Xigonzo 6

A Paradise Yi Laha Kusuhani!

Zilo zo biha zi mahekako lomu Misaveni zi komba lezaku a Paradise yi laha kusuhani. A Biblia gi wulile lezaku ku wa tava kona zikhati zo tshisa xikhatanyana mahlweni ka ku chikela Paradise. Makunu hi hanya zikhatini lezo. Zinwe za lezi a Biblia gi nga kari gi wula a ku zi wa ta maheka hi lezi:

Tiyimpi ta hombe. “A tiko gi ta vukela tiko, ni mufumo wu ta vukela mufumo.” (Mateu 24:7) Xiprofeto lexi xi tatisekile. Kusukela lembe ga 1914, kuve kona tiyimpi timbiri ta yontlhe misava ni tiyimpi tinyingi ta titsongwani. A ka tona ku file makume ya mazana ya makume ya mazana ya vanhu.

Kuenzeleka ka mababyi. ‘Ni ka matshamu ma tsalangeneko ku wa tava kona mitungu’. (Luka 21:11) Za maheka lezo ke? Ina. Cancro, mababyi ya mbilu, ndele, mudinyani, Sida ni manwani mababyi ma daya makume ya mazana ya makume ya mazana ya vanhu.

Kuvumaleka ka zakuga. Misaveni yontlhe va kona vanhu va nga hiko ni zakuga zo enela. Gontlhe lembe makume ya mazana ya makume ya mazana ya vanhu mafa hi ndlala. Lexi hi xinwani xikombiso xa ku a Paradise yi ta chikela lokuloku. A Biblia gi ngalo: “Ni tindlala ti tava kona.” — Marku 13:8.

Kutsekatseka ka misava. “Ku tava kona . . . kutsekatseka ka misava matshanwini ma tsalangeneko.” (Mateu 24:7) Ni lezi za maheka xikhatini xa hina. Kusukela 1914 ku file vanhu vo hunza khume ga mazana ga khume ga mazana hi kutsekatseka ka misava.

Vanhu va kubiha. A vanhu va wa tava “varanzi va mali” niku va wa ta “ti ranza wutsumbu”. Va wa ta ‘ranza ku ti tsakisa ku hunza ku ranza Nungungulu’. A vana va wa tava lava “va nga ingisiko vapswali vabye”. (2 Timote 3:1-5) A wu vumeli lezaku nyamutlha va kona vanhu vanyingi vakunghahi ke? Vanhu lava va nga chaviko Nungungulu, niku va vanga zikarato ka lava va lavako ku gonza nchumu hi Yena.

Wugevenga. Kambe ku wa tava kona “kuenzeleka ka kuonha”. (Mateu 24:12) Kuzilava wa vumela lezaku a wugevenga makunu gi hunza legi ga malembe ma hunzileko. Lomu zipanzini zontlhe vanhu va lomu mhangweni ya ku hlaselwa, ya ku wela khombyeni ga ku kanganyiswa niku onhelwa.

Zontlhe lezo zi komba lezaku a Mufumo wa Nungungulu wu laha kusuhani. A Biblia gi ngalo: “Laha mu ta nga wona lezi zilo zi maheka, zi tiveni lezaku a mufumo wa Nungungulu wu tshinele.” (Luka 21:31) Xini Mufumo wa Nungungulu? Wukosi ga Nungungulu ga le tilweni gi to neha Paradise Misaveni. A Mufumo wa Nungungulu wu ta valeta wukosi ga vanhu. — Danieli 2:44.