Xipimo Xa Wumbiri
Dumisa Jehova Kota Nungungulu Munwe Wa Zinene
1. Himani Nungungulu munwe wa zinene?
A BIBLIA gi wula lezaku hambulezi ku nga kona vanungungulu vanyingi, “kasike ka hina i kona Nungungulu munwe, a Dadani.” (1 Va Le Korinte 8:5, 6) A ‘Nungungulu loye wa munwe’ hi Jehova, a Muvangi wa zilo zontlhe. (Deuteronome 6:4; Kuvululelwa 4:11) Jesu i wulile lezaku yena i “Nungungulu wa mina ni Nungungulu wa nwina.” (Johani 20:17) Yena i vumelelene na Mosi, loyi a wulileko na ka hi mahlweni a ku ngalo: “Jehova i Nungungulu, a ku kona munwani ahandle kakwe.” (Deuteronome 4:35) Jehova i tlakukile nguvu a ku hunza ni xihi xi khozelwako, zo kota zifananiso, vanhu va khozelwako, kutani a nala wakwe Satani Diyabu, a nungungulu wa mafambisela lawa ya zilo. (2 Va Le Korinte 4:3, 4) A kuhambana ni zontlhe lezo, Jehova i ‘Nungungulu yece wa zinene,’ kota lezi Jesu a nga mu vitanisa zona. — Johani 17:3.
2. A xikhati lexi hi gonzako xungetano hi Nungungulu, xana a wutomi ga hina gi fanele ku khumbisiwa kuyini?
2 A vanhu lava va bongako na va gonza xungetano hi matshamela yo tsakisa ya Nungungulu, zinwe ni lezi a zi mahako ni lezi a ha to hi mahela, va kokelwa ka yena. A xikhati lexi a liranzo labye li kulako, va susumeteka a ku mu dumisa. Hi ndlela muni? A yinwe ya tindlela ku byela vanwani xungetano hi yena. A bhuku ga 2 Va Le Korinte 4:13 gi ngalo: “Nza kholwa, hikwalaho nza wulawula.” A yinwani ndlela ku mu pimanyisa hi magezu ni mitiro. A bhuku ga Va Le Efesusi 5:1 gi ngalo: “Mahani vapimanyisi va Nungungulu, khwatsi hi vanana va ranzekako.” Kasi ku maha lezo hi kumbheleleko, hi fanele ku tiva Jehova kota lezi yena hakunene a nga zona.
3. Hi wahi a matshamela ya Nungungulu lawa ma ti dlunyatisako nguvu?
3 Lomu ka Biblia gontlhe, ku na ni timhaka to tala ti kombako a matshamela ya Nungungulu lawa ma ti dlunyatisako nguvu. A matshamela yakwe ma ti dlunyatisako nguvu hi wutlhari, kululama, ntamu, ni liranzo. “Nungungulu i na ni wutlhari.” (Joba 12:13) “Tontlhe tindlela takwe ti lulamile [“kululama,” NM].” (Deuteronome 32:4) Yena i na ni ‘ntamu wa hombe.’ (Isaya 40:26) “Nungungulu liranzo.” (1 Johani 4:8) Hambulezo, a ka matshamela lawa ya mune ma ti dlunyatisako nguvu ya Nungungulu, hi gihi legi gi kombako khwatsi a wumunhu gakwe?
“Nungungulu Liranzo”
4. Hi gihi tshamela ga Nungungulu legi gi mu kucileko a ku vanga a wuako ni zilo zontlhe zi hanyako?
4 Wona lezi zi nga maha Jehova a vanga wuako ni zivangwa za moya ni vanhu va pimisako. Kuve wutlhari kutani ntamu wakwe? Ahihi, hambulezi Nungungulu a tirisileko a matshamela lawo, a hi wona ma nga mu kuca. Niku a kululama kakwe ku wa nga mu kurumeti lezaku a hlengela a xinyikiwo xa wutomi ni vanwani. Kuhambana ni lezo, a liranzo la hombe la Nungungulu li mu kucile lezaku a hlengela a litsako la kuvakona kakwe kota munhu a pimisako ni vanwani. A liranzo li mu susumetile lezaku a maha khungo ga kuva a vanhu va ingisako va hanya Paradiseni kala kupinzuka. (Genesisi 1:28; 2:15) A liranzo li mu kucile lezaku a maha malulamiselo ya ku susa nzhukano lowu wu tisilweko ka vanhu hi xionho xa Adamu.
