Ngha hi tiva ntiro lowu Nungungulu a nyikileko Kristu

“A KUSANGULENI Nungungulu i lo vanga tilo ni misava,” niku zontlhe a nga mahile zi wa “sasekile nguvu.” (Gen. 1:1, 31) Jehova i mahile vanhu na va hi ni wumanziko go tsakisa. Hambulezo, a wuhluwuki ga le Edeni gi lo colopetela hi xikhatanyana a kutsaka ka vanhu. Kanilezi, a kungo ga Jehova xungetano hi misava ni vanhu a gi cicangi. Nungungulu i kombile lezaku ku tava ni kutlhatlhiswa ka vana va ingisako va Adamu. Lezo zi komba lezaku ku wa tava ni kuvuxetwa ka wukhozeli ga lisine, niku Nungungulu i ta fuvisa Satani zinwe ni mitiro yontlhe yakwe yo biha. (Gen. 3:15) A zilo zi ta tlhela zi ‘saseka nguvu.’ Jehova i ta maha lezo hi ku tirisa a N’wana wakwe, Jesu Kristu. (1 Joh. 3:8) Hikwalaho, za lisima a kuva hi tiva lezi Kristu a mahako kutatisekeni ka lulamiselo ga Nungungulu. — Miti. 4:12; Fil. 2:9, 11.

HI WIHI A NTIRO WA KRISTU?

² Loku hi ehleketa hi ntiro lowu Kristu a nga nawo lulamiselweni ga Nungungulu, hi wona lezaku a ntiro wakwe wu patsa a zilo zo tala. Jesu Mutiruli wa vanhu, Mupristi wa hombe, i Hloko ya bandla ga wuKristu niku zezi i Hosi ya Mufumo wa Nungungulu. A ku ehleketa hi mitiro leyi ya Jesu zi etisa a lisima leli hi nyikako a lulamiselo legi ga Nungungulu ni liranzo leli hi nga nalo hi Jesu Kristu. A Biblia ga tlhamusela a mitiro yo kari ya yena.

³ Wutirelini ga Kristu ga laha misaveni, zi lo dlunyateka lezaku a kutlhanganyiswa ka vanhu lava va ingisako na Nungungulu ku wa ta koteka hi ku tirisa Jesu. (Joh. 14:6) Kota Mutiruli wa vanhu, Jesu i lo ti nyikela kuva nzhiho kasi ku tlhatlhisa votala. (Mat. 20:28) Hikwalaho, Jesu i hunza kuva xikombiso xa ku kholwa ntsena. Hi yena tshinya ga kutatiseka ka kungo ga Jehova hi vanhu. Hi yena ntsena a zi kotako ku hi maha hi tlhela hi amukeleka ka Nungungulu. (Miti. 5:31; 2 Kor. 5:18, 19) A kufa ka Jesu ni ku vuxiwa kakwe ku vululile ndlela ya lezaku a vanhu vo ingisa va kuma makatekwa ya pinzukelwa hasi ka Mufumo wa le tilweni wa Nungungulu.

⁴ Kota Mupristi wa Hombe, Jesu wa zi kota ku hi “zwela wusiwana hi kota ya gome ga hina” a tlhela a basisa zionho za valanzeli vakwe va ti nyiketeleko laha misaveni. Mupostoli Paule i lo tlhamusela lezi: “Hakuva a mupristi wa hombe loyi hi nga naye, a hi loyi a tsanzekako ku hi zwela wusiwana hi kota ya gome ga hina, kanilezi munwe loyi a ringilweko hi matlhelo wontlhe khwatsi hi hina, kanilezi a nga onhangi.” Hi kulanzela, Paule i lo kuca lava va kombisako kukholwa ka Jesu Kristu lezaku va maha zontlhe va zi kotako kasi va tlhanganyiswa zinwe na Nungungulu. I te: “Hikwalaho a hi tshineleni hi kutiya xitshanwini xa wuhosi xa tipswalo, kasi hi fela ku mahelwa wuxinji, hi kuma tipswalo ta ku hi vuna xikhatini xa kuvumala.” — Maheb. 4:14-16; 1 Joh. 2:2.

⁵ Jesu i tira kambe kota Hloko ya bandla ga wuKristu. A ku fana ni xikhatini xa valanzeli vakwe ka zana ga malembe go sangula, hinawu inyamutlha a hi rangelwi hi munhu wa nyama. Jesu i rangela a bandla gakwe hi ku tirisa a moya wa ku basa ni varisi va ringanelwako lava a va yimisileko lezaku va gi risa. A varisi lavo va ta ti hlamulela mahlweni ka yena ni ka Dadani wakwe wa le tilweni hi lezi va wu risisako zona a ntlhambi wa Nungungulu. (Maheb. 13:17; 1 Ped. 5:2, 3) Na a wulawula hi zilo zi nga wa ta maheka ka Jesu, Jehova i te ngalo: “Langutani, nzi mu yimisile a kuva mboni ka vamatiko, a hosana ni murangeli wa matiko.” (Isa. 55:4) Jesu i tiyisile a kutatiseka ka xiprofeto lexi a xikhati a nga laya vapizani vakwe aku: “Mu nga vitanwi ku varangeli; hakuva murangeli wa nwina munwe, hi Kristu.” — Mat. 23:10.

⁶ Kota xikombiso xa kupima kakwe ni kuziranza kakwe ku hi vuna, Jesu wa hi ramba aku: “Tanani ka mina, nwina nwentlhe mu tirako ni ku binzwa, nzi ta mu humuta. Rwalani a pingu wa mina, mu gonza ka mina; hakuva nzi rulile, nzi hi ni mbilu yi koramileko; mu ta kuma kuhumula mihefemulweni ya nwina. Hakuva a pingu wa mina a wu tsanzi, ni nzhwalo wa mina wa hehuka.” (Mat. 11:28-30) Hi ku rangela a bandla ga wuKristu hi kurula ni hi ndlela yi nene, Jesu Kristu i ti kombisa kota “murisi nene” a pimanyisako a Dadani wakwe wa le tilweni, Jehova Nungungulu. — Joh. 10:11; Isa. 40:11.

