A madimoni ma hemba maku a vafileko va hanya

A Biblia gi ngalo Satani i ‘khohlisa a tiko gontlhe.’ (Kuvululelwa 12:9) Satani ni madimoni yakwe a va zi lavi lezaku hi kholwa ka Mhaka ya Nungungulu, a Biblia. Va zama ku kholwisa vanhu lezaku a vafileko va hanya kunwanyani lomu ku tshamako zivangwa za moya. A hi woneni a ku va zi mahisa kuyini lezo.

Wukhongeli ga mawunwa

Wukhongeli ginyingi gi gonzisa lezaku a vanhu vontlhe va nani muhefemulo wu hunzako wuya lomu ku tshamako zivangwa za moya anzhako ka kufa ka miri. Vona ve ngalo a miri wafa kanilezi a muhefemulo a wufi. Ku tsika lezo, va tiyisa lezaku a muhefemulo a wu ngefi.

Kanilezi a Mhaka ya Nungungulu a yi gonzisi lezo. A Biblia gi komba lezaku a muhefemulo i munhu, na ku nga hi nchumu wu nga nzeni kakwe. Hi xikombiso, loku gi tlhamusela a kuvangiwa ka Adamu, a Biblia ga wula: “Jehova Nungungulu i lo wumba munhu hi tshuri wa misava, ni ku mu pupuxela tinhovini a moya wa kuhanya, ni munhu i lo maha muhefemulo wu hanyako.” (Genesisi 2:7, Tradução do Novo Mundo.) Hilezo Adamu a nga nyikwangi a muhefemulo; yena i wa hi muhefemulo.

A zihari na zonawu zi vitanwa a ku mihefemulo. — Genesisi 1:20, 21, 24, 30, NM.

Kota lezi a gezu ga Biblia “muhefemulo” gi wulako munhu wutsumbu, a zi faneli ku hi hlamalisa a ku tiva lezaku a moya wu ngafa niku, wafa. A Mitsalo yi ngalo:

• “A muhefemulo lowu wu onhako wu tafa.” — Ezekieli 18:4.

• “Samsoni i te ngalo: ‘A wufe muhefemulo wa mina ni maFilistia.’” — Valamuli 16:30, NM.

• “Zi fanele ku maha kusaseka hi siku ga sabado, kutani ku maha kubiha ke? A ku hanyisa munhu [muhefemulo, NM], kutani ku daya ke?” — Marku 3:4

Yinwani mitsalo yi komba lezaku a mihefemulo yi nga loviswa (Genesisi 17:14), ku dawa hi tlhari (Joxua 10:37), ku tlimbiwa (Joba 7:15) ni ku mbemba (Jona 2:5). Hizalezo, a muhefemulo wafa.

Loku u gonza a Biblia kusukela kusanguleni kala magumo ya gona, u nga ta kuma a magezu “muhefemulo wu nga fiko.” A muhefemulo wa munhu a hi moya. A gonzo ya ku ngafi ka muhefemulo a hi ya Biblia. I gonzo ya Satani ni madimoni yakwe. Jehova i venga mawunwa wontlhe ya wukhongeli. — Mavingu 6:16-19; 1 Timote 4:1, 2.

Vangoma

Ndlela yinwani leyi Satani a khohlisako hi yona vanhu hi vangoma. A mungoma munhu loyi a zi kotako a ku amukela mahungu ma humako tikweni ga zivangwa za moya hi kukongoma. A vanhu vo tala nguvu, a kupatsa ni vangoma ha voce, va kholwa lezaku a mahungu lawo mata hi ka mimoya ya vafileko. Kanilezi, kota lezi hi zi wonileko lomu ka Biblia, lezo a zi koteki. — Mutshawuteli 9:5, 6, 10.

Makunu, mata hi ka mani a mahungu lawo? Hi ka madimoni wutsumbu! Wona ma zi kota ku cuwukela munhu loku yena a ha hanya; ma zi tiva lezi a nga kari a wulawulisa zona, lezi a nga tshamisile zona, lezi a nga zi maha ni lezi a nga zi tiva. Hilezo za ma hehukela a ku pimanyisa vanhu va fileko. — 1 Samueli 28:3-19.

Mitsheketo

A ndlela yinwani leyi Satani a vuvumisako hi yona a mawunwa xungetano hi vafileko hi mitsheketo. A mitsheketo leyo zikhati zo tala yi hambukisa a vanhu ka lisine la Biblia. — 2 Timote 4:4.