5. Hi kuya hi Biblia, xana Jehova mufananiso wa gihi tshamela, niku hikuyini?
5 Hikwalaho, a ka matshamela wontlhe ya Nungungulu, legi gi ti dlunyatisako nguvu liranzo. A liranzo hi lona li nga wumunhu gakwe. Hambulezi a wutlhari gakwe, a kululama, ni ntamu, zi nga za lisima, a Biblia cima a gi wuli lezaku Jehova i ginwe ga matshamela lawo. Kanilezi gona hakunene ga wula lezaku yena i liranzo. Ina, Jehova hi yena mufananiso wa liranzo. A liranzo lelo li rangelwa hi matshinya ya milayo, na ku nga hi kutizwa. A liranzo la Nungungulu li fumelwa hi matshinya ya milayo ya zinene ni kululama. A tshamela legi xikombiso xo tlakuka nguvu xa liranzo, kota lezi li kombisiwako hi Jehova Nungungulu wutsumbu. A liranzo lelo xikombiso xo mbhelela xa ku nga hi na makangwa niku a xikhati xontlhe li longoloka ni mitiro yi dlunyatekako khwatsi.
6. Zini zi mahako lezaku zi koteka a kuva hi pimanyisa Nungungulu, hambulezi yena a nga wo tlakuka a ku hunza hina?
6 Hi gona a tshamela legi go tsakisa ga liranzo gi hi vunako a ku pimanyisa Nungungulu loye. Kota vanhu va nyalidede, va kungambhelelangi, ni va kuhoxisa, ha zi kota ku alakanya lezaku cima a hi nge zi koti a ku pimanyisa Nungungulu hi kumbhelela. Kanilezi ku na ni xinwani xikombiso xa liranzo la hombe la Jehova: Yena wa ku tiva a kutsanzeka ka hina niku a nga rinzeli lezaku hiva lava va mbheleleko. Wa zi tiva lezaku hi le kule ni kumbhelela. (Tisimu 51:5) Lezo hi zona zi mahako a bhuku ga Tisimu 130:3, 4 giku ngalo: “Loku wena Jehova u wa hlaya zigoho, Hosi, himani a nga wa ta yima? Kanilezi a kutsetselelwa ku le ka wena.” Ina, Jehova i “Nungungulu wa wuxinji ni tipswalo, loyi a nonokako ku zangara, loyi a teleko hi wuxinji.” (Eksodusi 34:6) “Wena Hosi u nene, wa tsetselela.” (Tisimu 86:5) A hi ku tsakisa ka zona! A hi ku tangalisa ka zona a ku tirela Nungungulu loyi wo tsakisa ni ku wona a kuhlayisa kakwe ka liranzo ni ka tipswalo!
7. Xana a liranzo la Jehova li nga woniswa kuyini mitirweni yakwe ya kuvanga?
7 A liranzo la Jehova la zi kota ku woniwa kambe mitirweni yakwe ya kuvanga. Alakanyela zilo zinyingi lezi Jehova a hi nyikileko kasi hi ti buza ha zona, zo kota zitsunga zo saseka, makhwati, mativa, ni mabimbi. Yena wa hi nyika kuga ko nanziha ka kuhambanahambana hi ndlela yo hlamalisa kasi ku hi wundla. Ahandle ka lezo, Jehova wa hi nyika tixaka to tala ta zitsangi zo saseka ni zo nuhela zinwe ni zihari zo hlamalisa. Yena i mahile zilo lezi zi nyikako litsako ka vanhu, hambu lezi a nga kurumetwangiko ku zi maha. Hakunene, a kuhanya misaveni leyi ya kubiha ka matshamela lawa ya hina ya kungambhelelangi, a hi nge zi koti a ku ti buza khwatsi hi kuvanga kakwe. (Va Le Roma 8:22) Kanilezi, alakanyela ntsena lezi Jehova a to hi mahela a Paradiseni! A muyimbeleli wa Tisimu wa hi tiyisa: “U vulula canja ga wena, u xurisa zontlhe lezi zi hanyako.” — Tisimu 145:16.