⁷ Ka papilo gakwe ka va le Korinte, Paule i tlhamusele a xipanze xinwani xa ntiro wa Jesu Kristu hi ku wula lezi: “I yimelwe hi ku fuma a kala a veka a valala vakwe vontlhe lahasi ka mikonzo yakwe. Ku taku loku zilo zontlhe zi vekilwe lahasi kakwe, zonake na yena N’wana i ta vekiwa lahasi ka loyi a vekileko zilo zontlhe lahasi kakwe, lezaku kasi Nungungulu ava zontlhe ka vontlhe.” (1 Kor. 15:25, 28) Na a nga seta misaveni, Jesu i wa hi “meseri wa hombe” wa Nungungulu, niku hi yena xivangwa xo sangula. (Mav. 8:22-31, NM) A xikhati lexi Nungungulu a nga mu rumela laha misaveni, Jesu i mahile kuranza ka Nungungulu xontlhe xikhati. I lo timisela ziringo zo tshisa a tlhela afa na a tsumbekile ka Dadani wakwe. (Joh. 4:34; 15:10) Kota lezi a N’wana wakwe a nga tsumbeka kala kufeni, Nungungulu i lo mu vuxa aya tilweni a tlhela a mu nyika lungelo ga kuva Hosi ya Mufumo wa le tilweni. (Miti. 2:32-36) Kota Hosi ya Mufumo lowo, Jesu i na ni xiavelo xo hlawuleka a nyikilweko hi Nungungulu xa ku rangela mazanazana ya zivangwa za ntamu za moya, kasi va fuvisa mifumo ya vanhu laha misaveni va tlhela va hi susela wubihi gontlhe. (Mav. 2:21, 22; 2 Tes. 1:6-9; Kuv. 19:11-21; 20:1-3) A Mufumo wa Nungungulu wa le tilweni hasi ka wurangeli ga Kristu, wu tava wona ntsena wu to fuma misaveni yontlhe. — Kuv. 11:15.

LEZI A KU TIVA A NTIRO WAKWE ZI WULAKO ZONA

⁸ Jesu Kristu, a Xikombiso xa hina, i mbhelele, niku i nyikilwe a ntiro wa ku hi khatalela. Kasi hi vuneka khwatsi hi kukhatala kakwe ka hombe ni ka liranzo, hi fanele ku simama hi tsumbeka ka Jehova hi tlhela hi longoloka zinwe ni hlengeletano ya Nungungulu leyi yi yako mahlweni.

⁹ A valanzeli va Jesu va zana ga malembe go sangula va wa wu tiva khwatsi a ntiro lowu Kristu a mahako lulamiselweni ga Nungungulu. Va zi kombisile hi ku tira zinwe hi kuzwanana na va rangelwa hi Kristu, va lanzela a wurangeli gakwe legi va nga nyikiwa hi moya wa ku basa. (Miti. 15:12-21) Mupostoli Paule i wulawulile hi kuzwanana ka bandla ga maKristu ma totilweko a xikhati lexi a nga ma tsalela lezi: “Hi ta hlayisa zinene hi liranzo, hi kula zilweni zontlhe ka yena, loyi a nga hloko, yena Kristu, loyi a miri wakwe wontlhe wu tlhanganyiswako khwatsi, ni ku tiyiswa hi xivuno lexi xi nyikwako hi xiro xinwe ni xinwani, wu kuma kukula hi ntamu lowu wu avelwako xiro xinwe ni xinwani, kasi wu akiwa hi liranzo.” — Efe. 4:15, 16.

¹⁰ A ku fana ni miri wa munhu, a bandla ga vatotilweko ni ga “tiyivu tinwani” gi wumbiwa hi ziro zo tala zo hambanahambana. Loku a xiro xinwe ni xinwani xa bandla xi tirisana khwatsi ni lezi zinwani ni loku vontlhe va tira hi kuzwanana hasi ka wurangeli ga Kristu, ku na ni kukula ni liranzo, leli li nga ‘xiboho xi mbheleleko’ xa kuzwanana. — Joh. 10:16; Kol. 3:14; 1 Kor. 12:14-26.

¹¹ A zimaho za tiko zi tatisako a ziprofeto za Biblia zi komba khwatsi lezaku kusukela 1914, Jesu Kristu i nyikilwe a ntamu wa Mufumo. Zalezi wa fuma xikari ka valala vakwe. (Tis. 2:1-12; 110:1, 2) Xana lezo zi wula yini ka lava zalezi va hanyako misaveni? Lokuloku Jesu i ta kombisa ntiro wakwe kota Hosi ya tihosi ni Mufumeli wa vafumeli a xikhati lexi a to lamula valala vakwe. (Kuv. 11:15; 12:10; 19:16) Hi kulanzela, a xitsumbiso xa Jehova xa kutlhatlhiswa xi tlhamuselweko kusanguleni ka wuhluwuki ga vanhu xi ta tatiseka ka lava va to ngha va hi reveni ga Kristu ga xinene. (Mat. 25:34) A hi no ku tsaka hi lezi hi tivileko a ntiro lowu Nungungulu a nyikileko Jesu. Ngha hi simama hi bohene kumaheni ka ntiro wa ku xumayela misaveni yontlhe masikwini lawa yo gumesa hasi ka wurangeli ga Kristu.