Xigonzo 11
Zigonzo Za Xikholwa Ni Mikhuwo Yi Nga Tsakisiko Nungungulu
Hi zihi a zigonzo ni mikhuwo yi bihileko ke? (1)
Ma fanele a maKristu ku kholwa lezaku Nungungulu Vanharu-munwe? (2)
Hi kuyini a maKristu ya lisine ma kalako ma nga gi a Khisimuso, ma nga hlayisi a Pasika ya nguva leyi, ge hambu ku hlayisa masiku ya kubelekwa? (3, 4)
Xana a vafileko va zi kota a ku hlupha la’ vahanyako? (5)
Jesu i fele xihambanweni ke? (6)
Xana a ku tsakisa Nungungulu ku na ni lisima muni? (7)
1. A ku bihangi zontlhe zigonzo kutani yontlhe mikhuwo. Kanilezi, Nungungulu a nga yi vumeli, loku yi ntumbuluka ka wukhongeli ga mawunwa kutani loku yi hambana ni zigonzo za Biblia. — Mateu 15:6.
2. Vanharu-munwe: Xana Jehova Vanharu-munwe — vanhu vanharu ka Nungungulu munwe ke? Ahihi! Jehova, Dadani, hi yena ‘Nungungulu yece wa zinene’. (Johani 17:3; Marku 12:29) Jesu i N’wana wakwe wa matewula, a kumekako lahasi ka Nungungulu. (1 Va Le Korinte 11:3) Dadani ngwa hombe a ku hunza N’wana. (Johani 14:28) A moya wa ku basa a hi munhu; i ntamu wu tiriswako hi Nungungulu. — Genesisi 1:2; Mitiro 2:18.
3. Khisimuso Ni Pasika: Jesu a nga pswaliwangi hi siku ga 25 wa Dezembro. A pswaliwile kusuhani ni siku ga 1 wa Outubro, ku nga xikhati xa lembe lexi a varisi va nga kari va lavelela a mitlhambi yabye le handle, ni wusiku. (Luka 2:8-12) Jesu cima a nga leletelangi lezaku a maKristu ma wa hlayise a siku ga kupswaliwa kakwe. Ku tsika lezo, i rumile lezaku ma hlayisa kutani ma alakanya a kufa kakwe. (Luke 22:19, 20) A Khisimuso ni mikhuwo ya yona zi sukela ka wukhongeli ga kale ga mawunwa. Hi ndlela yo fanana ku ntumbulukile a mikhuwo, ya masiku lawa, ya lezi va nge i Pasika, yo fana ni ku tirisa ka matanza ni migwadja. A maKristu ya ku sangula ma wa nga gi Khisimuso ge hambu ku hlayisa a Pasika ya nguva leyi; a maKristu ya lisine, ya nyamuthla, nawonawu a ma mahi zakunghaho.
4. Masiku Ya Kubelekwa: A mibuzo, ya yimbiri ntsena, yo tsakela a masiku ya kubelekwa, yi kumbukiwako lomu ka Biblia, yi wahi ya vanhu vo kala va nga khozeli Jehova. (Genesisi 40:20-22; Marku 6:21, 22, 24-27) A maKristu ya ku sangula ma wa nga hlayisi a masiku ya ku belekwa. A mukhuwo wa ku tsakela a ku tlhanganyisa ka malembe wu ntumbuluka ka wukhongeli ga kale ga mawunwa. A maKristu ya lisine ma hanana zinyikiwo hambu ku hungata zinwe ka zikhati zinwani za lembe.
5. Kuchava Lava Vafileko: Lava vafileko a va zi koti a ku maha nchumo ge hambu kuzwa nchumu. A hi zi koti a ku va vuna, navonawu a va zi koti a ku hi hlupha. (Tisimu 146:4; Mutshawuteli 9:5, 10) A muhefemulo wa fa; a wu simami wu hanya anzhako ka kufa. (Ezekieli 18:4) Kanilezi, zinwani zikhati, a tingelosi to biha, ti tibyako kota madimoni, ti ti hunzula ti ku khwatsi to va mimoya ya vafileko. A mikhuwo yi yelanako ni kuchava kutani kukhozela lava vafileko yi bihile. — Isaya 8:19.
6. Xihambano: Jesu a nga felangi xihambanweni. I fele ka mhanze kutani ka sika. A gezu ga Xigreki, legi a ka ma Biblia manyingi gi hunzuluswako kota “xihambano”, gi xungeta a mhanze ntsena. A mufananiso wa xihambano wu sukela ka wukhongeli ga kale ga mawunwa. A maKristu ya ku sangula ma wa nga tirisi ge hambu a ku khozela xihambano. Hikwalaho, u pimisa lezaku zi lulamile a ku tirisa xihambano loku hi khongela ke? — Deuteronome 7:26; 1 Va Le Korinte 10:14.
7. Zi nga dzuka zi karata a ku fularela a zigonzo ni mikhuwo yo kari. A maxaka ni vangana va nga dzuka va zama a ku ku kucetela lezaku u nga cici a kukholwa ka wena. Kanilezi, a ku tsakisa Nungungulu ku na ni lisima la hombe ku hunza a ku tsakisa vanhu. — Mavingu 29:25; Mateu 10:36, 37.
[Mufota ka phajina 22]
Nungungulu a hi Vanharu-munwe
[Mufota ka phajina 23]
A Khisimuso ni Pasika ya nguva leyi zi ntumbu- luka ka wukhongeli ga kale ga ma- wunwa
[Mufota ka phajina 23]
A ku na xigelo xa ku hi khozela kutani hi chava lava vafileko