Nungungulu wa hombe ku hunza vontlhe

KOTA lezi u zi tivako ku na ni munhu wo kari a nga wa hombe, kutani a tlakukileko a tlhela ava ni ntamu ku hunza hontlheni. U alakanya lezaku himani? — Hi Jehova Nungungulu. Ahati a N’wana wakwe, Mugonzisi wa Hombe ke, yenawu i tlakukile ku hunza hina? — Ina, i tlakukile.

Jesu i wa hanyile na Nungungulu le tilweni. I wa hi N’wana wakwe wa moya, kutani ngelosi. Xana Nungungulu i mahile tingelosi tinwani? — Ina, i vangile tingelosi to tala nguvu. A tingelosi leto tonawu ti tlakukile niku ti na ni ntamu a ku hunza hina. — Tisimu 104:4; Danieli 7:10.

Wa gi alakanya a vito ga ngelosi leyi yi nga wulawula na Maria? — Hi Gabrieli. Yi byelile Maria lezaku a n’wana loyi a nga wa ta pswala, i wa tava N’wana wa Nungungulu. Nungungulu i lo chela wutomi ga N’wana wakwe wa moya lomu nzeni ka Maria kasi ku Jesu a ta pswaliwa kota nwanana laha misaveni. — Luka 1:26, 27.

Wa kholwa a ku lezo zi mahekile hakunene? Ni lezaku Jesu i wa hanyile na Nungungulu le tilweni? — Jesu i wulile lezaku i wa hanyile naye. Xana Jesu i zi tivisile kuyini zontlhe lezo? A xikhati lexi a nga hi nwanana, kuzilava Maria i mu byelile lezi Gabrieli a nga mu byelile. Kuzilava, Josefa yenawu i byelile Jesu lezaku a Papai wakwe wa lisine ku wa hi Nungungulu.

A xikhati lexi Jesu a nga bapatizwa, Nungungulu yenawu i lo wulawula na a hi le tilweni aku: ‘Loyi i N’wana wa mina.’ (Mateu 3:17) Niku ka wusiku legi a nga dawa hi gona, Jesu i lo khongela aku: ‘Papai, nzi dumise le ka wena hi wudumo legi nzi nga hi nago ka wena, a misava na yi nga seva kona.’ (Johani 17:5) Jesu i wa kombela lezaku a tlhela a ya hanya na Nungungulu le tilweni. I wa ta hanyisa kuyini le tilweni? — Ntsena hi kuva Jehova Nungungulu a tlhela a mu maha munhu wa moya a nga wonekiko, kutani ngelosi.

Zezi nzi lava ku ku maha xiwutiso xa lisima. Xana a tingelosi tontlhe ti nene? U zi wonisa kuyini? — Ka xikhati xo kari, tontlhe ti wa hi ti nene. Hakuva Jehova hi yena a nga ti vanga, niku zontlhe lezi Jehova a zi mahako zi nene. Kanilezi, hi nzhako ka xikhati a yinwe ya tingelosi leto yi lo maha yo biha. Zi mahisile kuyini lezo?

Kasi ku kuma hlamulo wa kona, hi fanele ku alakanya a xikhati lexi Nungungulu a nga vanga a wanuna wo sangula ni wasati wo sangula, Adamu na Eva. A vanhu vo kari va wula lezaku lezi a Biblia gi zi wulako hi vona a zi mahekangi. Kanilezi, Mugonzisi wa Hombe i wa zi tiva lezaku zi mahekile.

A xikhati lexi Nungungulu a nga vanga Adamu na Eva, i lo va veka lomu ka simu go saseka gi nga vitaniwa ku i simu ga Edeni. Gi wa hi parki, kutani paradise. Va wa tava ni vana vo tala, va maha ngango wa hombe, va tlhela va hanya paradiseni kala kupinzuka. Kanilezi, ku wa hi ni mhaka ya lisima va nga fanele ku yi tiva. A mhaka leyo hi sina hi wulawulile hi yona. A hi wone lezaku ha ha yi alakanya ke.

Jehova i wa byelile Adamu na Eva lezaku va ngaga a mihanzu ya tisinya tontlhe ti nga hi lomu sinwini. Kanilezi, ku wa hi ni sinya yinwe va nga kala va nga faneli kuga. Nungungulu i lo va byela lezi zi nga wa ta humelela loku vaga mihanzu ya sinya leyo. I naku: Loku muga a mihanzu ya sinya leyi, ‘mu tafa.’ (Genesisi 2:17) Makunu, zini lezi Adamu na Eva va nga fanele ku gonza? —

Va wa fanele ku gonza kuingisa. Hi zalezo, kasi hi hanya hi fanele ku ingisa Jehova Nungungulu! Zi wa nga eneli a kuva Adamu na Eva va wula ntsena lezaku va wa ta mu ingisa. Va wa fanele ku kombisa ku va ingisa hi lezi va nga wa ta zi maha. Loku va wa no ingisa Nungungulu, na va kombile lezaku va mu ranza niku va zi lava ku fumelwa hi Yena. Zonake na va hanyile kala kupinzuka Paradiseni. Kanilezi, loku vaga a hanzu wa sinya leyo, zi wa ta komba yini? —

