Xigonzo 8

A Wutomi Ga Ngango Gi Xalalalisako Nungungulu

Hi xihi xiyimeko xa wanuna laha ngangweni ke? (1)

A wanuna i fanele ku hlayisa sati hi ndlela muni ke? (2)

Hi tihi tifanelo ta raru ke? (3)

Xipanze muni a nga naxo wasati laha ngangweni ke? (4)

Zini lezi Nungungulu a zi lavako ka vapswali ni ka vana? (5)

Hi wahi mawonela ya Biblia hi ku hambana ni ku tlhatlha wukati ke? (6, 7)

1. A Biblia gi ngalo a nuna hi yena hloko ya ngango wakwe. (1 Va Le Korinte 11:3) Ku fanela ku a wanuna ava ni sati munwe ntsena. Vona va fanele ku va chadile khwatsi hi nayo. — 1 Timote 3:2; Titusi 3:1.

2. A wanuna i fanele ku ranza sati khwa hi lezi a ti ranzisako zona wutsumbo. I fanele ku mu hlayisa kota lezi Jesu a hlayisisako zona valanzeli vakwe. (Va Le Efesusi 5:25, 28, 29) A nga faneli ku phakata sati ge hambu ku mu xanisa. Ku tsika lezo, i fanele ku mu dzunza ni ku mu komba xichawo. — Va Le Kolosi 3:19; 1 Pedro 3:7.

3. A raru i fanele ku tira hi ku hiseka a fela ku wundla ngango wakwe. I fanele ku lavela sati ni vana a zakuga, tinguwo ni muti. A raru i fanele kambe ku chela kota hi zilaveko za ngangu wakwe za le moyeni. (1 Timote 5:8) Yena i rangela ngangu hi ku wu vuna ku gonza zo kari hi Nungungulu ni makhungo Yakwe. — Deuteronome 6:4-9; Va Le Efesusi 6:4.

4. A sati i fanele kuva muvuneteli munene wa nuna wakwe. (Genesisi 2:18) Yena i fanele ku vuna nuna kugonziseni ni kuwundleni ka vana. (Mavingu 1:8) Jehova i rinzela ku a wasati a hlayisa ngangu hi liranzo. (Mavingu 31:10, 15, 26, 27; Titusi 2:4, 5) Yena i fanele ku va ni xichawo xo eta ka nuna wakwe. — Va Le Efesusi 5:22, 23, 33.

5. Nungungulu i lava ku a vana va ingisa vapswali vabye. (Va Le Efesusi 6:1-3) I rinzela ku a vapswali va gonzisa ni ku va kawuka vana. Ku laveka ku a vapswali va hunzisa xikhati ni vana ni ku va gonza Biblia navo, na va va khatalela hi zilaveko za le moyeni ni za le kutizweni ka timbilu tabye. (Deuteronome 11:18, 19; Mavingu 22:6, 15) A vapswali a va faneli ku laya vana hi timholova ni lunya. — Va Le Kolosi 3:21.

6. Loku nuna ni sati va nga zwani khwatsi, va fanele ku zama ku tirisa milayo ya Biblia. A Biblia gi hi ruma ku hi komba liranzo ni ku hi tsetselelana. (Va Le Kolosi 3:12-14) A Gezu ga Nungungulu a gi leleteli a ku hambana kota ndlela yo xuxa timhaka ta ti tsongwani. Kanilezi a sati kutani a nga ti hlawulela a ku tsika nuna, loku (1) hi nkanu a ala ku wundla ngango wakwe, (2) loku a hi wa timholova, laha kaku a veka mhangweni a kuhanya ni wutomi gakwe, kutani (3) loku a kukaneta kakwe ku hi ka hombe a kuza ku mu sivela ku khozela Jehova. — 1 Va Le Korinte 7:12, 13.

7. A nuna ni sati va fanele ku tsumbana. A wubhayi i xionho ka Nungungulu ni ka loyi u nga tekana naye. (Maheberu 13:4) A kutlhangana ni munhu handle ka ngango hi kona ntsena ku seketelwako hi Biblia kota xigelo xo tlhatlha wukati ni xa muchado wa wuswa. (Mateu 19:6-9; Va Le Roma 7:2, 3) Jehova wa zi nyenya lezaku a vanhu va tlhatlha wukati na va nga hi na xiseketelo xa Biblia, va ya tekana ni munwani munhu. — Malaki 2:14-16.

[Mifota ka phajina 16, 17]

Nungungulu i rinzela ku a vapswali va gonzisa ni ku va laya vana

[Mifota ka phajina 17]

A raru wa liranzo i wundla ngango hi le nyameni ni le moyeni