A Afrika ku nani mitsheketo yinyingi xungetano hi vanhu va wonilweko na va hanya anzhako ka kuva va file. Hi tolovelo, a ziwono lezo zi maheka kule nguvu ni lomu munhu loye a nga kari a hanya kona. Kanilezi ti wutise: ‘Xana za zwala lezaku loku munhu i wa hi ni ntamu wa ku wuya hi ka vafileko, i wa ta wuyela ka wutshamu legi gi nga kule nguvu ni ngango ni vanghana vakwe ke?’

Kambe, ku wa nga tava zona lezaku a munhu loye a wonilweko o fana ni loyi a fileko ntsena? Hi xikombiso, vatireli vambiri va maKristu va nga kari va xumayela ka wutshamu va wonile wanuna a khosaheleko na a kari a va lanzelela hi tihora to kari. Loku va mu wutisile, vona va tivile lezaku yena i wa pimisa a ku munwe wa vona i wa hi makabye wakwe a nga file malembanyana nzhako. Hi lisine, yena i wa phazamile, kanilezi a nga vumelangi a ku yena i wa phazamile. Alakanyela a mhaka leyi a wanuna loye a khosaheleko a yi byelileko vanghana ni vaakelani vakwe!

Miwoniso, miloro ni magezu

Handle ko kanakana wa tiva zilo zi nga tolovelekangiko lezi vanhu va zi wonileko, va zi zwileko, kutani ku zi lora. A zilo zo tshamisa lezo zikhati zinyingi za chavisa lava zi va humelelako. Marein, a nga kari a tshama le Mupela-gambo wa Afrika, xikhati xontlhe i wazwa a gezu ga kokwani wakwe wa xisati, loyi a fileko, na a mu vitana ni wusiku. Hi kuchava, Marein i waba huwa a vuxa a ngango wontlhe. Hi kugumesa i lo hlanya.

Makunu, loku a vafileko va wa hanya hakunene, za zwala lezaku vona va wa ta chavisela a varanzekako va vona? Ahihi. A mahungu lawo ma hluphako mata hi ka madimoni.

Kanilezi hi nga ku yini hi mahungu lawa ma wonekisako ku khwatsi ma vuna ni ku tiyiseta? Hi xikombiso, Gbassay, wa le Serra Leoa, i wa babya. Yena ive ni noro lowu a raru wakwe a nga woneka ka yena. I mu leletele lezaku aya ka sinya yo kari a ya teka tluka a gi patsa ni mati anwa. Yena i wa nga faneli ku wulawula ni munhu na a nga se ku maha lezo. I mahile lezo a hanya.

Wasati munwani i te ngalo a nuna wakwe i humelele kakwe wusiku go kari anzhako ka kuva a file. A wasati loye i te ngalo a nuna wakwe i wa sasekile nguvu niku i wa ambele tinguwo to saseka.

Mahungu lawo ni miwoniso u ngaku zi nene ni ku khwatsi za vuna. Zita hi ka Nungungulu? Ahihi. Jehova i “Nungungulu wa lisine.” (Tisimu 31:5) Cima i wa nga ta zi ranza a ku hi kanganyisa kutani ku hi khohlisa. A madimoni hi wona ntsena ma mahako lezo.

Kanilezi, ma kona a madimoni ya ma nene? Ahihi. Hambu loku ma wonekisa ku khwatsi ma vuna zikhati zinwani, wontlhe ma bihile. Laha Diyabu a nga wulawula na Eva, yena i wa ku khwatsi munghana. (Genesisi 3:1) Kanilezi kuve wahi magumo, anzhako ka kuva Eva a mu ingisile ni ku maha lezi a nga wula? I file.

Wena wa zi tiva lezaku zi tolovelekile a ku munhu wa kubiha a ti maha munghana wa lava a lavako ku va khohlisa ni ku va kanganyisa. A vingu go kari ga Afrika gi ngalo: “Matino yo basa, mbilu ya ntima.” Niku a Mhaka ya Nungungulu yi wula lezi: “Satani wa ti hunzula a ku khwatsi i ngelosi ya kuwonekela.” — 2 Va Le Korinte 11:14.

Nungungulu a nga ha wulawuli ni vanhu laha misaveni hi ku tirisa miloro, miwoniso kutani magezu ma humako hi ka tiko ga zivangwa za moya. Yena i va kongomisa niku va gonzisa hi ku tirisa a Biblia, legi gi zi kotako ku maha munhu ava wo “mbhelela, na a longiselelwe a mitiro yontlhe yo saseka.” — 2 Timote 3:17.

Hizalezo, loku Jehova a hi tlharihisa xungetano hi kukhohlisa ka Diyabu, yena i maha lezo hilezaku wa hi ranza. Yena wa zi tiva a ku a madimoni valala vo leva.