Jesu i na ni ntamu wo hunza wa madimoni

WA HA zi alakanya a ku xini xi nga maha lezaku a yinwe ya tingelosi ta Nungungulu yi maha Satani Diabolusi? — Lexi xi nga yi maha yi vukela Nungungulu ku lava ku khozelwa. Xana ku na ni tingelosi tinwani ti nga lanzela Satani? — Ina, ti kona. A Biblia gi ti vitana ku ‘tingelosi ta Satani,’ kutani madimoni. — Kuvululelwa 12:9.

Xana a tingelosi leto to biha, kutani madimoni, ta kholwa ka Nungungulu? — A Biblia gi wula lezaku ‘a madimoni ma kholwa lezaku Nungungulu i kona.’ (Jakobe 2:19) Kanilezi ka xikhati lexi ma chava. Hakuva ma zi tiva lezaku Nungungulu i ta ma tsayisa hi kota ya zilo zo biha lezi ma nga zi maha. Zilo muni zo biha ma nga zi maha? —

A Biblia gi wula lezaku a tingelosi leto ti lo tsika kaya ka tona le tilweni, tita misaveni ti ta hanya kota vavanuna. Ti mahile lezo hakuva ti wa lava ku hlengela masango ni vavasati vo saseka laha misaveni. (Genesisi 6:1, 2; Juda 6) Zini u zi tivako xungetano hi kuhlengela masango? —

A kuhlengela masango hi loku a wanuna ni wasati va tlhangana hi ndlela yo kari yo hlawuleka. Hi nzhako ka xikhati, ku nga gumesa ku kula xinwanana lomu nzeni ka wasati. Kanilezi, zi bihile a ku a tingelosi ti hlengela masango. Nungungulu i lava lezaku a masango ma hlengelwa ntsena hi wanuna ni wasati va chadileko zinwe. Lezo zi maha lezaku loku ku pswaliwa xinwanana, a nuna ni sati va zi kota ku xi hlayisa zinwe.

A xikhati lexi a tingelosi leto ti nga ambala mimiri ya nyama ti gumesa ti hlengela masango ni vavasati laha misaveni, a vanana lava va nga pswaliwa va wa hambene ni vanana vanwani. Hi ndlela muni? Hakuva va lo kula va maha va hombe nguvu. A Biblia gi va vitana ku “zihotlovila.” Va wa hi ni xapi ya hombe, niku va wa xanisa vanhu. Hikwalaho, Nungungulu i lo neha ndambi ya hombe laha misaveni kasi ku lovisa a zihotlovila lezo ni vanhu vontlhe vo biha. Kanilezi Nungungulu i lo byela Noa lezaku a aka taru, kutani ngalava ya hombe, kasi ku ponisa vanhu va vatsongwani lava va nga kari va maha za zi nene. Mugonzisi wa Hombe i wulile lezaku lezi zi humeleleko xikhatini xa Ndambi za lisima a ku tshama na hi zi alakanya. — Genesisi 6:3, 4, 13, 14; Luka 17:26, 27.

Wa zi tiva lezi a tingelosi to biha ti nga maha a xikhati lexi yi nga chikela a Ndambi? — Ti lo tsika mimiri ya tona ya nyama ti tlhelela tilweni. Kanilezi, a ta ha mahangi tingelosi ta Nungungulu, hikwalaho ti lo maha tingelosi ta Satani, kutani madimoni. Ahati a vana va tona va zihotlovila, zini zi va humeleleko? — Va lo dawa hi Ndambi. A vanhu vontlhe lava va nga kala va nga ingisi Nungungulu vonawu va lo dawa.

Kusukela xikhatini xa Ndambi, Nungungulu a nga ha tsiki madimoni ma ti hunzula ma fana ni vanhu. Hambu lezi ma nga wonekiko, a madimoni ma ha simama ku kucetela vanhu lezaku va maha zilo zo biha nguvu. Ma vanga zikarato zo tala a ku hunza kusanguleni. Ma maha lezo hakuva ma hlongolilwe le tilweni mata laha misaveni.

Wa zi tiva ku hikuyini hi kalako hi nga zi koti a ku wona madimoni? — Hi lezaku a ma na mimiri ya nyama. Hambulezo, a lisine hi lezaku ma kona. A Biblia gi wula lezaku Satani i khohlisa vanhu misaveni yontlhe, niku a ntiro lowo i vuniwa hi madimoni yakwe. — Kuvululelwa 12:9, 12.

Xana Diabolusi ni madimoni yakwe va nga hi khohlisa hinawu? — Ina. Loku hi nga ti woneli va nga hi khohlisa. Kanilezi a hi fanele ku chava. Mugonzisi wa Hombe i te ngalo: ‘Diabolusi a nga na ntamu hehla ka mina.’ Loku hi simama ku maha vanghana va Nungungulu, i ta hi vikela ka Satani ni madimoni yakwe. — Johani 14:30, NM.

