Vamani va tirisako wukhongeli ga lisine?

1. Zini hi faneleko ku maha kasi ha xalalisa Nungungulu?

KASI kuva ni kuzwanana ka liranzo ni ko kufumela na Nungungulu, hina hi fanele a ku nga hlengeli ni wukhongeli ga mawunwa. Hi fanele ku tirisa wukhongeli ga lisine. Nyamutlha, makume ya mazana ya makume ya mazana ya vanhu Misaveni ma maha lezo.

2. Ti kumeka kwihi a Timboni ta Jehova niku hi wihi a ntiro wa tona?

² Kota lezi a Biblia gi wulileko hi mahlweni, vakhozeli va lisine va wumba “xidlemo” xa hombe xi tako hi ka “matiko wontlhe, ni tixaka, ni mifumo, ni tirimi.” (Kuvululelwa 7:9) Lomu ka 235 wa matiko, makume ya mazana ya makume ya mazana ya Timboni ta Jehova ma tira ma vuna vanwani a ku tiva tindlela ta liranzo ta Jehova ni lezi yena a zi lavako.

Vakhozeli va lisine va tiviwa

3. Himani a khozelwako hi Timboni niku wukhozeli ga lixaka muni ti gi potsako?

³ A Timboni ti tivisisa lezaku Jehova hi yena yece a faneleko ku khozelwa. Tona ti ala ku korama mahlweni ka zifananiso ni zithombe za wukhongeli. (1 Johani 5:21) Tona a ti chavi vafileko hi ku hlengela kucelweni ni ka tinwani tinkhozo leti ti vuvumisako kukholwa ka mawunwa ka wukhongeli ni “gonzo ya madimoni.” (1 Timote 4:1) Kanilezi tona ti tangalisa a vafelweko hi ku va tlhamusela a xitsumbiso xa Nungungulu xaku ku ta va kona ku vuka ka vafileko Misaveni ya paradise. — Johani 5:28, 29; Mitiro 24:15.

4. Hi xihi xiyimo xa malanza ya Nungungulu xungetano hi wusalamusi?

⁴ A Timboni a ti hlengeli ka wusalamusi, wungoma hambu ka wuloyi, hi ku zi tiva lezaku zilo lezo za Diyabu. Tona a ti tsumbi wusalamusi lezaku gi va vikela — a kutsumba ka tona ku le ka Jehova. — Mavingu 18:10.

5. Hi ndlela muni a Timboni ta Jehova ‘ti nga hiko ta tiko’?

⁵ Jesu i wulile lezaku vapizani vakwe ‘va wa nga ta va va tiko.’ (Johani 17:16) Jesu wutsumbu i alile ku maha xipanze xa wupolitika ga masiku yakwe. (Johani 6:15) Hi ndlela ya kunghahi, a Timboni a ti hlengeli ka wupolitika, kuranzeni ka tiko ni kulweni ka mitlawa ya wuhlengeli ya tiko legi. Kanilezi, tona ti riha mikhupo ni ku ingisa milayo ya tiko legi ti hanyako ka gona. — Johani 15:19; Va Le Roma 13:1, 7.

6. Zileletelo muni zi lanziwako hi malanza ya Nungungulu xungetano hi kutekana ni kutlhatlha wukati?

⁶ Hi ku ingisa zileletelo za mufumo, a Timboni ti tiyisa lezaku a muchado wa tona wuva lomu nayweni. (Titusi 3:1) Tona ti ingisa zileletelo za Nungungulu niku hi lezo ti potsa kuva ni vanghana vo tala va wukati. (1 Timote 3:2) Kambe, kota lezi ma tirisako masangulo ya Biblia wutomini gabye, a malanza ya Nungungulu a ma rinzeli nguvu kutlhatlha wukati.

7. A Timboni ti komba ku ranzana hi ndlela muni?

⁷ A Timboni ta ranzana. Liranzo lelo, zinwe ni liranzo ka Nungungulu, li zwananisa Timboni hi wumakabye ga lisine, hambulezi ti humelako tixakeni ni matikweni ma tsalangeneko. Loku ku huma khombo hambu zikhati za zilaveko, a Timboni ti hatlisela ku vunana. A Timboni ti komba liranzo hi ndlela leyi ti hanyako hi yona. — Johani 13:35.

8. Mitiro muni ya kubiha yi potsiwako hi malanza ya Nungungulu?

⁸ Malanza ya Jehova ma ti kurumeta ku hanya hi kutsumbeka ni kululama. Ma potsa kuyiva, kuhemba, wuhava, wudakwa ni wuxavisi gi nga tsumbekangiko. Vanuna a vabi vasati vabye. Vanwani va mahile lezo na va nga se maha Timboni, kanilezi va zi tsikile hi ku vuniwa hi Jehova. Vona va lo “hlaziwa” kuwoneni ka Nungungulu. — 1 Va Le Korinte 6:9-11.

