Jesu wa hi gonzisa ku maha mukhongelo

WA WULAWULA na Jehova Nungungulu? — I lava lezaku u wulawula naye. Loku u wulawula na Nungungulu, lezo zi vitaniwa ku mukhongelo. Jesu i wa tolovela ku wulawula ni Papai wakwe wa le tilweni. Ka zikhati zo kari i wa lava kuva yece loku a wulawula na Nungungulu. A Biblia gi wula lezaku ka khati go kari ‘i loya xitsungeni na hi yece kasi ku ya khongela. Gi lo phuma nguvu na hi kwaseyo yece.’ — Mateu 14:23.

Loku u lava ku maha mukhongelo ka Jehova na u hi wece, u ngaya kwihi? — Kuzilava u nga wulawula na Jehova na u hi wece ni wusiku a xikhati lexi u lavako ku etlela. Jesu i te ngalo: “Loku u khongela, enghena ndlwini ya wena, zonake loku u valile livati, khongela ka Raru wa wena.” (Mateu 6:6) Wa khongela ka Jehova siku ni siku a xikhati lexi u lavako ku etlela ni wusiku? — U fanele ku maha lezo.

Jesu i wa khongela kambe loku a hi xikari ka vanhu vanwani. A xikhati lexi a munghana wakwe Lazaru a ngafa, Jesu i lo maha mukhongelo na a hi ni vanwani laha ka wutshamu legi Lazaru a nga lahlilwe kona. (Johani 11:41, 42) Niku Jesu i wa maha mukhongelo kambe loku a maha mutlhangano ni vapizani vakwe. Waya mitlhanganweni, lomu ku mahiwako mikhongelo? — Ka mitlhangano leyo ku tolovela kuva munhu wa hombe a mahako mukhongelo. Ingisela khwatsi lezi a wulako hakuva o ku khongelela ka Nungungulu. Loku a mbheta ku maha mukhongelo zi nene a ku wula ku: “Amen.” Wa zi tiva ku zi wula kuyini a ku “Amen” loku a mukhongelo wu gumesa? — Zi wula ku u wu tsakele a mukhongelo lowo. Zi wula kambe lezaku wa zi vumela lezi zi wulilweko niku u lava ku wuva mukhongelo wa wenawu.

Jesu i wa khongela kambe loku a lava kuga. I wa bonga Jehova hi zakuga lezi a mu nyikileko. Wa tolovela ku maha mukhongelo loku u lava kuga zakuga? — Zi nene a kuva hi bonga zakuga ka Jehova na hi nga se sangula kuga. Loku uga ni vanwani, kuzilava ku ngava ni wo kari a mahako mukhongelo. Kanilezi, ahati loku uga wece? Kutani loku uga ni vanhu va kalako va nga mu bongi Jehova ke? — U fanele ku ti mahela mukhongelo wa wena.

Xontlhe xikhati u fanele ku khongela hi gezu go tlakuka? Kutani Jehova wa kuzwa loku u maha mukhongelo na u nga humesi gezu? —

A hlamulo wa kona hi wu kuma ka lezi zi nga mahekela Nehemia. Nehemia i wa khozela Jehova, na a tira mutini wa Artaxerxesi a nga hi hosi ya tiko ga Persia. Ka siku go kari, Nehemia i lo swireka nguvu hi lezi a nga zwile lezaku a makhurisi ya Jerusalema, gi nga hi doropa ga lisima ga vanhu vakwe, ma wa wile.

A xikhati lexi a hosi leyo yi nga wutisa Nehemia lezaku hikuyini a nga swirekile, Nehemia i lo ranga hi ku maha mukhongelo na a nga zwati gezu. Anzhako ka lezo, hi kona a nga byela hosi lezaku i wa swirekela yini, a tlhela a kombela hosi lezaku aya Jerusalema kasi ku ya vuxeta makhurisi. Zini zi nga maheka anzhako ka lezo? —

Ina, Nungungulu i lo hlamula a mukhongelo wa Nehemia. A hosi yi lo vumela lezaku a famba! A hosi leyo yi lo tlhela yi nyika Nehemia a tisinya to tala leti a nga wa ta ti tirisa kasi ku aka hi tona. Ina, Nungungulu futsi a nga hlamula mikhongelo ya hina, hambu loku hi khongela na hi nga zwati magezu. — Nehemia 1:2, 3; 2:4-8.

