A Paradise Giswa Misaveni

CUWUKA a tisinya letiyani to leha, a zitsangi zo saseka ni zitsunga zo leha. A ku sasekangi laha? Hi nga wona lezi a hlangu yi gisako zona lomu canjeni ga mufanyana loyi. Niku cuwuka a tinghala ni mahaxi zi nga lahayani livaleni la byanyi. U wa nga ta zi ranza ku hanya ka yindlu yi nga ka wutshamu go khwatsi hi legi?

Nungungulu i lava lezaku wena u hanya misaveni kala kupinzuka lomu ka paradise. Niku yena a nga lavi lezaku wena uva ni kwihi kubayisa loku ku xanisako vanhu inyamutlha. A xitsumbiso xa Biblia ka lava va to hanya paradiseni giswa hi lexi: ‘Nungungulu i tava navo. Ku nga ha tava kona kufa kutani kurila ni kubayisa. A zilo za kale zi hunzile.’

Jesu i ta maha lezaku a kuhunzuluka loko ko hlamalisa ku maheka. Wa zi tiva a ku zi ta maheka rini? Ina, anzhako ka kuva a basisile misava hi ka wubihi gontlhe ni ka vanhu vo biha. Khumbula, a xikhati lexi Jesu a nga hi misaveni i chumile vanhu hi ka tixaka tontlhe ta mababyi, a tlhela kambe a vuxa vanhu hi ka vafileko. Jesu i mahile lezo na a fela ku komba lezi a nga wa ta zi maha misaveni yontlhe a xikhati lexi a mahileko Hosi ya mufumo wa Nungungulu.

Ntsena alakanyela hi lezi ku ta ngha na ku tsakisisa zona lomu paradiseni giswa misaveni! Jesu, zinwe ni vo kari va lava a va hlawulako, va ta ngha na va fuma le tilweni. A vafumeli lavo va ta hlayisa a munhu ni munhu misaveni va tlhela va va tsakisa. A hi woneni lezi hi faneleko ku zi maha lezaku hi tiyiseka ku ngalo Nungungulu i ta hi nyika a wutomi ga pinzukelwa lomu paradiseni gakwe ga giswa.