Xigonzo 15

Ndlela Ya Ku Vuna Vanwani Lezaku Va Maha A Kuranza Ka Nungungulu

Hi kuyini u faneleko a ku hlawutela vanwani lezi u zi gonzako? (1)

U nga bikela mani a mahungu lawa yo saseka ke? (2)

Xana u nga va vunisa kuyini vanwani hi mahanyela ya wena ke? (2)

Hi rini u ta nga zi kota a ku xumayela zinwe ni bandla ke? (3)

1. Makunu, u gonzile zilo zinyingi zo saseka lomu ka Biblia. A wutivi legi gi fanele gi ku maha u hlakulela a wumunhu ga wuKristu. (Va Le Efesusi 4:22-24) A wutivi lego gi laveka nguvu kasi ku u fela ku kuma a wutomi ga pinzukelwa. (Johani 17:3) Kanilezi, a vanwani va fanelewo a ku tiva a mahungu lawa yo saseka kasi ku na vonawu va ta kota kuponisiwa. Wontlhe a maKristu ya lisine mafanele ma fakaza a wukustumunyu ka vanwani. Lowo i nayo wa Nungungulu. — Va Le Roma 10:10; 1 Va Le Korinte 9:16; 1 Timote 4:16.

2. Wena u nga zi kota a ku sangula hi ku hlawutela a mahungu lawa yo saseka u ma gonzako ka vanwani lava u kumanako navo. Bhula hi wona ni maxaka, ni vanghana, ni zigonzani kutani vatiri-kulori. Maha lezo hi zinene ni lihlaza-mbilu. (2 Timote 2:24, 25) Alakanya lezaku a vanhu va tolovela a ku chela kota nguvu ka mahanyela ya munhu a ku hunza ka lezi a zi wulawulako. Hikwalaho, a mahanyela ya wena ya manene ma zi kota a ku maha vanwani va ingisa a mahungu lawa u va bikelako. — Mateu 5:16; 1 Pedro 3:1, 2, 16.

3. Hi ku famba ka xikhati, u taza u ringanelwa hi ku sangula a ku xumayela zinwe ni bandla ga Timboni ta Jehova lomo xipanzeni xa nwina. Lego i zambu ga lisima kasi ku u simama kuya mahlweni. (Mateu 24:14) A hi litsako u ta nga lizwa loku u kota a ku vuna munhu lezaku a maha nanza ga Jehova ni ku a kuma wutomi ga pinzukelwa! — 1 Va Le Tesalonika 2:19, 20.