“Alakanyani varangeli va nwina”

A MAGEZU lawa ya Paule ma tsalilwe ka Maheberu 13:7. Kusukela hi Pentekosta wa 33 Nguveni ya Hina kuya mahlweni, a vapostoli vo tsumbeka va Hosi Jesu Kristu va tirile kota hubye yi fumako va rangela a bandla giswa ga wuKristu gi nga ha hi ku yimiswa. (Miti. 6:2-4) Kanilezi, kwalomo ka lembe ga wu 49 ka Nguva ya Hina, a hubye yi fumako yi wa nga ha wumbiwi ntsena hi vapostoli va Jesu. A xikhati lexi ku nga mahiwa xiboho xi nga yelana ni wukwera, a hubye yi fumako leyi yi nga hi le Jerusalema yi wa wumbiwa hi “vapostoli ni masingalakati.” (Miti. 15:1, 2) Gi wa hi wutihlamuleli gabye a ku hlola timhaka leti ti nga khumba a maKristu wontlhe na ku nga khataliseki lomu ma nga hanya kona. Va lo ma rumelela a mapapilo ni zileletelo lezi zi nga tiyisa a mabandla zi tlhela zi vuna a vapizani a ku simama va tira ni ku hanya hi kuzwanana. A mabandla ma ingisile a wurangeli lego gi ngata hi ka hubye yi fumako niku hi kota ya lezo ma katekisilwe nguvu hi Jehova ma tlhela ma engeteleka. — Miti. 8:1, 14, 15; 15:22-31; 16:4, 5; Maheb. 13:17.

² Anzhako ka kufa ka vapostoli, ku lo vuka wuhluwuki ga hombe. (2 Tes. 2:3-12) Kota lezi Jesu a nga sina a profetile ka mufananiso wakwe wa tirigu ni nyasavari, a tirigu ku nga (maKristu ma totilweko) ma wa tlimbilwe hi nyasavari ku nga (maKristu ya mawunwa). Hi mazanazana ya malembe, a mitlawa leyo yi lo vumelelwa ku kula zinwe kala xikhatini xa kutshovela, ku nga “kugumesa ka tiko.” (Mat. 13:24-30, 36-43) A maKristu ma totilweko ma lo simama ku ti buza hi tipswalo ta Jesu xikhatini lexo, kanilezi ku wa nga hi na hubye yi fumako, ge hambu ndlela yo kongoma leyi Jesu a nga yi tirisa kasi ku nyika zileletelo ka valanzeli vakwe va laha misaveni. (Mat. 28:20) Hambulezo, i wa profetile lezaku a zilo zi wa ta cica xikhatini xa kutshovela.

³ “Hi wihi loyi a nga nanza gi tsumbekileko ni go tlhariha?” Hi xiwutiso lexi, Jesu i lo sangula mufananiso lowu wu nga xipanze xa “xiwoniso” a xi nyikileko xungetano hi “kugumesa ka tiko.” (Mat. 24:3, 42-47) Jesu i kombisile lezaku a nanza legi go tsumbeka gi wa ta khomeka hi ku gisa vanhu va Nungungulu hi zakuga za moya “hi xikhati xi faneleko.” Kota lezi Jesu a tirisileko a ntlawa wa vavanuna — wutshanwini ga munhu munwe — lezaku va rangela ka zana ga malembe go sangula, a nanza go tsumbeka legi Jesu a gi tirisako xikhatini lexi xa kugumesa ka tiko a hi munhu munwe.

