Ndlela ya ku kuma litsako

HONTLHENI ha zi lava ku tsaka, a hi zona? — Kanilezi, va tsongwani va nga ni litsako. Wa zi tiva a ku hikuyini? — Hi ku a va se gonza a ndlela ya ku kuma litsako. Va alakanya lezaku a ndlela ya ku kuma litsako kuva ni zilo zo tala. Kanilezi a xikhati lexi va kumako zilo lezo, a litsako labye a li hlweli.

Hambulezo, Mugonzisi wa Hombe i hi kombile a ndlela leyo. Ite: “A kunyika ku neha litsako la hombe a ku hunza ku nyikiwa.” (Mitiro 20:35, NM) Makunu hi yihi ndlela ya ku kuma litsako? — Hi zona, ku va nyika zilo a vanwani ni ku va mahela zilo. U wa zi tiva lezo? —

A hi yi kambisise khwatsi a mhaka leyi. Xana Jesu i wulile lezaku a munhu loyi a amukelako xinyikiwo a nga ta tsaka? — Ahihi, a hi zona a nga wula. Wa zi tsakela a ku nyikiwa zilo, a hi zona? — A vanhu vontlhe va zi tsakela. Ha tsaka loku hi amukela zilo za zi nene.

Kanilezi, Jesu i wulile lezaku hi kuma litsako la hombe nguvu loku hi nyika. Hi mawonela ya wena, himani a nyikileko vanhu a zilo zo tala a ku hunza vontlhe? — Ina futsi, hi Jehova Nungungulu.

A Biblia gi wula lezaku Nungungulu “hi yena a va nyikako wutomi vontlhe, ni kuhefemula, ni zilo zontlhe.” I hi nisela vula hi le tilweni, a hi nyika kuwonekela ka gambo lezaku a zilo lezi zi byalilweko zi kula, kasi hi kuma zakuga. (Mitiro 14:17; 17:25) Makunu, a zi hlamalisi loku a Biblia giku Jehova i Nungungulu wo tsaka! (1 Timote 1:11, NM) A ku va nyika zilo a vanwani xinwe xa zilo zi mahako Nungungulu a tsaka. Niku loku hi va nyika zilo a vanwani, zi ta hi mahawu hi tsaka.

Kanilezi, zilo muni hi nga nyikako vanwani? Hi wahi mawonela ya wena? — Ka zikhati zinwani kasi hi kuma za ku nyika vanwani ku laveka mali. Loku u lava ku nyikela nchumu wu humako lomu xitolo, zi ta lava ku u wu xava. Hikwalaho, loku u lava ku nyikela nchumu wa tshamela lego, zi nga lava ku u hlengeletela mali kala yi enela ku xava nchumu lowo.

Kanilezi, a hi zilo zontlhe zi lavako mali. Hi xikombiso, a ku mu nyika mati ya kunwa a munhu hi siku go hisa, za tsakisa. Hikwalaho, loku u mu nyika mati a munhu a zwako tora, u nga kuma litsako li kumiwako hi ku nyika.

Kuzilava wena ni mamani wa wena mu nga tshuka mu maha mikati yo nanziha. Niku zi nga tsakisa! Kanilezi, wutshanwini ga ku uga yontlhe wece, u ta tsaka nguvu loku u maha yini? — Hi zona, loku u avelana ni munwe wa vanghana va wena. U ta maha lezo ka siku go kari ke? —

Mugonzisi wa hombe ni vapostoli vakwe vontlhe va wa li tiva a litsako li kumiwako hi ku nyika. Wa zi tiva lezi va nyikileko vanwani? — Kuve nchumu wa lisima ku hunza yontlhe yi nga laha misaveni! Va wa tiva lisine xungetano hi Nungungulu, niku va tsakile nguvu hi ku bhulela vanwani a mahungu lawo yo saseka. Va lo maha lezo na va nga vumeli ku nyikiwa mali hi kota ya lezi va nga kari va zi maha.

