Xipimo Xa Wukhume Ni Mune
Xana Jehova I Rangelisa Kuyini A Hlengeletano Yakwe?
1. Mahungu muni xungetano hi hlengeletano ya Jehova lawa a Biblia gi ma kombisako, niku hikuyini ma hi ya lisima ka hina?
XANA Jehova i na ni hlengeletano? A Mitsalo yi pimisilweko yi hi byela lezaku i nayo. Lomu Mhakeni yakwe, wa hi kombisa kutsongwani a xipanze xo hlamalisa xa le tilweni xa hlengeletano leyo. (Ezekieli 1:1, 4-14; Danieli 7:9, 10, 13, 14) Hambulezi hi nga zi kotiko ku wona a xipanze lexo xi nga wonekiko, xona xi khumba nguvu a vakhozeli va lisine inyamutlha. (2 Tihosi 6:15-17) A hlengeletano ya Jehova kambe yi na ni xipanze xi wonekako, laha misaveni. A Biblia ga hi vuna a ku yi tiva niku Jehova i yi rangelisa kuyini.
A Hi Tiveni A Xipanze Xa Yona Xi Wonekako
2. I bandla muni ga giswa legi Nungungulu a gi vangileko?
2 A tiko ga ka Israeli gi tshamile malembe ya 1.545 na gi hi hlengeletano kutani bandla ga Nungungulu. (Mitiro 7:38) Kanilezi a tiko ga ka Israeli a gi hlayisangi a milayo ya Nungungulu gi tlhela gi ala a N’wana wakwe. Hi kota ya lezo, Jehova i lo ala a bandla legiya zonake a gi tsika. Jesu i lo byela lezi a vaJuda: “Langutani, mu ta siyelwa a yindlu ya nwina, na yi hi rumbi.” (Mateu 23:38) Hikwalaho Nungungulu i lo vanga a bandla giswa, legi a nga maha nago a xivumelwano xiswa. A bandla lego gi wa fanele ku wumbiwa hi vanhu va 144.000 va hlawulilweko hi Nungungulu lezaku va tlhanganiswa ni N’wana wakwe le tilweni. — Kuvululelwa 14:1-4.
3. Xini xi mahekileko hi Pentekosta wa lembe ga 33 Nguveni ya Hina kota xikombiso xo dlunyateka xa lezaku Nungungulu makunu i wa tirisa a bandla giswa?
3 A vanhu va kusangula va bandla lego ga giswa va lo totiwa hi moya wa ku basa wa Jehova hi Pentekosta wa lembe ga 33 Nguveni ya Hina. Xungetano hi ximaho lexo xo hlawuleka, ha gonza: “Laha a siku ga Pentekosta gi nga wa chikele, vona vontlhe va wa tsombene wutshamu ginwe. Hi xitshuketi ku lo zwakala hi le tilweni a kuvumavuma kota a bhubhutsa ga mheho ya ntamu, ku tata a yindlu leyi va nga wa tshamile ka yona. Ku lo woneka kabye a tirimi to fanana ni nzilo, ti nga avanyeka ku tshama linwe hehla ka munwe ni munwani. Vontlhe va lo tatiswa hi Moya wa ku Basa.” (Mitiro 2:1-4) Hikwalaho a moya wa Nungungulu wu lo nyika xikombiso xo dlunyateka xa lezaku lowu makunu wu wa hi wona a ntlawa wa vanhu lava Nungungulu a nga wa ta wu tirisa kasi ku tatisa a khungo gakwe gi rangelwako hi Jesu Kristu le tilweni.
4. Hi vamani inyamutlha va wumbako a hlengeletano ya Jehova yi wonekako?
4 Inyamutlha, misalela ntsena ya lava va 144.000 yi nga kona laha misaveni. Kanilezi kota kutatiseka ka xiprofeto xa Biblia, “a xidlemo xa tsanza-vahlayi” xa “tiyivu tinwani,” va nga vanhu va timiliyoni, va patsana ni misalela ya vatotilweko. Jesu, a Murisi Nene, i patsile a tiyivu leto tinwani ni misalela lezaku va wumba a ntlhambi wunwe ntsena wu nga mandleni yakwe kota Murisi munwe wa tona. (Kuvululelwa 7:9; Johani 10:11, 16) Vontlhe lavo va wumba bandla ginwe gi nga ni wumunwe, a hlengeletano ya Jehova yi wonekako.
