Xigonzo 6

Xini Mufumo Wa Nungungulu?

Wu kumeka kwihi a Mufumo wa Nungungulu? (1)

Hi mani Hosi ya wona ke? (2)

Va kona vanwani va fumako ni Hosi ke? Loku ku hi lezo vangani ke? (3)

Xini xi kombako ku hi hanya masikwini yo gumesa ke? (4)

Xana a Mufumo wa Nungungulu wu ta va mahela yini vanhu xikhatini xitako ke? (5-7)

1. Loku Jesu na a ha hi misaveni, i gonzisile valanzeli vakwe a ku khongela hi Mufumo wa Nungungulu. A mufumo i wukosi gi rangelwako hi hosi. A Mufumo wa Nungungulu i wukosi go hlawuleka. Wu le tilweni kambe wu ta fuma misava. Wu ta basisa vito ga Nungungulu. Wu ta kotisa ku a ku ranza ka Nungungulu ku mahiwa laha misaveni khwatsi hi lezi ku mahiwako le tilweni. — Mateu 6:9, 10.

2. Nungungulu i tsumbisile ku Jesu i ta maha Hosi ya Mufumo wakwe. (Luka 1:​30-33) A xikhati lexi Jesu a nga hi misaveni, i kombisile ku i tava Mufumeli wa munene, wo lulama ni wo mbhelela. Loku a tlhelile tilweni, a nga tekelangi ku vekiwa xitshanwini xa wuhosi kota Hosi ya Mufumo wa Nungungulu. (Maheberu 10:12, 13) Hi 1914, Jehova i nyikelile ka Jesu a wufumeli legi a nga mu tsumbisile gona. Kusukela lexo xikhati, Jesu wa fuma le tilweni kota Hosi leyi yi hlawulweko hi Jehova. — Danieli 7:13, 14.

3. Kambe Jehova i langile vavanuna ni vavasati va ku tsumbeka lezaku vaya tilweni. Zinwe na Jesu, va ta fuma vanhu kota tihosi, valamuli ni vapristi. (Luka 22:28-30; Kuvululelwa 5:9, 10) Jesu i vitanile vafumi-zinwe lavo kota “ntlhambi wu tsongwani”. A ntsengo wabye i 144.000. — Luka 12:32; Kuvululelwa 14:1-3.

4. A xikhati Jesu a nga maha Hosi, i hoxile Satani ni tingelosi takwe to biha le handle ka matilo, ti ta misaveni. Lezi hi zona zi vangako ku a michumu yi za yi biha nguvu laha misaveni ku sukela hi 1914. (Kuvululelwa 12:9, 12) Tiyimpi, tindlala, tinghumbe, a ku tlula milayo loku ku anzako — zontlhe lezo zi maha xipanze xa “xiwoniso” xi kombako ku Jesu wa fuma ni ku a mafambisela lawa ya zilo ma le masikwini ya wona yo gumesa. — Mateu 24:3, 7, 8, 12; Luka 21:10, 11; 2 Timote 3:1-5.

5. Ka xikhatanyana xitako, Jesu i ta lamula vanhu, a va avanyisa khwa hilezi a murisi a avanyisisako zona tiyivu ni timbuti. A “tiyivu” hi lava va nga ti komba kuva vafumelwi vakwe vo tsumbeka. Va ta amukela a wutomi ga pinzukelwa laha misaveni. A “timbuti” hi lava va alileko a Mufumo wa Nungungulu. (Mateu 25:31-34, 46) Ka xikhati xitako xi nga kusuhani, Jesu i ta hihirita vontlhe lava va fanako ni timbuti. (2 Va Le Tesalonika 1:6-9) Loku u lava kuva munwe wa “tiyivu” ta Jesu, u fanele ku chela kota hi mahungu ya Mufumo ni ku u hanya hi kuzwanana ni lezi u gonzako. — Mateu 24:14.

6. Inyamuthla a misava yi avanyisilwe hi matiko yo tala. Ginwe ni ginwani gini mufumo wa gona. A matiko lawo ma tala ku tshama hi kulwisana. Kanilezi a Mufumo wa Nungungulu wu ta valeta yontlhe mifumo ya vanhu. Wu ta rangela yontlhe misava kota mufumo wunwe ntsena. (Danieli 2:44) Hizalezo ku nga ha tava kona tiyimpi, wugevenga ni madzolonga. Vontlhe va ta hanya zinwe hi ku rula ni ku zwanana. — Mika 4:3, 4.

7. A Kufumeni ka Jesu ka 1.000 wa malembe, a vanhu vo tsumbeka va ta maha vo mbhelela ni misava yontlhe yi ta hunzuluka yiva paradise. A kumbheleni ka 1.000 wa malembe Jesu i tava a mbhetile zontlhe lezi a nga rumiwa hi Nungungulu ku zi maha. Hi kona a to tlhelisela a Mufumo ka Dadani wakwe. (1 Va Le Korinte 15:24) Hi kuyini u nga hlawuteli a vangana ni maxaka ya wena lezi a Mufumo wa Nungungulu wu to zi maha ke?

[Mufota ka phajina 13]

A hasi ka mufumo wa Jesu, ku nga ha tava kona livengo ge hambu xihlawuhlawu