8. Hi xihi a xikombiso xi ti dlunyatisako nguvu xa liranzo la Jehova ka hina?
8 Hi xihi a xikombiso xi ti dlunyatisako nguvu xa liranzo la Jehova ka vanhu? A Biblia gi tlhamusela giku: “Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi a kholwako kakwe a nga lovi, kanilezi ave ni wutomi ga pinzukelwa.” (Johani 3:16) Xana Jehova i mahile lezo hi kota ya wunene ga vanhu? A bhuku ga Va Le Roma 5:8 gi hlamula giku: “Nungungulu wa kombisa a kuhiranza kakwe hi lexi, lezaku na ha hi vaonhi Kristu i lo hi fela.” Hakunene, Nungungulu i lo rumela a N’wana wakwe wo mbhelela misaveni lezaku a ta nyikela wutomi gakwe kota nzhiho kasi ku hi tirula ka nzhukano wa xionho ni kufa. (Mateu 20:28) Lezo zi vululile ndlela ya lezaku a vanhu lava va ranzako Nungungulu va kuma wutomi ga pinzukelwa. Hi ndlela yi bongekako, a liranzo la Nungungulu li khumba vontlhe lava va lavako ku maha kuranza kakwe, hakuva a Biblia gi hi byela lezi: “Nungungulu a nga hi na xihlawulela; kanilezi ka tixaka tontlhe loyi a mu chavako, ni ku maha kululama wa amukeleka ka yena.” — Mitiro 10:34, 35.
9. Xana a kuva Jehova a nyikele N’wana wakwe kota nzhiho, zi fanele ku hi khumbisa kuyini?
9 Xana a kuva Jehova a nyikele N’wana wakwe kota nzhiho, na zi hi vululela ndlela ya ku kuma a wutomi ga pinzukelwa, zi fanele ku khumbisa kuyini a mahanyela ya hina zalezi? Lezo zi fanele a ku anzisa a liranzo la hina ha Nungungulu wa zinene, Jehova. Hi kufanana, zi fanele ku hi maha hi ingisa Jesu loyi a yimelako Nungungulu. “[Jesu] i lo fela vontlhe kasi lava va hanyako va nga ha ti hanyeli wutsumbu, kanilezi va hanyela loyi a ngafa . . . hi kota ya vona.” (2 Va Le Korinte 5:15) A hi ku tsakisa ka zona a ku lanzela nkonzo wa Jesu, hakuva yena i ve xikombiso kupimanyiseni ka liranzo la Jehova ni tipswalo takwe! Lezo zi kombiwa hi lezi Jesu a nga byela a vakoramileko: “Tanani ka mina, nwina nwentlhe mu tirako ni ku binzwa, nzi ta mu humuta. Rwalani a pingu wa mina, mu gonza ka mina; hakuva nzi rulile, nzi hi ni mbilu yi koramileko; mu ta kuma kuhumula mihefemulweni ya nwina. Hakuva a pingu wa mina a wu tsanzi, ni nzhwalo wa mina wa hehuka.” — Mateu 11:28-30.
Kombisa Liranzo Ka Vanwani
10. Hi tihi tindlela to kari leti hi nga kombisako ha tona liranzo ka maKristu-kulori?
10 Xana hi nga kombisa kuyini lezaku ha ranza maKristu-kulori ku fana ni lezi Jehova na Jesu va hi ranzisako zona? Wona tindlela to tala leti hi nga kombisako ha tona lezo: “A liranzo li na ni lihlaza-mbilu, li nene; a liranzo a li na makangwa; a liranzo a li ti mahisi matshanza, a li ti kukumukisi, a li mahi lezi zi nga faneliko, a li ti laveli za lona, a li na kuzangara, a li alakanyeli hi kubiha loku li mahelweko kona; a li tsaki hi lezi zi nga lulamangiko, kanilezi li tsakelana ni zinene. Li nonoka ku zwata zilo zontlhe, li kholwa zilo zontlhe, li tsumba zilo zontlhe, li timisela zilo zontlhe. A liranzo cima li nga ta fuva.” — 1 Va Le Korinte 13:4-8; 1 Johani 3:14-18; 4:7-12.