Va maha kuranza ka Nungungulu

9. Zini zi wulilweko hi bhuku go kari xungetano hi tichechi ta moya ta lomu Afrika?

⁹ Hakunene, wukhongeli ginyingi gi ngalo gi na ni zinene. Ga zi kota ku komba mitiro yi hlamalisako kasi ku seketela lezo. Hi xikombiso, a bhuku go kari gi wulawula hi lezi zi vitanwako aku tichechi ta moya lomu Afrika, giku ngalo: “A ntiro wa musalamusi ni wa n’anga ya wungoma wu valetiwa hi kuanzileko hi [mitlawa yiswa ya wuKristu]. . . . Yona yi ngalo ya wula zilo hi mahlweni ni ku maha zirewukiso. A vaprofeti xikari va vona va wona miwoniso ni ku tlhamusela miloro. Va tirisa mati yo basa, mafura yo basa, khuma, makhandlela ni libani kasi ku chuma ni ku vikela mababyi.”

10, 11. Hikuyini lezi zi dumiswako nguvu nyamutlha kota zirewukiso zi nga kombiko aku wukhongeli go kari gi ta hi ka Nungungulu?

¹⁰ Ziro za wukhongeli lego zi ngalo a zirewukiso zi nyika wukustumunyu gaku wukhongeli gabye gi katekisiwa hi Nungungulu. Kanilezi lezi zi dumiswako kota zirewukiso a zi kombi aku wukhongeli go kari ga amukeleka ka Jehova. Satani i nyika ntamu ka vakhozeli vokari va mawunwa kasi va maha mitiro ya “ntamu.” (2 Va Le Tesalonika 2:9) Kambe a Biblia gi sina gi wulile hi mahlweni giku a zinyikiwo zi rewukisako zi tako hi ka Nungungulu, zo kota kuprofeta, ku wulawula hi tirimi ni kutiva ko hlawuleka ‘zi wa ta hunza.’ — 1 Va Le Korinte 13:8.

¹¹ Jesu i tlharihisile: “A hi vona vontlhelele lava va nge ngalo ka mina: Hosi, Hosi, va ta nga enghena mufunweni wa tilo; kanilezi sine loyi a mahako a kuranza ka Dadani wa mina loyi a nga le tilweni. A vanyingi va taku ka mina hi lego siku: Hosi, Hosi, a hi profetangi hi vito ga wena ke; hi vito ga wena a hi hlongolangi madimoni ke; a hi mahangi zirewukiso zo tala hi vito ga wena ke? Zonake nzi taku ka vona: Cima nzi wa nga mu tivi; sukani ka mina, nwina vaonhi.” — Mateu 7:21-23.

12. Vamani va to enghena Mufunweni wa le tilweni?

¹² Kasi vamani va to enghena Mufunweni wa le tilweni? Hi lava va mahako kuranza ka Jehova.

Va chumayela Mufumo wa Nungungulu

13. I ntiro muni lowu Nungungulu a leletelako malanza yakwe ku maha nyamutlha niku vamani va wu mahako?

¹³ Hi kwihi kuranza ka Nungungulu a ka malanza yakwe nyamutlha? Jesu i te ngalo: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe.” (Mateu 24:14) Lowu hi wona ntiro wu mahiwako hi Timboni ta Jehova hi kuhiseka.

14. Xini Mufumo wa Nungungulu niku vamani va to fuma Mufunweni?

¹⁴ Lomu “misaveni yontlhe,” a Timboni ta Jehova ti huwelela Mufumo wa Nungungulu kota wukosi ga le tilweni gi to fumela Misava yontlhe hi kululama. Tona ti gonzisa lezaku Jehova i yimisile Kristu Jesu a kuva Hosi ya Mufumo lowo, zinwe ni 144.000 wa vafumeli kuloni va hlawulweko xikari ka vanhu. — Danieli 7:14, 18; Kuvululelwa 14:1, 4.

15. Wu ta lovisa yini a Mufumo?

¹⁵ Hi ku tirisa Biblia, a Timboni ti komba vanhu lezaku a Mufumo wa Nungungulu wu ta lovisa wontlhe mafambisela ya Satani. A wukhongeli ga mawunwa gi ta hunza ni tigonzo ta gona ti nga dzunziko Nungungulu kanilezi ti dzunzako Diyabu! (Kuvululelwa 18:8) Kambe gi ta hunza a wukosi ga vanhu legi gi yimako gi vukela Nungungulu! — Danieli 2:44.

16. Vamani va ta ngava vafumelwi va Kristu Jesu niku va ta hanya kwihi?

¹⁶ Ahandle ka lezo, a Timboni ta Jehova ti tivisa lezaku Kristu Jesu i ta neha zivuno zo hlamalisa ka vontlhe lava va mahako lezi Nungungulu a zi lavako. Vona va tava vafumelwi vakwe Misaveni. A Biblia ga tsumbisa: “I ta hlanguta a muvumali loyi a rilako, ni loyi a tsimbeketilweko, loyi a nga hiko na muvuni. I ta zwela wusiwana loyi a hlokisilweko ni muvumali; a ponisa wutomi ga vavumali.” — Tisimu 72:12, 13.

17. Vamani lava va huwelelako voce Mufumo wa Nungungulu?

¹⁷ Ku hava wunwani ntlawa wa vanhu wu mahako kuranza ka Nungungulu hi ku kanela mahungu yo saseka ya Mufumo. A Timboni ta Jehova hi tona ntsena ti tivisako Mufumo wa Nungungulu lomu Misaveni yontlhe.