Zezi alakanyela lezi: U fanele ku koramisa hloko loku u maha mukhongelo? U fanele ku khizama? — Ka zikhati zo kari Jesu i wa khongela na a khizamile. Ka zikhati zinwani i wa khongela na a yimile. A ka zikhati zinwani kambe, i wa khongela na a cuwukile tilweni, a ku fana ni lezi a nga maha a xikhati lexi a nga lava ku vuxa Lazaru.

Makunu, lezo zi hi komba yini? — Ina, zi hi komba lezaku a matshamela lawa hi khongelako na hi hi ka wona, a hi wona ma nga ya lisima. A zikhati zinwani zi nene a ku koramisa hloko u tlhela u tsimba. Ka zikhati zinwani u nga ha khizama, a ku fana ni lezi Jesu a nga maha. Kanilezi, alakanya lezaku, hi nga khongela ka Nungungulu ni ka xihi xikhati, ku ngava ni mumu kutani ni wusiku, i ta hizwa. A xa lisima laha ka mukhongelo, kuva hi kholwa lezaku Jehova wa hizwa. Wa kholwa lezaku Jehova wa yizwa mikhongelo ya wena? —

Zini hi faneleko ku wula a xikhati lexi hi khongelako ka Jehova? — Hi nga nzi byela khwatsi: A xikhati lexi u khongelako, zini u wulawulako hi zona na Nungungulu? — Jehova i hi nyika zilo zo tala za zi nene, niku zi nene a kuva hi mu bonga hi kota ya zilo lezo, a hi zona? — Hi nga mu bonga a zakuga lezi hi gako. Kanilezi, wa tshuka u mu bonga hi kota ya tilo ga muvala wa azuli, tisinya to nyuka, ni zitsangi zo saseka? — Hi yena a nga maha a zilo lezo kambe.

Ka khati go kari a vapizani va Jesu va lo mu kombela lezaku a va gonzisa ku maha mukhongelo. Mugonzisi wa Hombe i lo va gonzisa futsi, a tlhela a va komba zilo za lisima lezi va nga fanele ku khongela hi zona. Wa zi tiva a ku zilo muni zalezo? — Teka Biblia ga wena, u vulula Mateu xipimo 6. Ka mavesi 9 kala 13 hi kuma lezi a vanhu vo tala va zi vitanako ku Mukombelo wa Hosi. A hi gonze zinwe.

Ka mavesi lawa, Jesu i hi byela lezaku hi khongela xungetano hi vito ga Nungungulu. I wulile ku hi fanele ku maha mukhongelo wa lezaku a vito ga Nungungulu gi basiswa. Hi nga nzi byela vito ga Nungungulu, himani? — Hi zona, hi Jehova; niku hi fanele ku gi ranza vito legi.

Xa wumbiri: Jesu i hi gonzisile a kuva hi kombela lezaku a Mufumo wa Nungungulu wuta. A Mufumo lowu wa lisima hakuva wu ta neha a kurula laha misaveni wu tlhela wu maha misava yiva paradise.

Xa wunharu: Mugonzisi wa Hombe i wulile lezaku hi fanele ku kombela ku a kuranza ka Nungungulu ku mahiwa laha misaveni a ku fana ni lezi ku mahiwako le tilweni. Loku hi kombela lezo, hi fanele ku tlhela hi maha lezi Nungungulu a lavako ku hi maha.

Hi kulanzela, Jesu i hi gonzisile ku maha mukhongelo wa lezaku hi kuma zakuga siku ni siku. I tlhelile a wula ku loku hi mahile zilo zo biha, hi fanele ku byela Nungungulu lezaku ha ti sola. Niku hi fanele ku kombela Nungungulu lezaku a hi tsetselela. Kanilezi, na a nga se hi tsetselela, hi fanele ku ranga hi hina hi tsetselela vanwani loku va hi onhele. Za olova a ku u maha lezo? —

Hi kugumesa, Jesu i tlhamusele ku hi fanele ku kombela Jehova lezaku a hi vikela ka loyi wa kubiha, Satani Diabolusi. Zontlhe lezo, zilo lezi hi nga zi wulako loku hi khongela ka Nungungulu.

Hi fanele ku kholwa lezaku Jehova wa yizwa a mikhongelo ya hina. Ahandle ka ku mu kombela lezaku a hi vuna, xontlhe xikhati hi fanele ku mu bonga. Nungungulu wa tsaka loku hi wulawula lisine a xikhati lexi hi khongelako ni loku hi kombela a zilo za zi nene. Niku i ta hi nyika a zilo lezo. Wa zi kholwa lezo ke? —