Wumanziko go tsakisa

Satani ni madimoni yakwe va nga ta ha khohlisa vanhu hi xikhati xo leha. Jehova i sina a va hoxile hi le tilweni. (Kuvululelwa 12:9) Xikhatini xi tako, lexi xi nga kusuhani, Nungungulu i ta tlhela a vukela Satani ni madimoni yakwe. Hi lomu ka muwoniso wu ngata hi ka Nungungulu, mupostoli Johani i te ngalo: “Zonake nzi lo wona a ngelosi na yi relela hi le tilweni, yi hi ni pfhungulo ya nkele wa lieswila ni ngenje ga hombe canjeni ga yona. Yi lo khoma drako, a nyoka leyi ya kale, yi nga Muhlevi na Satani, yi mu boha a 1.000 wa malembe. Yi lo mu hoxa nkeleni wa lieswila, yi wu vala, yi wu tiyisa hi xifungo hehla kakwe, kasi a nga khohlisi matiko ku kala ku mbhela 1.000 wa malembe.” (Kuvululelwa 20:1-3) Anzhako ka lezo, Diyabu ni madimoni yakwe va ta loviswa va ku bhi, kala kupinzuka. — Kuvululelwa 20:10.

A vanhu vo biha va nga misaveni vonawu va ta fuviswa. — Tisimu 37:9, 10; Luka 13:5.

A vafileko va ta tlhela va hanya!

Anzhako kaku Satani ni madimoni va lovisilwe, Jehova i ta nehela vanhu a makatekwa yo tala. U ta alakanya lezaku a vafileko a va na wutomi, a va kona. Jesu i ringanisile a kufa ni kuetlela — kuetlela ka hombe ko kala miloro. (Johani 11:11-14) Yena i ku ringanisile hi ndlela leyo hakuva i wa zi tiva a ku xi wata a xikhati xa kuvuxiwa ka lava va etleleko kufeni kasi va wuya kuhanyeni. Yena i te ngalo: ‘Xikhati xa hata, laha vontlhe va nga le zilahleni va ta nga . . . huma.’ — Johani 5:28, 29; ringanisa Mitiro 24:15.

Va ta vuxiwa va hanya kwalaha misaveni. A wutshanwini ga kuzwa zitiviso za vanhu va fileko, ku ta zwala mibiko yo tsakisa ya lava va vuxilweko! A hi kutsaka loku hi tova nako hi ku hoyozela varanzekako va hina na va wuya hi le xilahleni!