Ku Sangula Wutomi Go Nonoha

LE HANDLE ka simu ga Edeni, Adamu na Eva vave ni zikarato zo tala. Va wa fanele ku tira hi kukarateka kasi ku kuma zakuga. Wutshanwini ga tisinya to saseka ta mihanzu, va lo wona mizwa yo tala ni mahlehlo zi kula zi va ranzela. Lezo hi zona zi nga maheka loku Adamu na Eva va tsikile ku ingisa Nungungulu ni kuva vanghana Vakwe.

Kanilezi, a zo biha ku hunza lezo, Adamu na Eva va lo sangula kufa. Alakanya, Nungungulu i wa va tivisile lezaku va wa tafa loku vaga a hanzu wa sinya yo kari. Hakunene, gona siku lego va ngaga va lo sangula kufa. Wona wupumbu gabye hi ku nga ingisangi Nungungulu!

Vontlhe vana va Adamu na Eva va pswalilwe anzhako ka kuva Nungungulu a humesile vapswali vabye lomu sinwini ga Edeni. Lezo zi wula ku a vana lavo vonawu va wa ta khosahala ni kufa.

Loku ntsena Adamu na Eva va wa ingisile Jehova, a wutomi gabye ni ga vana vabye na gi tsakisile. Vontlhe va wa ta hanya hi kutsaka misaveni kala kupinzuka. Ni munwe i wa nga ta khosahala, a babya ni kufa.

Nungungulu i lava lezaku a vanhu va hanya hi kutsaka kala kupinzuka, niku Yena wa tsumbisa a ku gata siku legi va to zi kota ku maha lezo. A hi misava yontlhe yi ta nga saseka ntsena, kanilezi vanhu vontlhe va tava ni wutomi gi nene. Munwe ni munwani misaveni i tava munghana wa mu nene wa vanwani ni wa Nungungulu.

Eva i wa nga ha hi munghana wa Nungungulu. Hizalezo loku a pswele vana, a zi mu hehukelangi. Ave ni kubayisa. Ina, a kungaingisi Jehova ku mu nehele mihlomulo yo tala, a wu vumeli?

Adamu na Eva va lo pswala vana vo tala va vafana ni vanhanyana. Loku n’wana wabye wo sangula a pswalilwe, va lo mu nyika vito ga ku hi Kana. Loyi wa wumbiri va lo mu chula a ku hi Abeli. Zini zi nga va humelela? Wa zi tiva?