Xigonzo 2

Hi Mani Nungungulu?

Hi mani Nungungulu wa lisine, a vito gakwe hi gihi? (1, 2)

I miri wa lixaka muni a nga nawo? (3)

Hi wahi matshamela yakwe ma ti dlunyatisaku nguvu? (4)

Hi fanele ku tirisa zifananiso ni zikombekiso loku hi mu khozela? (5)

Hi tihi tindlela timbiri ti nga hi kotisako ku gonza nchumo xungetano hi Nungungulu? (6)

1. A vanhu va khozela michumu yinyingi. Kanilezi a Biblia gi hi byela lezaku kuni Nungungulu munwe ntsena wa LISINE. Yena i vangile zontlhe zi nga kona le tilweni ni laha misaveni. Lezi a nga hiha wutomi, hi yena Yece hi faneleko ku mu khozela. — 1 Va Le Korinte 8:5, 6; Kuvululelwa 4:⁠11.

2. Nungungulu i ni zikhundla zinyingi, kanilezi i ni vito ginwe ntsena. A vito lego hi JEHOVA. A ka wunyingi ga maBiblia, a vito ga Nungungulu gi susilwe, gi valetwa hi zikhundla zo khwatsi hi HOSI kutani NUNGUNGULU. Kanilezi a kutsaliweni ka Biblia, a vito ga Jehova a gi kumeka xipimo xa 7.000 wa makhati! — Eksodusi 3:15; Tisimu 83:18.

3. Jehova i ni miri, kanilezi a wu fanani ni wa hina. “Nungungulu i Moya”, ku wula Biblia. (Johani 4:24) A moya xiwumbeko xa wutomi go tlakuka ku hunza le’ga hina. Cima a ku na munhu a wonileko Nungungulu. Jehova i tshama tilweni, kanilezi yena wa zi kota a ku wona zontlhe. (Tisimu 114, 5; Johani 1:18) Kasike, xini a moya wa ku basa? A hi munhu wo fanana na Nungungulu. A wutshanwini ga lezo, i ntamu wu tiriswako hi Nungungulu. — Tisimu 104:30.

4. A Biblia ga hi wonekelisa a wumunhu ga Jehova. Gi komba lezaku a matshamela yakwe la’ma dlunyatekako liranzo, kululama, wutivi ni ntamu. (Deuteronome 32:4; Joba 12:13; Isaya 40:26; 1 Johani 4:8) A Biblia gi hi byela kambe lezaku yena wa zwela wusiwana, munene, wa tsetselela, wa wuhana, ni ku i ni lihlaza-mbilo. Hina, kota vana va ingisako, hi fanele hi zama ku mu pimanyisa. — Va Le Efesusi 5:1, 2.

5. Hi fanele ku hi khizamela zifananiso, makwadro kutani zikombekiso, hambu ku hi zi khongelela a ku khozeleni ka hina ke? Ahihi! (Eksodusi 20:4, 5) Jehova i ngalo ku laveka ku hi khozela yena yece, hakuva a nga hlengeli a wudzunzo gakwe ni munhu ge hambu ni xinwani xilo. A zifananiso a zi na ntamu wa ku hi vuna. — Tisimu 115:4-8; Isaya 42:8.

6. Hi yihi ndlela ya ku hiya mahlweni hi ku tiva Nungungulu? Yinwe ndlela hi ku cuwukisisa zilo a zi vangileko ni ku alakanyela khwatsi lezi zi hi tlhamuselako. A zivangwa za Nungungulu zi hi komba ku i ni ntamu wa wunyingi ni wutivi. Hi wona liranzo lakwe ka zontlhe a zi mahileko. (Tisimu 19:1-6; Va Le Roma 1:20) Yinwani ndlela ya ku tiva nchumu xungetano hi Nungungulu hi ku gonza Biblia. Ka gona a hi byela a ku yena i Nungungulu wa lixaka muni. A hi tivisa kambe xungetano hi khungo gakwe ni lezi a zi lavako ku hi zi maha. — Amosi 3:7; 2 Timote 3:16, 17.

[Mifota ka phajina 5]

Hi gonza zo kari xungetano hi Nungungulu hi zivangwa zakwe ni Biblia