A Hlengeletano Leyi Yi Rangelwako Hi Nungungulu
5. Himani loyi a rangelako a hlengeletano ya Nungungulu, niku i zi mahisa kuyini?
5 A magezu ya Mitsalo lawa ma nge “bandla ga Nungungulu a hanyako” ma komba khwatsi loyi a gi rangelako. A hlengeletano leyi yi rangelwa hi Nungungulu. Jehova i rangela vanhu vakwe hi ku tirisa Jesu, loyi Yena a mu yimisileko lezaku ava Hloko yi nga wonekiko ya bandla, wa tirisa a Mhaka Yakwe yi pimisilweko kambe, a Biblia. — 1 Timote 3:14, 15; Va Le Efesusi 1:22, 23; 2 Timote 3:16, 17.
6. (a) Xana a wurangeli ga le tilweni gi wonekisile kuyini bandleni ka zana ga malembe ga kusangula? (b) Xini xi kombako lezaku Jesu wa ha hi Hloko ya bandla?
6 A wurangeli lego gi wonekile giku dlunya hi Pentekosta. (Mitiro 2:14-18, 32, 33) Gi lo woneka a xikhati lexi a ngelosi ya Jehova yi nga rangela a kuhangalaswa ka mahungu yo saseka le Afrika, a xikhati lexi a gezu ga Jesu gi nga nyika zileletelo kuhunzulukeni ka Saule wa le Tarsusi, ni xikhati lexi Pedro a nga sangula a ntiro wa kuxumayela xikari ka Vamatiko. (Mitiro 8:26, 27; 9:3-7; 10:9-16, 19-22) Kanilezi, hi kufamba ka xikhati, a ka ha zwiwangi kambe a magezu na ma huma hi le tilweni, hambu a tingelosi a ta ha woniwangi, ge hambu a zinyikiwo za ku maha zihlamaliso a za ha nyikiwangi munhu. Hambulezo, Jesu i wa tsumbisile aku: “Mangabye, nzi na nwina a masiku wontlhe, na kona kugumelweni ka xikhati.” (Mateu 28:20; 1 Va Le Korinte 13:8) A Timboni ta Jehova inyamutlha ta vumela a wurangeli ga Jesu. Ahandle ka gona, a kuxumayelwa ka mahungu ya Mufumo mahlweni ka tixanisa to tshisa ku wa nga ta koteka.
7. (a) Himani a wumbako a “nanza gi tsumbekileko ni go tlhariha,” niku hikuyini? (b) I ntiro muni lowu wu nyikilweko a “nanza”?
7 Xikhatanyana mahlweni ka kufa kakwe, Jesu i byelile vapizani vakwe xungetano hi “nanza gi tsumbekileko ni go tlhariha” legi yena kota Hosi a nga wa ta gi nyika a wutihlamuleli go hlawuleka. A “nanza” lego gi wa tava kona a xikhati lexi a Hosi yi nga wa ta suka yiya tilweni niku gi wa ta simama gi tira hi ntamu kuwuyeni ka Kristu ku nga wonekiko ntanwini wa Mufumo. A tlhamuselo lowo wu wa nga ta fanela a munhu munwe, kanilezi wa fanela a bandla gi totilweko ga Kristu. Hi kuva a gi xavile hi nkhata wakwe, Jesu i lo gi wula kota “nanza” gakwe. Yena i lo nyika ntiro a ziro za gona wa ku maha vapizani ni ku va gisa hi kukhanzakanya, zi va nyika “zakuga [za moya] hi xikhati xi faneleko.” — Mateu 24:45-47; 28:19; Isaya 43:10; Luka 12:42; 1 Pedro 4:10.
8. (a) Wutihlamuleli muni legi a ntlawa wa nanza wu nga nago zalezi? (b) Hikuyini a hlamulo wa hina xungetano hi gonziselelo ya Nungungulu leyi yi tako hi ku tiriswa a nanza wu nga wa lisima?
8 Kota lezi a ntlawa wa nanza wu nga kari wu maha a ntiro wa Hosi hi kutsumbeka kuwuyeni ka yona ku nga wonekiko hi 1914, ku na ni xikombiso xa lezaku gona gi nyikilwe wutihlamuleli go engeteleka hi 1919. A malembe lawa ma hunzileko kusukela masikwini lawo, xikhati xa ku nyika wukustumunyu misaveni yontlhe xungetano hi Mufumo, niku a xidlemo xa tsanza-vahlayi xa vakhozeli va Jehova xa hlengeletwa kasi xi poniswa kuxanisekeni ka hombe. (Mateu 24:14, 21, 22; Kuvululelwa 7:9, 10) Lava kambe va na ni xilaveko xa ku kuma zakuga za moya, niku zona zi phamelwa ka vona hi ntlawa wa nanza. Hikwalaho, kasi ku xalalisa Jehova hi fanele ku vumela a gonziselelo leyi a hi nyikako hi ku tirisa a nanza legi hi tlhela hi hanya hi kuyelana na yona.
