Adhamu na Evha va tsikile ku ingisa Nungungulu

Ka siku go kari, Evha na a hi yece, ku nota nyoka yi ta wulawula naye. Yi te: ‘Lisine ku Nungungulu a nga mu tsiki muga mihandzu ya tisinya tontlhe ke’? Evha aku: ‘Hi ngaga mihandzu ya tisinya tontlhe. Kanilezvi, yin’we basi hi nga faneliko kuga. Loku higa mihandzu ya sinya leyo, hi tafa’. A nyoka yiku: ‘Mu nga tafa. Hi lisine, loku muga mu ta fana na Nungungulu’. A ku lezvo zvi wa hi lisine? Ahihi, ma wa hi mawunwa. Kanilezvi Evha i no kholwa. Laha Evha a ngaya a wu cuwuka nguvhu handzu lowo, i no engetela ku wu navela. I noga handzu lowo a tlhela a nyika na Adhamu. Adhamu i wa zvi tiva ku loku va nga ingisi Nungungulu va tafa. Hambu lezvi a nga zvi tiva, i no ala aga a handzu lowo.

Hi ndzhako ka cikhati, ka siku galego, Jehovha i no wulawula na Adhamu na Evha. I no va wutisa a ku hikuyini va nga tsika ku mu ingisa. Evha i no lumbeta nyoka; Adhamu a lumbeta Evha. Kota lezvi Adhamu na Evha va nga tsika ku ingisa Jehovha, Jehovha i no va hlongola lomu jardhim. I no veka tingilozi ni cipadha ca ndzilo ci nga kari ci hundzulukela laha ndleleni ya kuya lomu jardhim kasi va nga ha tshuki va nghena.

Jehovha i no tlhela a wula lezvaku loyi a nga hembela Evha yenawu i ta tsayisiwa. Kanilezvi leci hakunene ci nga wulawula na Evha, ku wa nga hi nyoka. Jehovha a nga mahangi tinyoka kasi ti wulawula. I ngilozi yo biha yi nga maha lezvaku a nyoka yi wulawula. Yi mahile lezvo kasi ku kalavela Evha. A ngilozi leyo yi vitaniwa ku hi Sathani Dhiyabho. Cikhatini ci tako, Jehovha i ta lovisa Sathani kasi a nga ha kuceteli vanhu kambe lezvaku va maha zvo biha.