Xigonzo 4
Hi Mani Diyabu?
Satani Diyabu, i tile hi kwihi ke? (1, 2)
Xana Satani i hambukisisa kuyini vanhu ke? (3-7)
Hi kuyini u faneleko a ku kaneta Satani ke? (7)
1. A gezu gi nge “diyabu” gi xungeta loyi a wulawulako mawunwa yo biha hi munwani munhu. A ku “Satani” zi wula nala kutani mukaneti. Lawo magezu ma tiriswako kasi ku xungeta nala loyi wa hombe wa Nungungulu. A ku sanguleni yena i wa hi ngelosi yo mbhelela le tilweni yi nga hi zinwe na Nungungulu. Kanilezi, hi kufambeni ka xikhati i ti zwile na a fanelwa hi ku khozelwa loku hi nayo ku nga ka Nungungulu. — Mateu 4:8-10.
2. A ngelosi leyi, Satani, yi wulawulile na Eva hi nyoka. Hi ku mu byeletela mawunwa, yi mu kucetele a ku a nga ingisi Nungungulu. Hi ndlela leyi Satani i vukele lezi zi vitanwako “wuhosi” kutani xiyimeko xa Nungungulu kota loyi a nga Hehla-Hehla. Satani i phikizile mafumela ya Nungungulu, a ku xana ma dzunzeka ni ku ma bhinzulela a vafumiwi vakwe. Satani i tlhelile a tisa kukanakana xungetano ni ku ku nga ve ni munhu a to tshama na a tsumbekile ka Nungungulu. Hi ndlela leyi Satani i ti mahile nala wa Nungungulu. Hi lexo xigelo xi nga mu maha ku a vitaniwa Satani kutani Diyabu. — Genesisi 3:1-5; Joba 1:8-11; Kuvululelwa 12:9.
3. Satani i zama ku kanganyisa vanhu kasi ku va khozela yena. (2 Va Le Korinte 11:3, 14) Yinwe ndlela ya ku hambukisa hi yona vanhu hi wukhongeli ga mawunwa. Loku wukhongeli go kari gi gonzisa mawunwa xungetano hi Nungungulu, hi lisine gi tirela makungo ya Satani. (Johani 8:44) A ziro za wukhongeli ga mawunwa xinwani xikhati zi nga dzuka zi kholwa hakunene ku zi khozela Nungungulu wa tiyiso. Kanilezi hi lisine zi tirela Satani. Yena hi ‘nungungulu wa misava leyi’. — 2 Va Le Korinte 4:4.
4. A wungoma i yinwani ndlela leyi Satani a fumelako hi yona vanhu. Lavo kutani va nga vitana mimoya hi ku fela ku vikelwa, hi ku lava ku bayisa vanwani, hi ku fela ku vumba wumanziko hambu hi ku lava ku maha zihlamaliso. Satani hi yena a nga ntamu wo biha wu tlhotlhotelako yontlhe mikhuwo leyo. Kasi ku hi xalalisa Nungungulu, kulaveka ku hi nga ti ngheniseli ka wungoma. — Deuteronome 18:10-12; Mitiro 19:18, 19.
5. Satani kambe i hambukisa vanhu hi ku va zwisa matshanza yo hunza mpimo hi kota ya lixaka ni ku va maha va khozela tihlengeletano ta wupolitika. Vanwani va alakanya lezaku a tiko gabye hambu lixaka labye zi chukwana ku hunza za vanwani. Kanilezi lezo a hi lisine. (Mitiro 10:34, 35) Vanwani va yimela ku a tihlengeletano ta wupolitika ti ta mbheta a zikarato za vanhu. Hi ku maha lezo va ala Mufumo wa Nungungulu. Lowu hi wona ntsena wu to mbheta zikarato za hina. — Daniel 2:44.
6. Yinwani ndlela Satani a hambukisako hi yona vanhu hi ku va ringa hi mixuvo ya wuonhi. Jehova i ngalo hi fanele ku potsa mikhuwo yo biha, hakuva wa zitiva ku yi ta hi bayisa. (Va Le Galatia 6:7, 8) Kutani vanwani va nga lava ku u hlengela navo ka mikhuwo leyo. Kanilezi khumbula lezaku hi tiyiso hi Satani a lavako ku u maha lezo. — 1 Va Le Korinte 6:9, 10; 15:33.
7. Satani xinwani xikhati a nga tirisa tixanisa hambu ku kaneta hi ku fela ku ku hambukisa ka Jehova. Manwani maxaka ya wena ya ku ranzeka ma nga dzuka ma zangara nguvu hi ku u gonza a Biblia. Vanwani kutani va nga ku hleka. Kanilezi hi mani a ku nyikileko a wutomi ke? Satani i lava ku ku dzukisa kasi ku u tsika ku gonza xungetano hi Jehova. U nga vumeli ku Satani a hlula! (Mateu 10:34-39; 1 Pedro 5:8, 9) Hi ku kaneta Diyabu, u nga tsakisa Jehova ni ku komba lezaku u yimela a wuhosi Gakwe. — Mavingu 27:11.
[Mifota ka phajina 9]
A wukhongeli ga mawunwa, a wungoma ni wutiko zi hambukisa vanhu
[Mifota ka phajina 9]
Kaneta Satani hi kuya mahlweni u gonza zo kari xungetano hi Jehova