9, 10. (a) Ka zana ga kusangula ga malembe, hi gihi a lulamiselo legi gi ngave kona kasi ku hlamula ziwutiso xungetano hi gonzo ni kunyika wurangeli ga kuxumayelwa ka mahungu yo saseka? (b) Hi gihi a lulamiselo ga ku wonelela a mitiro ya vanhu va Jehova legi gi nga kona inyamutlha?
9 A zikhati zinwani, ka vuka ziwutiso xungetano hi gonzo ni mamahela ya zilo. Hi zihi ziwutiso lezo? A bhuku ga Mitiro xipimo 15 gi hi byela lezi a mhaka yo kari xungetano hi Vamatiko lava va hunzulukileko yi nga tlhatlhiswa zona. A mhaka leyo yi lo yiswa ka vapostoli ni masingalakati le Jerusalema, lava va nga tira kota hubye-tshinya leyi yi fumako. A vavanuna lavo va wa nga mbhelelangi, kanilezi Nungungulu i lo va tirisa. Va lo kambisisa mitsalo xungetano hi mhaka leyo ni xikombiso xa kutira ka moya wa Nungungulu kuvululeni ka simu ga Vamatiko. Zonake va lo tsema a mhaka. Nungungulu i lo katekisa a lulamiselo lego. (Mitiro 15:1-29; 16:4, 5) Hi ka hubye-tshinya leyo, ku wa rumelwa vanhu lezaku va ya seketela a kuxumayelwa ka Mufumo.
10 A masikwini ya hina a Hubye yi Fumako ya hlengeletano ya Jehova yi wonekako yi wumbiwa hi vamakabye va totilweko hi moya va humako matikweni yo hambanahambana niku yi kumeka le zinza ga misava yontlhe ga Timboni ta Jehova. Hasi ka wuhloko ga Jesu Kristu, a Hubye yi Fumako yi seketela a wukhozeli gi basileko matikweni wontlhe, yi wonelela a mitiro ya kuxumayela ka Timboni ta Jehova lomu mabandleni ya tona ya makume ya makume ya mazana. Lava va nga Hubyeni yi Fumako va na ni mawonela yo fanana ni ya mupostoli Paule, loyi a nga tsalela maKristu-kulobye aku: “Na ku nga hi lezaku nzi ranza ku fumela a kukholwa ka nwina; kanilezi nza lava ku mu vuna a kuva mu tsaka, hakuva mu yimile khwatsi kukholweni.” — 2 Va Le Korinte 1:24.
11. (a) Xana a madota ni malanza ya wutireli ma yimisiswa kuyini? (b) Hi nga tirisanisa kuyini khwatsi ni lava va yimiswako?
11 A Timboni ta Jehova misaveni yontlhe ti rinzela a Hubye yi Fumako lezaku yi hlawula a vamakabye va ringanelwako, lava va vumelelwako a ku yimisa madota ni malanza ya wutireli kasi ku hlayisa mabandla. Lezi zi lavekako ka lava va yimisiwako zi kumeka lomu ka Biblia na zi tiveka lezaku a va mbhelelangi niku va hoxisa. A madota lawa ma seketelako a vanhu lavo zinwe ni lawa ma yimisako ma na ni wutihlamuleli ga hombe mahlweni ka Nungungulu. (1 Timote 3:1-10, 12, 13; Titusi 1:5-9) Hikwalaho, vona va maha mukhongelo hi ku lava xivuno xa moya wa Nungungulu ni ku lava kongomiso wa Mhaka yakwe yi pimisilweko. (Mitiro 6:2-4, 6; 14:23) A hi kombiseni kubonga ka “zinyikiwo ka vanhu,” lava va hi vunako hontlheni a ku chikela “kuzwaneni ka kukholwa.” — Va Le Efesusi 4:8, 11-16.
12. Xana Jehova i tirisa vavasati hi ndlela muni lomu hlengeletanweni ya Nungungulu?
12 A Mitsalo yi leletela lezaku a ntiro wa wurangeli wu fanele ku mahiwa hi vavanuna lomu bandleni. Lezo a zi tsongahati a vavasati, hakuva a vo kari va vona ziga-tshomba za Mufumo wa le tilweni, niku vona va maha zo tala ntirweni wa kuxumayela. (Tisimu 68:11) Kambe, hi ku khatalela a wutihlamuleli gabye ga ngango hi kutsumbeka, a vavasati va hlengela kudzunzweni ka bandla. (Titusi 2:3-5) Kanilezi a ntiro wa kugonzisa lomu bandleni wu mahiwa hi vavanuna lava va yimiselwako ku wu maha. — 1 Timote 2:12, 13.