Lezo zi wa ta komba lezaku a va bongi lezi Nungungulu a nga va nyikile. Loku wenawu u wa hi lomu ka simu lego, xana na u mu ingisile Jehova? — Kusanguleni, Adamu na Eva va ingisile. Kanilezi, hi nzhako ka xikhati, a munhu wo kari wo tlakuka ku hunza vona i lo kalavela Eva. I lo mu maha a tsika ku ingisa Jehova. Himani a munhu wa kona? —

A Biblia gi wula lezaku a nyoka yi lo wulawula na Eva. Kanilezi, wena wa zi tiva lezaku a nyoka a yi wulawuli. Makunu yi zi kotisile kuyini? — A ngelosi yo kari yi lo maha nyoka liyani yi ku khwatsi yo wulawula. Hi lisine, lexi xi nga kari xi wulawula ku wa hi ngelosi, ku wa nga hi nyoka. A ngelosi leyo yi lo sangula ku alakanyela zilo zo biha. Yi wa lava lezaku Adamu na Eva va khozela yona, va yi ingisa, yi tlhela yi lava ku teka xikhundla xa Nungungulu.

Hikwalaho, a ngelosi leyo yo biha yi lo nghenisa a maalakanyo yo biha hlokweni ya Eva. Hi ku tirisa nyoka, a ngelosi yi lo mu byela lezi Eva: ‘Nungungulu o ku hembela. U nga tafa loku uga hanzu wa sinya leyi. U ta tlhariha u fana na Nungungulu.’ Wena na u kholwile a magezu lawo? —

Eva i lo sangula ku navela zilo lezi Nungungulu a nga kala a nga mu nyikangi. I loga a hanzu wa sinya leyi yi nga beletelwa ku giwa. A tlhela a nyika Adamu. Adamu a nga kholwangi lezi a nyoka yi nga wula. Kanilezi, i wa xuva nguvu a ku tshama na Eva a ku hunza lezi a nga mu ranzisa zona Nungungulu. Hikwalaho, yenawu i loga hanzu lowo. — Genesisi 3:1-6; 1 Timote 2:14.

Zini zi humeleleko hi kota ya lezo? — Adamu na Eva va lo maha vanhu va nga mbhelelangiko, va khosahala, va gumesa vafa. Niku hi kota ya kuva vanhu va nga mbhelelangiko, a vana vabye vontlhe vonawu va lo pswaliwa na va nga mbhelelangi. Hi kufamba ka xikhati, va lo khosahala va gumesa vafa. Nungungulu i wa nga hembangi! Kasi hi hanya ku laveka lezaku hi ingisa Nungungulu. (Va Le Roma 5:12) A Biblia gi hi byela lezaku a ngelosi leyi yi hembeleko Eva hi Satani Diabolusi, niku a tingelosi leti tinwani ti nga maha to biha ti vitaniwa a ku madimoni. — Jakobe 2:19; Kuvululelwa 12:9.

Makunu wa zi tiva a ku zi mahisile hikuyini a ku a ngelosi ya yi nene leyi Nungungulu a nga yi mahile yi cica yi maha yo biha? — Hi lezi yi nga sangula ku alakanyela a zilo zo biha. Yi wa lava ku maha ya lisima a ku hunza vontlhe. Yi wa zi tiva ku Nungungulu i wa byelile Adamu na Eva lezaku vava ni vana, niku yi wa lava ku vontlhe va khozela yona. Diabolusi i lava ku maha vanhu vontlhe va nga ingisi Jehova. Hikwalaho, i zama ku chela mawonela yo biha lomu ka maalakanyo ya hina. — Jakobe 1:13-15.

Diabolusi i wula lezaku a ku na munhu a ranzako Jehova hi lisine. I ngalo mina na wena a hi mu ranzi Nungungulu ni ku a hi zi lavi ku maha lezi Nungungulu a zi wulako. I wula kambe lezaku hi ingisa Jehova ntsena loku a zilo zi hi fambela khwatsi. Xana lezi Diabolusi a zi wulako lisine? Hi tshamisile zezo futsi?

Mugonzisi wa Hombe i wulile lezaku Diabolusi muhembi! Jesu i ingisile Jehova, a kombisa lezaku wa mu ranza. I wa nga ingisi Nungungulu ntsena loku zi nga karati. Xontlhe xikhati Jesu i wa ingisa Jehova, hambu loku a vanhu vanwani va maha lezaku zi mu karatela ku ingisa. I lo simama a tsumbekile ka Jehova kala afa. Hi zalezo zi nga maha Nungungulu a mu vuxa hi ka vafileko kasi a hanya kala kupinzuka.

Makunu, u alakanya lezaku himani a nala wa hina wa hombe? — Hi zona, hi Satani Diabolusi. U nga mu wona? — Hi zona futsi a wu nge mu woni! Kanilezi ha zi tiva ku i kona niku wa hombe, a tlhela ava ni ntamu wa hombe a ku hunza hina. Hambulezo, himani a nga wa hombe ku hunza Satani? — Hi Jehova Nungungulu. Hikwalaho, ha zi tiva lezaku Nungungulu a nga hi vikela.