Ka siku go kari, mupostoli Paule ni munghana wakwe wa hombe, mupizani Luka, va lo kuma wasati a nga lava kuzwa litsako li kumiwako hi ku nyika. Va lo mu kuma laha kusuhani ni congo. Paule na Luka va loya ka wutshamu lego hi kota ya lezi va nga zwile lezaku gi wa hi wutshamu ga ku mahela kona mikhongelo. Zi wa hi zona futsi, a xikhati lexi va nga chikela ka wutshamu lego, va lo kuma vavasati vo kari na va maha mukhongelo.

Paule i lo sangula ku byela vavasati lavo a mahungu yo saseka xungetano hi Jehova Nungungulu ni Mufumo wakwe. A munwe wa vavasati lavo ku wa hi Lidia. A wasati loyi, i lo zi ingisela khwatsi. Anzhako ka lezo, Lidia i lavile ku maha nchumu wo kari kasi ku komba lezaku hakunene i wa ma tsakele a mahungu yo saseka lawa a nga ma zwile. Hikwalaho, i lo kombela Paule na Luka aku: “Loku muku nzi tsumbekile ka Hosi, ngonani ndlwini ya mina, mu ta tshama kona.” I lo va maha va vumela ku famba. — Mitiro 16:13-15.

Lidia i lo tsaka nguvu hi kuva ni malanza lawo ya Nungungulu laha kaya kakwe. I wa va ranza nguvu hi kota ya lezi va nga mu vunile ku tiva Jehova na Jesu, ni ku tiva lezi a vanhu va nga mahako kasi va hanya kala kupinzuka. Zi mu tsakisile a kuva a va nyikile zakuga Paule na Luka, ni wutshamu go humula kona. Lidia i kumile litsako hakuva i wa nyikela na zi sukela mbilwini. Lowo i nchumu hi nga faneleko ku tshuka hi wu rivakelwa. Kanilezi, a munwani a nga hi kurumeta ku nyikela nchumu wo kari. Loku hakunene hi nga zi lavi ku nyikela, hambu loku hi nyikela hi nga ta kuma litsako.

Hi xikombiso, loku u hi ni tikofeti u lavako kuga, nzi gumesa nzi ku byela lezaku u fanele ku avela nwanana munwani, zi wa ta ku tsakisa ke? — Kanilezi, ahati loku u hi ni tikofeti to kari zonake u kumana ni munghana wa wena u mu ranzako nguvu ke? Loku u avela munghana wa wena hi ku zi ranza, zi nga ta ku tsakisa? —

Ka zikhati zinwani, hi mu ranza nguvu a munhu laha ka kuza hi lava ku mu nyika zontlhe hi nga nazo, hi nga sali ni nchumu. Laha a liranzo la hina hi Nungungulu li kulako, hi fanele ku ti zwisa lezo hi Yena.

Mugonzisi wa Hombe i tivile wasati wo kari wa xisiwana loyi a nga ti zwisa lezo. I mu wonile tempeleni le Jerusalema. I wa hi ni zingerengere zimbiri basi wutomini gakwe. Kanilezi, i lo chela a zingerengere zontlhe lezo lomu ka kaxa kota munyikelo, kutani xinyikiwo, kasi zi tirisiwa laha tempeli. I wa nga kurumetiwangi hi munhu. A vanhu vo tala va nga hi laho ne a va zi tivangi lezi a nga mahile. I mahile lezo hi kuziranza ni lezi a nga ranza Jehova. I kumile litsako hi lezi a nyikeleko zokari. — Luka 21:1-4.

Ku na ni tindlela to tala hi nga nyikako ha tona. Ti kona u ti alakanyako? — Loku hi nyikela hi kuziranza, hi ta tsaka. Hi lezo zi mahako Mugonzisi wa Hombe a hi byela lezi: “Nyikani.” (Luka 6:38) Loku hi maha lezo, hi ta maha a vanwani va tsaka. Niku hina, hi ta tsaka nguvu!