11. Xana hi fanele ku kombisa liranzo ka mani kambe, niku hi nga zi mahisa kuyini lezo?
11 Xana hi fanele ku kombisa liranzo ka mani kambe, niku hi nga zi mahisa kuyini lezo? Jesu i te ngalo: “Hikwalaho fambani, mu va maha vapizani a matiko wontlhe, mu va bapatiza hi vito ga Dadani ni ga N’wana ni ga Moya wa ku Basa; mu va gonzisa a ku gonga zontlhe lezi nzi mu layileko zona.” (Mateu 28:19, 20) Lezo zi patsa a ku hlengela mahungu yo saseka ya misava yiswa ya paradise leyi yi tako ya Nungungulu ni lava va kalako va nga seva maKristu-kulori. Jesu i kombile ziku dlunya lezaku a liranzo la hina a li faneli ku kombisiwa ntsena ka makholwa-kulori, hakuva yena i te ngalo: “Loku mu ranza [ntsena] lava va mu ranzako, i nchachazelo muni mu nga nawo ke? Hambu a vahlengisi a va mahi lezo ke? Loku mu losa vamakabye va nwina ntsena, mu va hunza hi yini a vanwani? Na vona vamatiko a va mahi lezo ke?” — Mateu 5:46, 47; 24:14; Va Le Galatia 6:10.
“Famba Vitweni Ga Jehova”
12. Hikuyini a vito ga Nungungulu gi fanelako yena ntsena?
12 A mhaka yinwani ya lisima ya kudumisa a Nungungulu wa zinene hi ku tiva, ku tirisa, ni ku gonzisa vanwani a vito gakwe go hambana ni wontlhe, Jehova. A muyimbeleli wa Tisimu i kombisile a kuxuva loku ka mbilu yontlhe: “Kasi va fela ku tiva lezaku hi wena wece u nga ni vito ga Jehova, loyi a Hunzeleleko Kutlakuka misaveni yontlhe.” (Tisimu 83:18) A vito Jehova gi wula ku ngalo “Yena I Maha Lezaku Ziva Kona.” Hi yena wa Hombe Loyi a mahako makungo a tlhela a ma tatisa xikhati xontlhe. Niku hi yena yece a Nungungulu wa zinene loyi a fanelwako hi kuva ni vito lego, hakuva a vanhu cima a va zi koti ku tiyiseka lezaku a mizamo yabye yi ta humelela. (Jakobe 4:13, 14) Jehova hi yena yece a zi kotako ku wula lezaku a mhaka yakwe “yi ta hetisa” lezi a yi rumeleko zona. (Isaya 55:11) A vanyingi va hlamala nguvu a xikhati lexi va wonako a vito ga Nungungulu lomu ka maBiblia yabye hi khati go sangula va tlhela va tiva lezi gi wulako zona. (Eksodusi 6:3) Kanilezi va ta vuneka hi wutivi lego ntsena loku va “famba vitweni ga Jehova . . . kala kupinzuka.” — Mika 4:5.
13. Zini zi patsekako kutiveni ka vito ga Jehova ni ku famba vitweni gakwe?
13 Xungetano hi vito ga Nungungulu, a bhuku ga Tisimu 9:10 gi wula lezi: “A va ku tsumbe lava va tivako a vito ga wena.” Lezo zi patsa a ku hunza ku tiva a vito ga Jehova ntsena, lezi zi nga wuliko lezaku a ku mu tsumba ku ti mahekela ha koce. A ku tiva a vito ga Nungungulu zi wula a ku zwisisa ni ku bonga a matshamela ya Nungungulu loyi Jehova a nga yena, a ku kombisa xichawo hi wuhosi gakwe, a ku ingisa a zileletelo zakwe, ni ku mu tsumba zilweni zontlhe. (Mavingu 3:5, 6) Hi kufanana, a ku famba vitweni ga Jehova zi wula a ku ti hendleleta ka yena ni ku mu yimela kota munwe wa vakhozeli vakwe, hizinene hi tirisa a wutomi ga hina hi kuyelana ni kuranza ka Nungungulu. (Luka 10:27) Xana wa maha lezo?