TIVA A “NANZA GI TSUMBEKILEKO NI GO TLHARIHA”

⁴ Himani loyi a yimisilweko hi Jesu lezaku a gisa a valanzeli vakwe? Zi laha kubaseni lezaku i wa ta tirisa a maKristu ma totilweko ma hanyako kwalaha misaveni. A Biblia gi ma tlhamusela kota “vapristi va wuhosi” lava va yimiselweko ‘kuba hungu hi mitiro yi rewukisako ya yena Loyi a nga va vitana va huma munyameni, vata kuwonekeleni kakwe ku hlamalisako.’ (1 Ped. 2:9; Mala. 2:7; Kuv. 12:17) Xana a nanza gi tsumbekileko gi wumbiwa hi maKristu wontlhe ma totilweko? Ahihi. A xikhati lexi Jesu a nga kumekisa a zakuga hi xihlamaliso lezaku a gisa a xidlemo xa vavanuna vo ringana 5.000, na ku nga hlayiwi a vavasati ni zivanana, i zi nyikele ka vapizani lezaku va phamela a zidlemo. (Mat. 14:19) I gisile votala hi canja ga vanhu vatsongwani. Nyamutlha konawu, Jesu i phamela a zakuga za moya hi ndlela yo fana.

⁵ Hikwalaho, “a nekwa yi kholekileko, le’yo tlhariha,” yi wumbiwa hi ntlawa wutsongwani wa vamakabye va totilweko lava va patsekako hi kukongoma ntirweni wa ku longisela ni ku phamela a zakuga za moya xikhatini lexi xa kuvakona ka Kristu. (Luka 12:42) Masikwini lawa yo gumesa, a vamakabye va totilweko lava va wumbako a ntlawa wa “nanza gi tsumbekileko ni go tlhariha” va tira zinwe le tsinza ga misava yontlhe. Inyamutlha, a vamakabye lavo va totilweko va wumba a Hubye yi Fumako ya Timboni ta Jehova.

⁶ Jesu i tirisa a hubye leyi kasi ku humesa mahungu ma wulawulako hi kutatiseka ka ziprofeto za Biblia ni ku nyika wurangeli hi xikhati xi faneleko xungetano hi ku tirisa a matshinya ya milayo ya Biblia wutomini ga siku ni siku. A zakuga lezi za moya zi avelwa mabandleni wontlhe ya Timboni ta Jehova. (Isa. 43:10; Gal. 6:16) Zikhatini za kutsaliwa ka Biblia, loyi a nga hi nanza go tsumbeka, kutani nekwa, i wa hi munhu a nga wonelela za laha kaya. Hi kufanana, a nanza gi tsumbekileko ni go tlhariha gi rwexilwe a ntiro wa ku wonelela a va laha ngangweni wa kukholwa. Hikwalaho, a nanza gi tsumbekileko gonawo gi wonelela a titshomba, ntiro wo xumayela, milongoloko ya mitlhangano ni migotsovanyano, kuyimiswa ka vawoneleli kasi va tira ka zipanze zo hambanahambana za hlengeletano, kuhumeswa ka mabhuku ma seketelweko ka Biblia, niku zontlhe lezi za vuna a “malanza.” — Mat. 24:45.

⁷ Makunu, hi vamani a “malanza”? Hi magezu matsongwani, hi lava va gisiwako. Kusanguleni ka masiku yo gumesa, a malanza wontlhe ku wa hi lava vatotilweko. Hi kufamba ka xikhati, a malanza ma lo patsa a xidlemo xa tsanza-vahlayi xa “tiyivu tinwani.” (Joh. 10:16) A mitlawa yontlhe ya yimbiri yiga zakuga zalezi za zinwe za moya zi humesiwako hi nanza go tsumbeka.

⁸ Kuxanisekeni ka hombe, laha Jesu a tota a ta lamula ni ku fuvisa a tiko legi go biha, i ta yimisa a nanza gi tsumbekileko ni go tlhariha “hehla ka zontlhe lezi [a] nga nazo.” (Mat. 24:46, 47) Lava va wumbako a ntlawa wa nanza gi tsumbekileko va ta kuma a nchachazelo wabye wa kuya tilweni. A ntlawa lowu zinwe ni vatotilweko vanwani va ta fuma zinwe na Kristu le tilweni. Hambu lezi ku to kala ku nga ha hi na nanza gi tsumbekileko ni go tlhariha laha misaveni, Jehova na Jesu va ta simama va nyika wurangeli ka vafumelwi va Mufumo wa wuMessia hi ku tirisa lava va to tira kota “tihosana” ti yimisilweko. — Tis. 45:16.