Za lisima a kuva hi tiva a zilo zo biha lezi a madimoni ma lavako lezaku hi zi maha. Hikwalaho, alakanyela lezi: Zilo muni zo biha lezi a madimoni ma nga zi maha a xikhati lexi ma ngata laha misaveni? — Na ku nga se maheka a Ndambi, a tingelosi leto to biha ti lo hlengela masango ni vavasati — ku nga zilo zi bihileko a kuva a tingelosi ti zi maha. Inyamutlha, a madimoni ma tsaka loku a vanhu va nga ingisi a nayo wa Nungungulu xungetano hi kuhlengela masango. Hi nga nyima nzi ku maha xiwutiso. Hi vamani va vumelelwako ku hlengela masango? — Hi zona, vanhu lava va chadileko zinwe basi.

A vanana vo kari va vafana ni va vanhanyana va hlengela masango, kanilezi lezo zi bihile. A Biblia gi komba lezaku Nungungulu hi yena a nga maha ziro za wubeleki za wanuna ni za wasati. Jehova i vangile a ziro lezo za miri hi kungo go hlawuleka. Hikwalaho, ntsena lava va chadileko zinwe hi vona va vumelelwako ku hlengela masango. A madimoni ma tsaka nguvu loku a vanhu va maha zilo lezi Jehova a beletelako. Hikwalaho, a madimoni ma tsaka nguvu loku a mufana ni nhanyana va hlakana hi ziro zabye wubeleki. A hi zi lavi a ku tsakisa madimoni, a hi zona? —

Ku na ni nchumu wunwani kambe lowu a madimoni ma wu ranzako, kanilezi wu vengiwako hi Jehova. Wa zi tiva ku xini? — Tihanyi. (Tisimu 11:5) A tihanyi hi loku a vanhu va zangara va maha zo biha, zonake va bayisa vanwani ha womu. Alakanya lezaku hi zalezo a vana va madimoni va zihotlovila, va nga kari va zi maha.

A madimoni ma ranza a ku dzukisela vanhu kambe. Ka zikhati zinwani ma ti maha vanhu va fileko. Ma zi kota ku pimanyisa a magezu ya vanhu va fileko kambe. Hi ndlela leyo, a madimoni ma khohlisa vanhu vo tala va kholwa lezaku a vafileko va hanya ni ku va nga zi kota ku wulawula na hina hi hanyako. A madimoni ma maha vanhu vo tala va kholwa lezaku ku na ni zipoka kutani zidjusa.

Hikwalaho, hi fanele ku ti wonela kasi Satani ni madimoni yakwe va nga hi khohlisi. A Biblia gi hi tlharihisa giku: ‘Satani wa zama ku ti hunzula a maha ku khwatsi i ngelosi ya yi nene, niku a malanza yakwe wonawu ma maha lezo.’ (2 Va Le Korinte 11:14, 15) Kanilezi, a lisine hi lezaku a madimoni ma bihile. A hi wone lezi ma zamisako zona a ku hi maha hi fana nawo.

A vanhu va gonza kwihi a zilo zo tala xungetano hi tihanyi, kuhlengela masango loku ku lwisanako ni nayo wa Nungungulu, zidjusa ni zipoka? — Va zi gonza hi ku wona mafilmi ya zona lomu ka televizawu, ku nghena ka Internet, ku bela mihlakano yo kari lomu ka komputadori, ni ku lera mabhuku ya mafenya. Xana a ku maha zilo lezo zi hi maha hiva kusuhani na Nungungulu kutani kusuhani na Diabolusi ni madimoni yakwe? U zi wonisa kuyini? —

U alakanya ku himani a lavako lezaku hi ingisela ni ku wona a zilo zo biha? — Ina, hi Satani ni madimoni yakwe. Makunu, mina na wena hi fanele ku maha yini? — Hi fanele ku lera, hi ingisela, hi tlhela hi wona zilo za zi nene ni lezi zi to hi vuna ku tirela Jehova. Wa alakanya a zilo zo kari za zi nene lezi hi faneleko ku maha? —

Loku hi maha zilo za zi nene, a hi na xigelo xa ku chava madimoni. Jesu i na ni ntamu wa hombe ku hunza wa madimoni, niku ma mu chava. Ka siku go kari, a madimoni ma lo rila hi ku chava Jesu maku: “U tele ku ta hi lovisa ke?” (Marku 1:24) Hi ta tsaka nguvu a xikhati lexi Jesu a to lovisa Satani ni madimoni yakwe, a hi zona? — Ka xikhati lexi a kalako a nga se ma lovisa, a hi kanakani lezaku Jesu i ta hi vikela ka madimoni loku hi simama kuva kusuhani naye zinwe ni Papai wakwe wa le tilweni.