Xigonzo 10

Gi Nga Kumiswa Kuyini Wukhongeli Ga Lisine

Loku u lava kuva munghana wa Nungungulu, u fela ku tirisa wukhongeli legi Nungungulu a gi amukelako. Jesu i te ngalo “vakhozeli va nene” va wa ta khozela Nungungulu maringano ni “zinene”. (Johani 4:23, 24) Ku na ni ndlela yinwe ntsena yi lulamileko ya ku khozela Nungungulu. (Va Le Efesusi 4:4-6) Wukhongeli ga lisine gi yisa wutomini ga pinzukelwa ni wukhongeli ga mawunwa gi yisa kulobyisweni. — Mateu 7:13, 14.

Wa zi kota ku tiva wukhongeli ga lisine hi ku cuwukela lava va gi tirisako. Kota lezi Jehova a nga mu nene, a vakhozeli vakwe va va nene va fela kuva vanhu va nene. Kota lezi a dinwa wu nene wu pswalako madinwa ma nene, wukhongeli ga lisine gi pswala vanhu va nene. — Mateu 7:15-20.

Vanghana va Jehova va na ni xichawo xo eta hi Biblia. Va zi tiva lezaku a Biblia ga Nungungulu. Va vumela lezaku lezi gi wulako zi rangela wutomi gabye, zi lamula zikarato zabye niku zi va vuna ku gonza nchumu hi Nungungulu. (2 Timote 3:16) Vona va hlota ku maha lezi va kanelako.

Vanghana va Jehova va komba lezaku va ranzana. Jesu i kombile liranzo hi vanhu hi ku va gonzisa nchumu hi Nungungulu, hi ku chuma vababyi. Lava va tirisako wukhongeli ga lisine va kombawo lezaku va ranza vanwani. Kota Jesu, a va chepeti zisiwana kutani lava va nga va wunwani ntlawa. Jesu i te ngalo vanhu va wa ta tiva vapizani vakwe hi liranzo leli va nga wa ta komba munwe ka vanwani. — Johani 13:35.

Vanghana va Nungungulu va dzunza vito Gakwe, Jehova. Loku wo kari a ala ku tirisa vito ga wena, yaloye i wa tava munghana wa wena wa laha kusuhani ke? Ahihi! Loku hi hi ni munghana, hi tirisa vito gakwe ni ku wulawula khwatsi hi yena ka vanwani. Hikwalaho, lava va lavako kuva vanghana va Nungungulu va fanele ku tirisa vito gakwe ni ku wulawula hi yena ka vanwani. Jehova i lava lezaku hi maha lezo. — Mateu 6:9; Va Le Roma 10:13, 14.

Kota Jesu, vanghana va Nungungulu va gonzisa vanhu a Mufumo wa Nungungulu. Mufumo wa Nungungulu wukosi ga le tilweni legi gi to hunzulusa Misava yiva paradise. Vanghana va Nungungulu va byela vanwani mahungu lawo yo saseka hi Mufumo wa Nungungulu. — Mateu 24:14.

Timboni ta Jehova ti hlota kuva vanghana va Nungungulu. Ti na ni xichawo hi Biblia niku ti na ni liranzo xikari ka tona. Kambe ti tirisa ni ku dumisa a vito ga Nungungulu niku ti gonzisa vanwani a Mufumo wa Nungungulu. A Timboni ta Jehova ti tirisa wukhongeli ga lisine nyamutlha lomu Misaveni.