HIKUYINI HI FANELEKO KU ‘ALAKANYA LAVA VA HI RANGELAKO’?

⁹ Ku na ni zigelo zo tala za kuva hi ‘alakanya lava va hi rangelako’ ni ku va tsumba. Hikuyini a ku maha lezo zi hi vunako? Mupostoli Paule wa hlamula, i ngalo: “Va rinzela a mihefemulo ya [hina], hakuva va ta ti hlamulela ha yona. Va ingiseni lezaku va fela ku tira hi kutsaka, na ku nga hi kuketa; hakuva lezi zi nga ta mu vuna nchumu.” (Maheb. 13:17) Za lisima a ku va ingisa ni ku ti veka hasi kabye hakuva va vikela a wumoya ga hina.

¹⁰ Kota lezi zi tsalilweko ka 1 Va Le Korinte 16:14, Paule i te: “Zontlhe lezi mu zi mahako a zi mahiwe hi liranzo.” A liranzo hi lona li rangelako a ziboho lezi zi mahiwako na zi khumba a vanhu va Nungungulu. Xungetano hi liranzo, 1 Va Le Korinte 13:4-8 i ngalo: “A liranzo li na ni lihlaza-mbilu, li nene; a liranzo a li na makangwa; a liranzo a li ti mahisi matshanza, a li ti kukumukisi, a li mahi lezi zi nga faneliko, a li ti laveli za lona, a li na kuzangara, a li alakanyeli hi kubiha loku li mahelweko kona; a li tsaki hi lezi zi nga lulamangiko, kanilezi li tsakelana ni zinene. Li nonoka ku zwata zilo zontlhe, li kholwa zilo zontlhe, li tsumba zilo zontlhe, li timisela zilo zontlhe. A liranzo cima li nga ta fuva.” Kota lezi a liranzo li rangelako a ziboho zontlhe lezi zi mahelwako ku vuna a malanza ya Jehova, hi na ni zigelo za ku zi tsumba ni ku lanzela a wurangeli ga zona. Tlhatakumbiri, a ziboho lezo xikombiso xa liranzo leli Jehova a nga nalo hi vanhu vakwe vontlhe.

¹¹ A ku fana ni ka zana ga malembe go sangula, lava Jehova a va tirisako kasi ku rangela vanhu vakwe a va mbhelelangi. Hambulezo, Jehova i tirisile vanhu vo kala ku mbhelela xikhatini xi hunzileko lezaku va maha kuranza kakwe. Noa i akile taru a tlhela a xumayela hi ntalo lowu wu nga wa tata masikwini yakwe. (Gen. 6:13, 14, 22; 2 Ped. 2:5) Mosi i wa hlawulilwe lezaku a humesa vanhu va Jehova le Gipite. (Ekso. 3:10) A vanhu va nga mbhelelangiko va susumetilwe ku tsala a Biblia. (2 Tim. 3:16; 2 Ped. 1:21) A kuva Jehova inyamutlha a tirisa vanhu va nga mbhelelangiko lezaku va rangela ntiro wa ku xumayela ni wa ku maha vapizani, a zi hunguli a kutsumba loku hi nga nako ka hlengeletano ya Nungungulu. Wutshanwini ga lezo, ha tiyisiwa hakuva ha zi tiva lezaku loku ku wa nga hi ku vuniwa hi Jehova, a hlengeletano na yi nga mahi zontlhe lezi yi mahako. A kuva gi yimisana ni zikarato hambulezo gi simama gi timisela, a nanza gi tsumbekileko gi komba lezaku gi rangelwa hi moya wa Nungungulu. Inyamutlha, Jehova i kari a chulula makatekwa yakwe hehla ka xipanze xi wonekako xa hlengeletano yakwe. Hizalezo, ngha hi yi seketela hi tlhela hi yi tsumba hi mbilu yontlhe.