13. (a) Hi wahi mawonela lawa a Biblia gi kucako a madota lezaku mava nawo xungetano hi ntiro wa wona? (b) Hi gihi lungelo legi hina hontlhe hi zi kotako ku hlengela ka gona?
13 Lomu tikweni, a munhu loyi a nga ni xikhundla xo tlakuka i woniwa na a hi wa hombe, kanilezi lomu nzeni ka hlengeletano ya Nungungulu a nayo hi lowu: “Loyi a nga tsongwani xikari ka nwina nwentlhe, hi yena a nga wa hombe.” (Luka 9:46-48; 22:24-26) A Mitsalo yi nyika wusungukati ka madota lezaku ma ti wonela a kuva ma nga mahi tihosi hehla ka lava va nga tshomba ya Nungungulu kanilezi, wutshanwini ga lezo, ma maha zikombiso ka ntlhambi. (1 Pedro 5:2, 3) A hi ntlawa wutsongwani ntsena, kanilezi a Timboni ta Jehova tontlhe, vavanuna ni vavasati, va na ni lungelo ga ku yimela a Hosi ya Hombe wuakweni gontlhe, va wulawula hi vito ga yona hi kutikoramisa ni ku byela vanhu matshanwini wontlhe xungetano hi Mufumo.
14. Hi ku tirisa a mitsalo yi kumbukilweko, hlamula ziwutiso lezi zi xaxametilweko magumo ka nzimana leyi.
14 Hi maha khwatsi hi ku ti wutisa: ‘Xana hakunene nza bonga hi lezi Jehova a rangelisako zona a hlengeletano yakwe yi wonekako? Xana a matshamela, mawulawulela, ni mitiro ya mina za kombisa a kubonga loko?’ A ku ehleketa hi mawonela lawa ma lanzelako zi nga hi vuna lezaku hi maha a kuhlola loko.
Loku hakunene nzi ti veka hasi ka Kristu kota Hloko ya bandla, kota lezi zi kombiwako ka mitsalo leyi yi lanzelako, zini nzi to ngha nzi maha? (Mateu 24:14; 28:19, 20; Johani 13:34, 35)
A xikhati lexi nzi vumelako hi kubonga a zakuga za moya lezi zi tako hi ka ntlawa wa nanza ni ka Hubye ya wona yi Fumako, xana nzi kombisa xichawo ka mani? (Luka 10:16)
Xana vontlhe lomu bandleni, nguvunguvu a madota, va fanele ku khomisa kuyini vanwani? (Va Le Roma 12:10)
15. (a) Hi mawonela ya hina xungetano hi hlengeletano ya Jehova yi wonekako, zini hi kombisako? (b) Zini hi zi kotako ku maha kasi ku tiyisa lezaku Diyabu muhembi zinwe ni ku tsakisa a mbilu ya Jehova?
15 Jehova wa hi rangela inyamutlha hi ku tirisa a hlengeletano yakwe yi wonekako leyi yi nga mandleni ya Kristu. A mawonela ya hina xungetano hi lulamiselo lego ma kombisa lezi hi ti zwisako zona xungetano hi mhaka ya wuhosi. (Maheberu 13:17) Satani i phikiza lezaku lexi hi xi bayisekelako nguvu i kutshamiseka ka hina wutsumbu. Kanilezi loku hi tira hi tindlela tontlhe leti ti lavekako hi tlhela hi potsa zilo lezi zi kokelako kupima a ka hina wutsumbu, hi tiyisa lezaku Diyabu muhembi. Loku hi ranza ni ku komba xichawo ka lava va nga ni ntiro wa ku rangela xikari ka hina kanilezi na hi ala ku “hlawula vanhu hi kota ya bhinzu,” hi tsakisa Jehova. (Juda 16; Maheberu 13:7) Hi kuva hi tsumbeka ka hlengeletano ya Jehova, hi komba lezaku Jehova i Nungungulu wa hina niku hi na ni wumunwe wukhozelini gakwe. — 1 Va Le Korinte 15:58.
Ziwutiso Za Kuvuxeta
• Hi yihi a hlengeletano yi wonekako ya Jehova inyamutlha? Hi gihi a khungo ga yona?
• Himani a Hloko ya bandla yi yimisilweko, niku i tirisa a malulamiselo wahi ma wonekako lezaku a hi rangela hi liranzo?
• Hi wahi mawonela ma nene lawa hi faneleko a ku ma hlakulela xungetano hi lava va nga hlengeletanweni ya Jehova?
[Mifota ka phajina 133]
Jehova wa hi rangela hi ku tirisa a hlengeletano yakwe yi wonekako yi nga mandleni ya Kristu