 22:32) Makunu hi nga zi alakanyela. Zini zi to hi vuna a kuva hi nga chavi laha ka kuza hi wula zilo zo fana ni lezi Pedro a nga wula? — Alakanya lezaku Pedro i wa tsikile ku maha mukombelo ni ku tshama na a rinzele. Makunu hi mawonela ya wena, zini lezi hi faneleko ku maha kasi hiva valanzeli va Mugonzisi wa Hombe? —

Hakunene hi fanele ku kombela Jehova hi mukhongelo lezaku a hi vuna. Laha Jesu a nga khongela, wa zi tiva ku zini lezi Nungungulu a nga mu mahela? — I lo rumela ngelosi lezaku yi ta mu tiyisa. (Luka 22:43) A tingelosi ta Nungungulu ti nga hi vuna? — A Biblia gi wula lezi: “A ngelosi ya Jehova yi gova yi ranzela lava va mu chavako, yi va tlhatlhisa.” (Tisimu 34:7) Kanilezi, kasi Nungungulu a hi vuna ku laveka lezaku hi maha zo hunza ku maha mukhongelo. Wa zi tiva ku zini zinwani hi faneleko ku maha? — Jesu i byelile valanzeli vakwe lezaku va nga khudzeheli ni kuva va tshama na va rinzele. U alakanya lezaku hi nga zi mahisa kuyini? —

Loku hi hi mitlhanganweni ya hina ya wuKristu, hi fanele ku ingisela khwatsi lezi zi wuliwako ni lezi hi zi gonzako lomu ka Biblia. Ahandle ka lezo, xontlhe xikhati hi fanele ku kombela Jehova kambe lezaku a hi vuna ku mu tirela. Loku hi maha lezo, Jehova i ta hi vuna ku hlula a kuchava ka hina. Hi ta tlhela hi tsaka kambe loku hi zi kota a ku wulawula ni vanwani xungetano hi Mugonzisi wa Hombe ni Papai wakwe.