A Magumo Ya Wubihi Gontlhe

U WONA yini laha? Ina, i butho gi khileleko mahaxi yo basa. Kanilezi wona lomu ma tako hi kona. A mahaxi mo relela hi kuhatlisa hi le tilweni na ma hi marefini! Ku na ni mahaxi hakunene le tilweni?

Ahihi, lawa a hi mahaxi ya lisine. Hi tiva lezo hakuva a mahaxi a ma zi koti ku tsutsuma lomu marefini, ina ma zi kota? Kanilezi a Biblia ga wulawula futsi hi mahaxi le tilweni. Wa zi tiva a ku gi wula lezo hikuyini?

Hi lezaku a ka xikhati xo kari a mahaxi ma tirisilwe nguvu kulweni ka tiyimpi. Hikwalaho a Biblia gi hlawutela hi vanhu va khileleko mahaxi va relelako hi le tilweni kasi ku komba lezaku Nungungulu i na ni yimpi ya kulwa ni vanhu Misaveni. Wa zi tiva a ku gi vitaniswa kuyini a wutshamu ga yimpi leyo? Har–Magedoni. A yimpi leyo yi ta lovisa a wubihi gontlhe Misaveni.

Jesu hi Yena a to rangela a kulwa yimpini leyo le Har–Magedoni. Khumbula, Jesu hi yena loyi a nga hlawuliwa hi Jehova lezaku a maha hosi ya wukosi Gakwe. Hizalezo Jesu i boha a xidlodlo ya wuhosi. Niku a supado yi komba lezaku yena i ta daya a valala vontlhe va Nungungulu. Hi fanele ku hlamala hi lezi Nungungulu a to lovisa a vanhu vontlhe vo biha?

Tlhelela nzhako u cuwuka a Tlhatlhambuto 10. U wona yini kwalaho? Ina, i Ntalo wa hombe lowu wu nga lovisa vanhu vo biha. Himani a nga vanga a Ntalo lowo? Jehova Nungungulu. Lezi cuwuka a Tlhatlhambuto 15. Zini zi mahekako kwalaho? Ko loviswa Sodoma ni Gomora hi nzilo wu rumelweko hi Jehova.

Vulula a Tlhatlhambuto 33. Wona lezi zi humelelako mahaxi ni tikareta ta yimpi ta vaGipite. Himani a nga wuyisa mati lezaku ma ta va khubhunyeta ke? Jehova. Yena i mahile lezo hi ku fela ku vikela a vanhu vakwe. Cuwuka a Tlhatlhambuto 76. Laho u ta wona lezaku hambu vanhu vakwe, a vaIsraeli, Jehova i va tsikile va loviswa hi kota ya wubihi gabye.

Hikwalaho, makunu, hina a hi faneli ku hlamala hi lezi Jehova a to rumela mabutho yakwe ya le tilweni lezaku ma ta fuvisa a wubihi gontlhe misaveni. Kanilezi alakanyela ntsena a ku zi ta wula yini lezo! Hunzulusa a phajina hi fela ku zi wona.