14. Kasi hi zi kota ku tirela Jehova kala kupinzuka, zini zi lavekako wutshanwini ga ku hiva ni maalakanyo ya ku maha zilo hi ku rumiwa ntsena?
14 Kasi hi zi kota ku tirela Jehova kala kupinzuka, a hi faneli ku kuciwa hi maalakanyo ya ku maha zilo hi ku rumiwa ntsena. Mupostoli Paule i khongotele Timote, loyi a nga kari a tirela Jehova hi malembe yo tala, aku ngalo: “Ti tolovete a kuhanya ka kukholwa.” (1 Timote 4:7) A kuhanya ka kukholwa ku huma hi ka mbilu leyi yi teleko hi kubonga hi munhu loyi a kukholwa ku yako ka yena. A “kuhanya ka kukholwa” ku kombisa a wudzunzo ni xichawo xo eta ka Jehova wutsumbu. Kona ku kombisa a kukhomelela ka yena hi liranzo hi kota ya kuhlamala hi nga nako ha yena ni tindlela takwe. Ku hi maha hi lava lezaku a vanhu vontlhe va wona a vito gakwe kota ga lisima nguvu. Loku hi lava ku famba vitweni ga Jehova, a Nungungulu munwe wa zinene, kala kupinzuka, hi fanele ku hlakulela a kuhanya ka kukholwa wutomini ga hina. — Tisimu 37:4; 2 Pedro 3:11.
15. Hi nga mu khozelisa kuyini Nungungulu yece?
15 Kasi ku tirela Jehova hi ndlela yo amukeleka, hi fanele ku mu khozela hi kumbheleleko, kota lezi yena a nga “Nungungulu wo pinyama [“a lonzako ku khozelwa yece,” NM]. (Eksodusi 20:5) A hi nge zi koti ku ranza Nungungulu hi tlhela hi ranza a tiko legi go biha, legi Satani a nga nungungulu wa gona. (Jakobe 4:4; 1 Johani 2:15-17) Jehova wa tiva hi kumbhelela lezi a munwe ni munwani wa hina a ti karatako kuva zona. (Jeremia 17:10) Loku hina hakunene hi ranza kululama, yena wa zi wona lezo niku i ta hi vuna a ku timisela minzhingo ya hina ya siku ni siku. Na a hi seketela hi moya wakwe wa ku basa wa ntamu, i ta hi vuna a ku hlula a wubihi legi gi tatileko tiko. (2 Va Le Korinte 4:7) Yena kambe i ta hi vuna a ku hlayisa a kutsumba ka hina ka wutomi ga pinzukelwa misaveni ya paradise na ku tiyile. Hi nga wona a kutsumba loko ko tsakisa! Hi fanele a ku ku tsakela nguvu hi tlhela hi tirela Jehova, a Nungungulu wa zinene hi ku zi ranza, loyi a mahako lezaku a wutomi ga pinzukelwa gi koteka.
16. Zini u faneleko ku maha zinwe ni vanhu vanwani va timiliyoni?
16 A vanhu va timiliyoni misaveni yontlhe va vumela a xirambo xa muyimbeleli wa Tisimu hi kutsaka, loyi a tsalileko ku ngalo: “Dumisani Jehova zinwe na mina; a hi kuliseni zinwe a vito gakwe.” (Tisimu 34:3) Jehova wa ku ramba lezaku uva xikari ka zidlemo zi yako zi anza za vanhu va matiko wontlhe lava va dumisako ni ku kulisa Jehova.
Ziwutiso Za Kuvuxeta
• Xana Jehova munhu wa ku tshamisa kuyini? Xana hi vunekisa kuyini hi ku tiva khwatsi a matshamela yakwe?
• Xana hi nga vunisa kuyini vanhu vanwani a ku gonza a zinene xungetano hi Nungungulu?
• Zini zi patsekako kutiveni ka vito ga Jehova ni ku famba tindleleni takwe?
[Mifota ka phajina 14]
Jehova, hi liranzo lakwe la hombe, ‘i ta vulula canja gakwe a xurisa zontlhe lezi zi hanyako’