LEZI HI NGA KOMBISAKO ZONA LEZAKU HA TSUMBA JEHOVA NI MALULAMISELO YAKWE

¹² Lava va nyikilweko a wutihlamuleli lomu bandleni va kombisa lezaku va mu tsumba Jehova ni hlengeletano yakwe hi ku vumela ni ku tatisa hi kutsumbeka a ziavelo zabye. (Miti. 20:28) Kota vaxumayeli va Mufumo, hi hlengela hi kuhiseka ntirweni wa muti ni muti, hi maha a tienzo to wuyela hi tlhela hi fambisa a zigonzo za Biblia. (Mat. 24:14; 28:19, 20) Hi fanele ku longisela a mitlhangano ya hina ya wuKristu hi tlhela hi hlengela ka yona, ni ku kumeka mitlhanganweni ya hombe ni migotsovanyanweni kasi hi vuneka khwatsi hi zakuga lezi zo nona zi humesiwako hi nanza gi tsumbekileko. Ha tiyisana ni ku kucana loku hi hi zinwe ni vamakabye va hina mitlhanganweni leyo ya wuKristu. — Maheb. 10:24, 25.

¹³ Loku hi seketela a hlengeletano hi zilo za hina, hi kombisa ku ha yi tsumba. (Mav. 3:9, 10) Loku hi wona lezaku a vamakabye va hina va na ni xilaveko xo kari hi tlhelo ga nyama, hi tekela ku va vuna handle ko hlwela. (Gal. 6:10; 1 Tim. 6:18) Hi maha lezo hi liranzo la wumakabye, xontlhe xikhati na hi rinzela a lungelo ga ku komba Jehova ni hlengeletano yakwe lezaku ha bonga a wunene legi va hi mahelako. — Joh. 13:35.

¹⁴ Hi kombisa kambe lezaku ha tsumba hlengeletano ya Jehova hi ku seketela ziboho za yona. Lezo zi patsa ku lanzela hi kutikoramisa a wurangeli ga lava va yimisilweko kasi ku wonelela, vo fana ni vawoneleli va xipanze ni madota ya bandla. A vamakabye lava vanwe va “varangeli” lava hi faneleko ku va ingisa ni ku ti veka hasi kabye. (Maheb. 13:7, 17) Hambu loku hi nga zi zwisisi hi kumbhelela a zigelo zi va mahileko va maha xiboho xo kari, ha zi tiva lezaku hi ta vuneka loku hi xi seketela. Kota wuyelo ga kona, Jehova wa hi katekisa hi lezi hi ingisako a Mhaka ni hlengeletano yakwe. Tlhatakumbiri, a kuingisa ka hina ku komba lezaku ha ti veka hasi ka Hosi Jesu Kristu.

¹⁵ Kunene, hi na ni zigelo zo tala za ku tsumba a nanza gi tsumbekileko ni go tlhariha. Satani, a nungungulu wa tiko legi, i maha zontlhe a zi kotako kasi ku ruka vito ga Jehova ni hlengeletano yakwe. (2 Kor. 4:4) U nga vumeli ku phasiwa hi mitlhamu ya Satani. (2 Kor. 2:11) Wa zi tiva lezaku “a xikhati lexi xi mu saleleko xi tsongwanyani” na a nga seya nkeleni wa lieswila, niku i ti yimisele ku maha zontlhe kasi ku hambukisa vanhu vo tala ka Jehova. (Kuv. 12:12) Hambulezo, laha Satani a tshingisako a mizamo yakwe, ngha hi tshinela nguvu ka Jehova. Ngha hi tsumba Jehova ni hlengeletano leyi a yi tirisako kasi ku rangela vanhu vakwe inyamutlha. Loku hi maha lezo hi ta simama hi ranzana ni ku zwanana ni vamakabye va misava yontlhe.