Xigonzo 10

Mitiro Yi Nyenyiwako Hi Nungungulu

Xana U fanele ku va ni mawonela muni hi zilo lezi Nungungulu a nge zi bihile? (1)

Xana hi wahi matirisela ya ziro za wubeleki ma bihileko ke? (2)

Xana a muKristu a fanele ku va ni mawonela muni xungetano hi kuhemba? (3), mihlakano ya tibedja? (3), kuyiva? (3), timholova? (4), wungoma? (5) ni wudakwa? (6)

Hi nga zi kotisa kuyini a ku ti tlhatlha ka mitiro leyo yo biha ke? (7)

1. A malanza ya Nungungulu ma ranza lezi zi nga zinene. Kanilezi ma fanele kambe a ku ma gonza a ku venga lezi zi bihileko. (Tisimu 97:10) Lezo zi wula a ku potsa a mitiro yo kari yi nyenyiwako hi Nungungulu. Ku nga va yihi mitiro yaleyo ke?

2. Wurembi: A ku tlhangana ka wanuna ni wasati vo kala va nga se chada, a wubhayi, a kuetlela ni zihari, a kuetlela ni maxaka ni kuetlela ni wanuna kutani wasati kulori, zontlhe lezo zionho za hombe ka Nungungulu. (Levi 18:6; Va Le Roma 1:26, 27; 1 Va Le Korinte 6:9, 10) Loku a wanuna ni wasati va nga chadangi, kanilezi na va tshama zinwe, va fanele ku va tsikana kutani ku va chada hi nayo. — Maheberu 13:4.

3. Kuhemba, Mihlakano Ya Tibedja, Kuyiva: Jehova Nungungulu a nga dzuki a hemba. (Titusi 1:2) A vanhu lava va lavako a ku vumeliwa hi yena va fanele ku va tsika a kuhemba. (Mavingu 6:16-19; Va Le Kolosi 3:9, 10) Yontlhe mihlakano, yo yelana ni kubedjela mali kutani michumu, yi nyamisiwa hi makangwa. Hikwalaho a maKristu a ma ti ngheniseli ka mihlakano ya tibedja, yo fana ni tibedja ta mathikithi, mapalisana ya mahaxi ni bingo. (Va Le Efesusi 5:3-5) Kambe, a maKristu a ma yivi. A ma xavi zilo na ma tiva lezaku zi lo yiviwa, ge hambu a ku teka zilo na ma nga vumeletiwangi. — Eksodusi 20:15; Va Le Efesusi 4:28.

4. Xizangazangani, Timholova: A xizangazangani xo kala lipimo xa zi kota a ku vuxa timholova. (Genesisi 4:​5-8) A zikoteki ku a munhu wa timholova ava munghana wa Nungungulu. (Tisimu 11:5; Mavingu 22:​24, 25) Zi bihile a kuphota kutani ku tlhelisela a kubiha hi kubiha loko vanwani va hi maheleko. — ⁠Mavingu 24:29; Va Le Roma 12:​17-21.

5. Wuloyi Ni Wungoma: A vanwanyani vanhu va kombela a mitamu ya mimoya kutani ya tinguluve loku va zama a ku kalamuxa mababye. Vanwani va loya a valala vabye kasi ku va vababyisa kutani futsi ku va vadaya. A ntamu wu vangisako yontlhe mitiro yo kari wuta hi ka Satani. Hikwalaho a maKristu ma fanele ku ma nga ti ngheniseli ka yona. (Deuteronome 18:9-13) A ku tshama na hi tshinelela ka Jehova i ndlela yinene yo ti vikela ha yona loku vanwani va dzuka va hi loya. — Mavingu 18:10.

6. Wudakwa: A zi bihangi a kunwa vinya gitsongwani, byala kutani xihokwe xo kari. (Tisimu 104:15; 1 Timote 5:23) Kanilezi a kunwa ko hunza mpimo ni wudakwa zi bihile le mahlweni ya Nungungulu. (1 Va Le Korinte 5:11-13; 1 Timote 3:8) A kunwa handle ka lipimo ku nga hahlula wutomi ni ku hambanyisa ngango wa wena. Kambe ku nga ku maha u hatla u hluleka ka ziringo zinwanyani. — Mavingu 23:20, 21, 29-35.

7. A vanhu lava va mahako a zilo lezi Nungungulu a nge zi bihile “va nga taga a tshomba ya mufumo wa Nungungulu”. (Va Le Galatia 5:19-21) Loku wena hakunene u ranza Nungungulu, na wu lava a ku mu xalalisa, u ta zi kota a ku ti tlhatlha ka mitiro yo kari. (1 Johani 5:3) Gonza a ku venga lezi Nungungulu a nge zi bihile. (Va Le Roma 12:9) Tshama zinwe ni vanhu lava va nga ni mahanyela ya manene. (Mavingu 13:20) A maKristu-kulori, ma buvileko, ma nga zi kota a ku ku vuna. (Jakobe 5:14) A hehla ka zontlhe lezo, themba a xivuno xa Nungungulu, u xi koxa hi ndlela ya mukombelo. — Va Le Filipi 4:6, 7, 13.

[Mifota ka phajina 20]

Nungungulu a nyenya a wudakwa, a kuyiva, mihlakano ya tibedja, ni timholova